Aspirine ការពារជំងឺមហារីកប្រព័ន្ធរំលាយអាហារ ៖ ផលល្អមានច្រើនជាងគ្រោះថ្នាក់
ទទួលទានថ្នាំ Aspirine ជារៀងរាល់ថ្ងៃ ក្នុងបរិមាណទាប អាចជួយកាត់បន្ថយ គួរឱ្យកត់សម្គាល់ នូវគ្រោះកើតជំងឺមហារីកប្រព័ន្ធរំលាយអាហារ (ពោះវៀន ក្រពះ និងបំពង់អាហារ)។ ការសិក្សាថ្មី ទើបចេញផ្សាយនៅថ្ងៃពុធទី ៦សីហានេះ បានសន្និដ្ឋានថា Aspirine អាចផ្តល់គុណប្រយោជន៍ផ្នែកសមត្ថភាព ការពារ ខ្លាំងជាង ផ្តល់ឥទ្ធិពលអាក្រក់ ដែលធ្វើឱ្យឈាមរាវ ងាយហូរឈាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
លេបថ្នាំ Aspirine រយៈពេល១០ឆ្នាំ ជាប់ជាប្រចាំ រាល់ថ្ងៃ អាចនឹងកាត់បន្ថយករណីកើតជំងឺមហារីក ពោះវៀនធំ បាន៣៥% និងការស្លាប់បាន៤០% អត្រាកើតជំងឺមហារីកបំពង់អាហារ និងក្រពះបាន៣០% ព្រមទាំងកាត់បន្ថយការស្លាប់ព្រោះជំងឺនេះ បានពី៣៥ ទៅ៥០% ! នេះបើតាមលទ្ធផលនៃការសិក្សាសំយោគជាង២០០ករណី និងការសិក្សាផ្សេងទៀតទាក់ទងនឹងប្រសិទ្ធិភាពថ្នាំ Aspirine ប្រឆាំងនឹងជំងឺមហារីក។
បើតាមលោកសាស្ត្រាចារ្យវេជ្ជសាស្ត្រJack Cuzick នាយកមជ្ឈមណ្ឌលការពារជំងឺមហារីក នៅទីក្រុងឡុងដ៍ មានទិន្នន័យច្រើនណាស់ដែលបញ្ជាក់អំពីឥទ្ធិពលរបស់ថ្នាំ Aspirine ទៅលើការកាត់បន្ថយគ្រោះនាំទៅរកជំងឺមហារីក និងមរណភាពនៃកោសិការជាទូទៅ។ បើតាមការវិភាគរបស់ក្រុមដដែល ដែលទើបចេញផ្សាយក្នុងទំព័រកាសែតសុខភាព Annals of Oncology គុណសម្បតិ្តជាភ្នាក់ងារការពារ បានយកឈ្នះផលវិបាកដែលមានកប់ក្នុងថ្នាំ។ ថ្នាំដែលក្រុមគ្រូពេទ្យតែងណែនាំមិនឱ្យទទួលទាន ដើម្បីចៀសវាងគ្រោះហូរឈាម ឬចេញឈាម។ មុននឹងផ្តើមប្រើថ្នាំ Aspirine ក្រុមគ្រូពេទ្យ សូមណែនាំអ្នកជំងឺឱ្យធ្វើការវិភាគរកមើល ព្យាបាលនិងកម្ចាត់ពពួកបាក់តេរី អេលីកូបាក់ទ័រ ពីឡូរី ដែលជាភ្នាក់ងារបង្កដំបៅក្រពះពោះវៀន និងនាំមានការហូរឈាមខ្លាំងពេលលេបថ្នាំ Aspirine ចូលទៅ។
ដើម្បីអាចទាញយកគុណប្រយោជន៍ពីថ្នាំ Aspirine បាន មនុស្សគ្រប់រូបត្រូវតែចាប់ផ្តើមលេបថ្នាំនេះ ក្នុងកំរិត ពី ៧៥-១០០មីល្លីក្រាម ជារៀងរាល់ថ្ងៃ ក្នុងរយៈពេលយ៉ាងតិច៥ឆ្នាំ ឬរហូតដល់១០ឆ្នាំ ចាប់ពីអាយុ៥០ ដល់៦៥ឆ្នាំ។ លេបត្រឹមតែបីឆ្នាំ ឬក្នុងពេលបីឆ្នាំដំបូង គេពុំឃើញមានផលល្អអ្វីកើតចេញពី Aspirineឡើយ។ នេះបើតាមការបញ្ជាក់ក្នុងការសិក្សាថ្មី។ យ៉ាងណាក៏ដោយ ក៏គេត្រូវការពេលវេលា និងការសិក្សាស្រាវជ្រាវបន្ថែមទៀត ដើម្បីអាចកំណត់បានពីដូស និងរយៈពេលដ៏ប្រសើរបំផុត នៃការប្រើប្រាស់ Aspirine។
ប៉ុន្តែក្រុមគ្រូពេទ្យបានណែនាំ និងហាមជាដាច់ខាតមិនឱ្យលោកអ្នកចាប់ផ្តើមទទួលទានថ្នាំ Aspirine ដោយគ្មានការអនុញ្ញាតពីគ្រូពេទ្យឡើយ ព្រោះមានបុគ្គលខ្លះប្រឈមនឹងគ្រោះហូរឈាមខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ