ឥណ្ឌាបង្កើនកិច្ចព្រមព្រៀងវារីអគ្គិសនីកាន់តែច្រើនឡើងៗជាមួយនេប៉ាល់
នៅថ្ងៃអង្គារទី ២៥ វិច្ឆិកា ២០១៤នេះ ប្រទេសនេប៉ាល់ និងឥណ្ឌា បានចុះកិច្ចព្រមព្រៀងរួមគ្នា ដើម្បីអភិវឌ្ឍន៍គម្រោងសាងសង់ទំនប់វារីអគ្គិសនី មួយ ក្នុងទំហំទឹកប្រាក់ប្រមាណ១ពាន់លានដុល្លារសហរដ្ឋអាមេរិក។ តាមរយៈគម្រោងប្រព័ន្ធវារីអគ្គិសនីនេះ នេប៉ាល់អាចបង្កើនធនធានថាមពលរបស់ខ្លួនបានផង និងនាំចេញទៅកាន់មហាយក្សឥណ្ឌាជាប្រទេសជិតខាងផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នាយករដ្ឋមន្ត្រីឥណ្ឌា លោក នរិន្ត្រា ម៉ូឌី (Narendra Modi)និងសមភាគីនេប៉ាល់ លោក ស៊ូស្ហ៊ីល ក័ររាឡា (Sushil Koirala) បានធ្វើជាអធិបតីនាឱកាសចុះហត្ថលេខាលើកិច្ចព្រមព្រៀងអភិវឌ្ឍន៍វារីអគ្គិសនី ដែលប្រព្រឹត្តទៅក្រៅក្របខ័ណ្ឌនៃជំនួបកំពូលថ្នាក់ដឹកនាំប្រទេសនិងរដ្ឋមន្ត្រីនៃបណ្តាប្រទេសនៅអាស៊ីខាងត្បូង នៅទីក្រុងកាត់ម៉ង់ឌូ ប្រទេសនេប៉ាល់។
ការសម្រេចកិច្ចព្រមព្រៀងលើគម្រោងវារីអគ្គិសនីចំណាស់២៥ឆ្នាំនេះ គឺជាជោគជ័យដ៏ត្រចះត្រចង់មួយសម្រាប់ឥណ្ឌានិងនេប៉ាល់តែម្តង។ ក្រុមហ៊ុនអគ្គិសនីឥណ្ឌា នឹងចាប់សាងសង់គម្រោងវារីអគ្គីសនី លើស្ទឹងអរុណ ដែលអាចផ្តល់ថាមពលបានប្រមាណ៩០០មេហ្កាវ៉ាត់ ចាប់ពីឆ្នាំ២០២១ទៅ។ នេប៉ាល់នឹងទទួលបានអគ្គិសនីប្រើប្រាស់ដោយឥតគិតថ្លៃចំនួន ២២% ចំណែកនៅសល់នឹងនាំចេញទៅប្រទេសឥណ្ឌា។
នេប៉ាល់និងឥណ្ឌា ដែលតែងរងគ្រោះខ្វះឬដាច់ភ្លើង ញយៗស្ទើរគាំងដំណើរការប្រទេស មានតម្រូវការថាមពលអគ្គិសនីខ្លាំងណាស់។ លោក ម៉ូឌី តាំងពីបានកាន់តំណែងជានាយករដ្ឋមន្ត្រីឥណ្ឌាភ្លាម បានសម្តែងកាយវិការរឹតចំណងមិត្តភាព ពង្រឹងទំនាក់ទំនងជាមួយនេប៉ាល់ យ៉ាងខ្លាំងជាពិសេសលើវិស័យថាមពល។ កាលពីខែមុន ឥណ្ឌានិងនេប៉ាល់ក៏បានចុះហត្ថលេខាលើកិច្ចព្រមព្រៀងពាណិជ្ជកម្មលើផ្នែកថាមពលរួចហើយ។ កិច្ចព្រមព្រៀងវារីអគ្គិសនីឥណ្ឌា-នេប៉ាល់ទីមួយប្រព្រឹត្តទៅកាលពីកញ្ញា។
មានប្រព័ន្ធទឹក ស្ទឹង-ទន្លេហូរខ្វាត់ខ្វែងធ្លាក់មកពីភ្នំហ៊ីម៉ាឡាយ៉ា នេប៉ាល់មានធនធានធម្មជាតិជាប្រភពវារីអគ្គិសនីយ៉ាងច្រើនសន្ធឹកសន្ធាប់។ ប៉ុន្តែកិច្ចព្រមព្រៀងអភិវឌ្ឍន៍ វិស័យនេះ កន្លងមកបានជាប់គាំង ដោយនេប៉ាល់ខ្វល់ខ្វាយចំពោះការគំរាមកំហែងបូរណភាពដែនដី។ នេប៉ាល់បច្ចុប្បន្ននេះ ផលិតថាមពលវារីអគ្គីសនី តែប្រមាណ៧៥០មេហ្កាវ៉ាត់ ពោលគឺប្រមាណតែ២%នៃសក្តានុពលរបស់ខ្លួនប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ