ថៃ និងភូមាបំផ្លាញគ្រឿងញៀនដែលមានតម្លៃ ជិត១ ពាន់លានដុល្លារ
ប្រទេសជិតខាងថៃ និងភូមា មិថុនា បានកិន ដុតបំផ្លាញ គ្រឿងញៀន ដែលមានតម្លៃជិត ១ពាន់លានដុល្លារ។ កាលពីថ្ងៃសុក្រ ថ្ងៃ ទិវាពិភពលោកប្រយុទ្ធប្រឆាំងគ្រឿង ញៀន អាជ្ញាធរភូមាបានប្រកាសថា ខ្លួនបានដុតបំផ្លាញ គ្រឿងញៀន នៅបីកន្លែងផ្សេងគ្នា ក្នុងពេលអាជ្ញាធរថៃ បានដុតបំផ្លាញ ថ្នាំញៀន ៩,៥តោន ដែលមានតម្លៃ ជាង ៦០០លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
តំបន់ត្រីកោណមាស ចន្លោះ ប្រទេសថៃ ភូមា និងឡាវ នៅតែជាកន្លែងផលិតគ្រឿងញៀនដ៏សកម្ម នៅ តំបន់អាស៊ី។ អាស៊ីដែលជាទីផ្សារគ្រឿងញៀន ដ៏ធំ នៅក្នុងពិភពលោក។ នេះបើតាមរបាយការណ៍ របស់អង្គការសហប្រជាជាតិ ចេញផ្សាយ នៅថ្ងៃសុក្រ ថ្ងៃទិវាពិភពលោកប្រឆាំងនឹងគ្រឿងញៀន។
នៅភូមា ដំណាំអាភៀនច្រើន ធ្វើឡើង នៅក្នុងតំបន់ ជាប់ព្រំដែនជាមួយចិន ដែលគ្រប់គ្រងដោយពួកឧទ្ទាម ភូមា។ រដ្ឋស្ហានរបស់ភូមាជាកន្លែងដាំអាភៀនធំទី២ បន្ទាប់ ពីអាហ្វហ្កានីស្ថាន។ អាភៀនភាគច្រើន ត្រូវបានគេលួច ដឹកចូលទឹកដីចិន ជាទីដែលអាភៀនត្រូវកែច្នៃ ផលិតចេញជាគ្រឿងញៀនហេរ៉ូអ៊ីន។ តាមរបាយការណ៍ប្រចាំឆ្នាំរបស់អង្គការសហប្រជាជាតិ ដំណាំអាភៀនបានកើនឡើង ខ្ពស់ មិនធ្លាប់មាន នៅក្នុងពិភពលោក ចាប់តាំងពីឆ្នាំ ១៩៣០។ ទំហំដីដាំអាភៀនកើនឡើង ខ្លាំង ដោយសារតែការទិញ ប្រើប្រាស់ថ្នាំញៀនបានកើនឡើង នៅក្នុងពិភពលោក ជាពិសេស នៅចិន និងនៅអាមេរិក។ នៅ អាហ្វហ្កានីស្ថាន ដីដាំអាភៀនបានរីកទំហំ ផ្ទៃក្រឡា គេចផុតពីការតាមដានរបស់រដ្ឋាភិបាល ដែលរវល់ជាប់ដៃ ប្រយុទ្ធនឹងពួកឧទ្ទាមតាលីបង់។
នៅប្រទេសថៃ គ្រឿងញៀន ចំនួន ៩,៥តោន ដែលត្រូវដុតបំផ្លាញ មានតម្លៃ ៦០០លានដុល្លារ។ ចំនួនគ្រឿងញៀនដែលប៉ូលិសថៃ ចាប់ រឹបអូសយក បានកើនឡើង ទ្វេដង បើប្រៀបធៀបនឹងឆ្នាំមុន។ នេះស បញ្ជាក់ឲ្យឃើញថា របបសឹកថៃ ប្តេជ្ញាចិត្តប្រយុទ្ធប្រឆាំងខ្លាំងនឹងបណ្តាញជួញដូរគ្រឿងញៀននៅក្នុងប្រទេស។
របាយការណ៍របស់អង្គការសហប្រជាជាតិ ចេញផ្សាយ កាលពីខែឧសភាកន្លងទៅ បានបង្ហាញថា ថ្នាំញៀន សិប្បនិម្មិត ដូចជាថ្នាំញៀន ម៉ា ដែលគេចាប់ រឹបអូសបាន នៅក្នុងពិភពលោក បានកើនឡើង ដល់ទៅ ៨ដង ពី៣០លានគ្រាប់ នៅឆ្នាំ ២០០៨ ដល់ ២៥០លានគ្រាប់ នៅឆ្នាំ ២០១៣។ នៅក្នុងបណ្តាប្រទេសក្រីក្រក្នុងតំបន់ទន្លេមេគង្គ ថ្នាំម៉ា ត្រូវគេរកឃើញ ប្រើប្រាស់ច្រើន ដោយអ្នកដែលធ្វើការច្រើនម៉ោង ដូចជាអ្នកបើកឡានតាក់ស៊ី។ បច្ចុប្បន្ននេះថ្នាំម៉ា កំពុងលេចមុខក្នុងប្រទេសអាស៊ីអ្នកមានផ្សេងទៀត ដូចជាសិង្ហបុរី កូរ៉េខាងត្បូង ឬម៉ាឡេស៊ី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ