ក្រុមហ៊ុន អេស អិល បន្តប្តឹងមេដឹកនាំសម្ព័ន្ធសហជីព ស៊ីខៅឌូ
មេដឹកនាំសម្ព័ន្ធសហជីពស៊ីខៅឌូ លោកអាត់ ធន់ បានចូលខ្លួនទៅបំភ្លឺ តុលាការសាលាដំបូងរាជធានីភ្នំពេញ នៅព្រឹកថ្ងៃអង្គារនេះ ពាក់ព័ន្ធនឹងបណ្តឹងរបស់ក្រុមហ៊ុនអេស អិលដែលបានប្តឹងរូបលោកពីបទញុះញង់ឲ្យមានបាតុកម្មនៅរោងចក្រអេសអិល កាលពីខែ សីហា ដល់ថ្ងៃទីធ្នូ ឆ្នាំ ២០១៣។ ចៅក្រមបានសម្រេចឲ្យលោកនៅក្រៅឃុំជាបណ្តោះអាសន្នសិនដើម្បីបន្តការស៊ើបអង្គេត ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីខៅឌូ និងសកម្មជនសហជីពមូលដ្ឋានឈ្មោះ ប៉ាវ ផាន់ណា បានចូលខ្លួនទៅបំភ្លឺនៅសាលាដំបូងរាជធានី នៅព្រឹកថ្ងៃអង្គារ ទី ៨មេសានេះ បន្ទាប់ពីក្រុមហ៊ុនបានដាក់ពាក្យប្តឹងអ្នកទាំងពីរ ពីបទញុះញង់ឲ្យមានបាតុកម្មតវ៉ា នៅក្នុងរោងចក្រអេសអិល ចាប់ពីថ្ងៃទី ១២ សីហា ដល់ថ្ងៃទី ៣ធ្នូ ឆ្នាំ ២០១។
ក្រោយការសាកសួរ តុលាការសម្រេចឲ្យលោក អាត់ ធន់ នៅក្រៅឃុំជាបណ្តោះអាសន្ន ដើម្បីរង់ចាំការស៊ើបអង្កេត ហើយថា តុលាការអាចនឹងលើកការចោទប្រកាន់នេះ ប្រសិនបើគ្មានភស្តុតាងគ្រប់គ្រាន់នោះ។ នេះបើតាមការអះអាងរបស់លោកអាត់ ធន់ ប្រាប់វិទ្យុបារាំងអន្តរជាតិ បន្ទាប់ពីចៅក្រមបញ្ចប់ការស៊ើបសួរ។
លោកអាត់ ធន់បានអះអាង ក្រុមហ៊ុនអេស អិលមិនបានអនុវត្តទៅលើកិច្ចព្រមព្រៀង ចុះថ្ងៃទី ៣ធ្នូឆ្នាំ ២០១៣ ដែលមានការចូលរួមពីតំណាងរដ្ឋមន្ត្រីការងារ សាលាក្រុងភ្នំពេញ តំណាងគណៈកម្មការដោះស្រាយ និងសារាចរណ៍ណែនាំរបស់លោកនាយករដ្ឋមន្ត្រីហ៊ុន សែន។ សារាចរណ៍ដែលបានណែនាំឲ្យក្រុមហ៊ុននេះបញ្ឈប់រាល់បណ្តឹងទាំងឡាយ ប្រឆាំងនឹងកម្មករ តំណាងសហជីព និងគ្មានការគុំគួន ហើយត្រូវផ្តល់ប្រាក់ឈ្នួល ៥០% និងអន្តប្រយោជន៍ផ្សេងៗជូនដល់កម្មករនិយោជិត។
លោកអាត់ ធន បានសំណូមពរឲ្យរដ្ឋាភិបាល អ្នកបញ្ជាទិញ និងអង្គការពាក់ព័ន្ធទាំងអស់ជួយអន្តរាគមន៍ចំពោះករណីនេះ ហើយត្រូវធានាថាក្រុមហ៊ុនអេស អិលនឹងអនុវត្តនៅកិច្ចព្រមព្រៀងចុះថ្ងៃទី ៣ ធ្នូនោះ។
សូមបញ្ជាក់ថា បាតុកម្មនៅក្នុងរោងចក្រអេសអិល ចាប់ពីថ្ងៃទី ១២ សីហា ដល់ថ្ងៃទី ៣ធ្នូ ឆ្នាំ ២០១៣នេះ ធ្វើឡើងដើម្បីទាមទារឲ្យក្រុមហ៊ុនអនុវត្តសិទ្ធិសហជីព និងលក្ខខណ្ឌការងារមួយចំនួន។ ប៉ុន្តែ អំឡុងពេលបាតុកម្ម ក៏មានការប៉ះទង្គិចគ្នារវាងក្រុមបាតុករកម្មកររោងចក្រ និងកងកម្លាំងប្រដាប់អាវុធបង្ក្រាប រហូតបណ្តាលឲ្យស្ត្រីអ្នកលក់បាយម្នាក់ស្លាប់ និងមនុស្សរងបួសជាច្រើននាក់។ ហើយរោងចក្រក៏រងការខូតខាតមួយចំនួនផងដែរ។
មេដឹកនាំសហជីពរូបនេះក៏ទើបតែបានចូលខ្លួនទៅបំភ្លឺនៅឯសាលាដំបូងរាជធានីភ្នំពេញដែរកាលពីសប្តាហ៍កន្លងទៅក្នុងសំណុំរឿងផ្សេងមួយទៀតទាក់ទងនឹងការកឹបកេងប្រាក់របស់កម្មករ។ ដើមបណ្តឹងដែលជាអតីតសហការីរួមការងាររបស់លោកបានប្តឹងក្នុងនាមកម្មករមួយក្រុមចោទប្រកាន់លោក អាត់ ធន់ ថាជាប់ពាក់ព័ន្ធនឹងអំពើពុករលួយ។ ប៉ុន្តែ លោក អាត់ ធន់ អះអាងថា នេះជាករណីមួលបង្កាច់ក្នុងគំនុំការងារប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ