ថៃបានស្នើឲ្យមានកិច្ចប្រជុំត្រីភាគីជាមួយប្រទេសជិតខាងដើម្បីប្រឆំាងនឹងការជួញដូរមនុស្ស
ប្រទេសថៃបានអំពាវនាវឲ្យរៀបចំកិច្ចប្រជុំត្រីភាគីមួយជាមួយប្រទេសម៉ាឡេស៊ី និងភូមាដើម្បីប្រឆំាងទប់នឹងការជួញដូរមនុស្សនៅក្នុងតំបន់។ ការអំពាវនាវរបស់រដ្ឋាភិបាលក្រុងបាងកកពេលនេះបានធ្វើឡើង បន្ទាប់ពីប៉ូលិសបានរកឃើញជាបន្តបន្ទាប់នូវរណ្តៅសាកសពជនអន្តោប្រវេសន៍ជាច្រើននៅប៉ែកខាងត្បូងប្រទេសជាប់ព្រំដែននឹងប្រទេសម៉ាឡេស៊ី។ មួយវិញទៀត របាយការណ៍ចុងក្រោយរបស់អង្គការសហប្រជាជាតិក៏បានបញ្ជាក់ពីកំណើនគួរឲ្យកត់សម្គាល់នៃចំនួនជនអន្តោប្រវេសន៍ ពិសេសពួករ៉ូហ៊ីងយ៉ាមកពីប្រទេសភូមា និងជនជាតិបង់ក្លាដែសដែលព្យាយាមរត់ភៀសខ្លួនទៅកាន់ប្រទេសទី៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
គឺនៅចំពោះមុខក្រុមអ្នកកាសែតក្នុងទីក្រុងបាងកកដែលលោកនាយករដ្ឋមន្រ្តីថៃប្រាយុទ្ធ ចាន់អូចាបានថ្លែងប្រាប់ឲ្យដឹងថា លោកបានស្នើរដ្ឋមន្រ្តីការបរទេសឲ្យរៀបចំកិច្ចប្រជុំត្រីភាគីជាមួយប្រទេសជិតខាងនៅមុនដំណាច់ខែឧសភានេះ ពិសេសជាមួយប្រទេសម៉ាឡេស៊ី និងប្រទេសភូមា។ គោលដៅនៃកិច្ចប្រជុំត្រីភាគី គឺស្វែងរកវិធានការរួមដើម្បីទប់ស្កាត់ការជួញដូរមនុស្សដែលក្រុមឈ្មួញជួញដូរមនុស្សបានយកទឹកថៃជាទីកន្លែងឆ្លងកាត់សម្រាប់នំាមនុស្សទៅកាន់ប្រទេសទី៣។ លោកប្រាយុទ្ធ ចាន់អូចាបានបន្ថែមដោយចោទជាសំណួរថា នៅពេលដែលក្រុមឈ្មួញបាននំាជនអន្តោប្រវេសន៍ឆ្លងកាត់ទឹកដីថៃដើម្បីបន្តដំណើរទៅកាន់ប្រទេសទី៣ តែបែរជាប្រទេសទី៣ បានរុញច្រានជនអន្តោប្រវេសន៍ទំាងអស់ត្រឡប់វិញ តើឲ្យថៃដែលជាអ្នកនៅកណ្តាលធ្វើអ្វីខ្លះ?។
គួរជម្រាបជូនថាជារៀងរាល់ឆ្នំា មានជនអន្តោប្រវេសន៍ខុសច្បាប់ជាច្រើនរយពាន់នាក់ ពិសេសជនជាតិភាគតិចរ៉ូហ៊ីងយ៉ាក្នុងប្រទេសភូមា និងជនជាតិបង់ក្លាដែសបាននំាគ្នារត់ភៀសខ្លួនចេញពីប្រទេសកំណើតដើម្បីស្វែងរកជីវិតរុងរឿងនៅប្រទេសទី៣ ពិសេសប្រទេសម៉ាឡេស៊ីដោយឆ្លងកាត់តាមទឹកដីថៃនៅប៉ែកខាងត្បូង។ តួលេខចុងក្រោយរបស់ឧត្តមស្នងការសហប្រជាជាតិទទួលបន្ទុកជនភៀសខ្លួនឲ្យដឹងថា ក្នុងចន្លោះខែមករា និងមីនាឆ្នំា ២០១៥ នេះ មានពួករ៉ូហ៊ីងយ៉ា និងជនជាតិបង់ក្លាដែសប្រមាណជា ២៥ ០០០នាក់បានភៀសខ្លួនផ្សងព្រេងតាមទូកដោយបង់លុយឲ្យឈ្មួញ។ ក្នុងចំណោមអ្នកដំណើរទំាងអស់ មានអ្នកខ្លះបានស្លាប់តាមផ្លូវ ចំណែកអ្នកនៅរស់ត្រូវបានឈ្មួញយកទៅដាក់នៅជំរំលួចលាក់ក្នុងព្រៃស្ថិតប៉ែកខាងត្បូងទឹកដីថៃ មុននឹងបន្តដំណើរទៅកាន់ប្រទេសម៉ាឡេស៊ី។
តែជនអន្តោប្រវេសន៍ខុសច្បាប់ភាគច្រើនទំាងនោះបានស្លាប់ និងត្រូវគេកប់ចោលក្នុងព្រៃទឹកដីថៃ។ អ៊ីចឹងហើយបានជាថ្មីៗនេះ ប៉ូលិសថៃបានរកឃើញរណ្តៅសាកសពជនអន្តោប្រវេសន៍ជាច្រើនកន្លែង។ ត្រង់ចំណុចនេះ លោកប្រមុខរដ្ឋាភិបាលថៃបានទម្លាក់កំហុសលើមន្រ្តីរាជការថៃមួយចំនួនដែលបានរួមគំនិតនៅក្នុងទង្វើជួញដូរមនុស្ស និងបន្ថែមថា គេត្រូវតែកំចាត់មន្រ្តីពុករលួយទំាងអស់នោះ។ គួររម្លឹកជូនថា តំាងពីមានការរកឃើញរណ្តៅសាសពជនអន្តោប្រវេសន៍ខុសច្បាប់មក រដ្ឋអំណាចថៃបានបញ្ឈរជើងប៉ូលិស និងមន្រ្តីរាជការជាង ៥០នាក់ពីបទឃុបឃិតនឹងបណ្តាញជួញដូរមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ