ប៉ាគីស្ថាន៖តុលាការចង់ចោទប្រកាន់មនុស្សផ្សេងនៅក្នុងសំណុំរឿងកាត់ទោសលោក Musharraf
សំណុំរឿងកាត់ទោសលោកអតីតឧត្តមសេនីយ ប្រធានាធិបតីប៉ាគីស្ថាន Pervez Musharraf បានឈានចូលដំណាក់កាលថ្មីមួយទៀតដោយនៅថ្ងៃសុក្រ ទី២១ វិច្ឆិកា តុលាការពិសេសទទួលបន្ទុកកាត់ទោសលោក Musharraf ពីបទក្បាត់ជាតិបានបញ្ជាឲ្យរដ្ឋាភិបាលធ្វើការចោទប្រកាន់លើអ្នកទទួលខុសត្រូវផ្សេងទៀតក្នុងសម័យរបបសឹក ពោលគឺលោកអតីតនាយករដ្ឋមន្រ្តី Shaukat Aziz និងលោកអតីតរដ្ឋមន្រ្តីក្រសួងយុត្តិធម៌ Zahid Hamid។
ចុះផ្សាយនៅថ្ងៃ៖
ស្តាប់ - ០១:៥៤
អាចថា ជាជោគជ័យមួយសម្រាប់ក្រុមមេធាវីការពារលោកអតីតប្រធានាធិបតី ឧត្តមសេនីយ Pervez Musharraf ក៏ថាបាន ព្រោះថា គឺក្រុមមេធាវីការពាររូបលោក Musharraf នេះហើយដែលបានទាមទារឲ្យតុលាការអូស ក អ្នកផ្សេងទៅកាត់ទោសដូចលោក Musharraf ពីបទក្បត់ជាតិ ពិសេសគឺលោកអតីតនាយករដ្ឋមន្រ្តី Shaukat Aziz និងលោកអតីតរដ្ឋមន្រ្តីក្រសួងយុត្តិធម៌ Zahid Hamid។ ការទាមទាររបស់ក្រុមមេធាវីការពារលោក Musharraf ដូចនេះដើម្បីបង្ហាញថា ដំណើរការកាត់ទោសនេះមិនមែនសំដៅលើមនុស្សតែម្នាក់ទេ តែសំដៅលើរដ្ឋាភិបាលមួយដែលមានតួនាទីជាអ្នកអនុវត្តន៍បញ្ជារបស់ប្រធានាធិបតីនាសម័យនោះ។ ក៏ប៉ុន្តែ រដ្ឋាភិបាលសព្វថ្ងៃមិនមានកាតព្វកិច្ចណាមួយដើម្បីឆ្លើយយល់ព្រមតាមការស្នើសុំរបស់តុលាការពិសេសនោះទេ ព្រោះថា គឺលោកនាយករដ្ឋមន្រ្តីបច្ចុប្បន្ន Nawaz Sharif តែម្តងដែលបានបង្កើតឲ្យមានតុលាការពិសេសសម្រាប់កាត់ទោសលោក Musharraf ហើយគឺលោក Musharraf នេះឯងដែលបានធ្វើរដ្ឋប្រហារយោធាទម្លាក់លោក Nawaz Sharif ពីតំណែងនាយករដ្ឋមន្រ្តីកាលពីឆ្នំា ១៩៩៩។
យ៉ាងណាក៏ដោយ រឿងរ៉ាវថ្មីនៅក្នុងសង្គ្រាមប៉ាកកានយោបាយ តុលាការប្រឆំាងនឹងលោក Musharraf ពេលនេះនឹងកាន់តែធ្វើឲ្យដំណើរការកាត់ទោសបែកជាអូរ ហូរជាស្ទឹងកាន់តែវែងឆ្ងាយ ព្រោះថា ក្រៅពីការកាត់ទោសពីបទក្បាត់ជាតិដែលនឹងអាចឆ្លងរាលដាលដល់រូបអតីតនាយករដ្ឋមន្រ្តី និងអតីតរដ្ឋមន្រ្តីក្រសួងយុត្តិធម៌ លោក Musharraf ក៏អាចនឹងទទួលការចោទប្រកាន់នៅក្នុងរឿងផ្សេងទៀត ពិសេសពីតួនាទីរបស់លោកនៅក្នុងឃាតកម្មសម្លាប់គូប្រជែងរបស់ខ្លួន គឺលោកស្រី Benazir Bhutto កាលពីឆ្នំា ២០០៧ និងការស្លាប់លោក Akbar Bugti ប្រមុខកុលសម្ព័ន្ធប៉ាគីស្ថានកាលពីឆ្នំា ២០០៦។
សូមជម្រាបជូនថា បច្ចុប្បន្នមានអាយុ ៧០ឆ្នំា លោក Musharraf កំពុងរស់នៅក្នុងស្រុកកំណើត Karachi ដោយមានការយាមកាមយ៉ាងខ្ពស់បំផុត និងមិនត្រូវគេអនុញ្ញាតឲ្យចាកចេញពីប្រទេសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ