រថយន្តរបស់អូតង់រងការប្រហារដោយភេរវកម្មអត្តឃាត នៅអាហ្វហ្កានីស្ថាន
នៅទីក្រុងកាប៊ូល ប្រទេសអាហ្វហ្កានីស្ថាន ក្បួនរថយន្តរបស់អង្គការអូតង់ បានរងការវាយប្រហារដោយភេរវកម្មអត្តឃាត នៅថ្ងៃអាទិត្យនេះ។ តាមប៉ូលិសអាហ្វហ្កានីស្ថាន ភេរវកម្មអត្តឃាតបានធ្វើឲ្យមានជនរងគ្រោះ ជាជនស៊ីវិល ៣នាក់។ ក្រុមតាលីបង់ វិញបានប្រកាសចេញមុខទទួលខុសត្រូវលើភេរវកម្ម ប្រឆាំងនឹងក្បួនរថយន្តរបស់អង្គការអូតង់។
ចុះផ្សាយនៅថ្ងៃ៖
គោលដៅវាយប្រហាររបស់ក្រុមធ្វើភេរវកម្មអត្តឃាត គឺក្បួនរថយន្តរបស់កងកម្លាំងបរទេស នៅអាហ្វហ្កានីស្ថាន។ នេះបើតាមអ្នកនាំពាក្យរបស់ក្រសួងមហាផ្ទៃអាហ្វហ្កានីស្ថាន។ អ្នកនាំពាក្យរបស់អង្គការអូតង់ នៅអាហ្វហ្កានីស្ថានបានបញ្ជាក់ពីភេរវកម្មប្រឆាំងក្បួនរថយន្តរបស់ទាហានអូតង់។
តាមក្រសួងមហាផ្ទៃអាហ្វហ្កានីស្ថាន នៅវេលាម៉ោងដែលមនុស្សកំពុងធ្វើចរាចរច្រើន ក្នុងក្រុងកាប៊ូល ក្រុមអត្តឃាតជនបានបើករថយន្ត ដែលផ្ទុកទៅដោយគ្រឿងផ្ទុះ សំដៅបុកក្បួនរថយន្តរបស់កងកម្លាំងបរទេស។ តាមអ្នកថតរូបរបស់ទីភ្នាក់ងារព័ត៌មានបារាំង គ្រឿងផ្ទុះមានកម្លាំងខ្លាំង ព្រោះវាបានធ្វើឲ្យរថយន្តពាសដែករបស់អូតង់ត្រូវប៉ើងខ្ទាត ទៅលើចិញ្ចើមផ្លូវ និងខូចខាតផ្នែកខាងមុខយ៉ាងធ្ងន់ធ្ងរ។
ក្រុមតាលីបង់ដែលត្រូវរដ្ឋាភិបាលអាហ្វហ្កានីស្ថាន គាំទ្រដោយអាមេរិក វាយបណ្តេញចេញពីអំណាច នៅឆ្នាំ ២០០១ បានចេញមុខ ប្រកាសថា ភេរវកម្មអត្តឃាតប្រឆាំងនឹងក្បួនរថយន្តអូតង់ គឺជាស្នាដៃរបស់ក្រុមខ្លួន។
ភេរវកម្មអត្តឃាតនៅថ្ងៃ អាទិត្យ កើតឡើង នៅក្នុងបរិបទមួយ រដ្ឋាភិបាលអាហ្វហ្កានីស្ថានកំពុងចុះខ្សោយផ្នែកយោធា។ កាលពីចុងខែ កញ្ញា ក្រុមឧទ្ទាមតាលីបង់ មានសមត្ថភាព អាចវាយដណ្តើមកាន់កាប់ទីក្រុងយុទ្ធសាស្រ្ត គុនឌូ ប៉ែកខាងជើងអាហ្វហ្កានីស្ថាន បានតែក្នុងរយៈពេលប៉ុន្មានម៉ោងប៉ុណ្ណោះ។ កងកម្លាំងអាហ្វហ្កានីស្ថានអាចវាយដណ្តើមយកគុនឌូបានមកវិញ ក៏ដោយពីមានជំនួយរបស់យន្តហោះចម្បាំងអូតង់។
អូតង់ ដែលបានកាត់បន្ថយបេសកកម្មរបស់ខ្លួន នៅតាលីបង់ តាំងពីចុងឆ្នាំ ២០១៤ លែងមានកម្លាំងទ័ពបរទេស សម្រាប់ប្រយុទ្ធទប់ទល់នឹងក្រុមតាលីបង់ លើដីដូចមុនទៀតហើយ។ ទាហានបរទេស មួយចំនួនតូច ដែលបន្ត ស្ថិតនៅអាហ្វហ្កានីស្ថាន មាននាទីត្រឹម ផ្តល់ប្រឹក្សា និងបណ្តុះបណ្តាល ទាហានអាហ្វហ្កានីស្ថាន ដើម្បី ប្រយុទ្ធទប់ទល់នឹងក្រុមតាលីបង់តែប៉ុណ្ណោះ។ កងទ័ពអាហ្វហ្កានីស្ថានមិនរឹងមាំ រួមផ្សំនឹងការដកចេញ កម្លាំងទ័ពបរទេស គឺជាឱកាសល្អ សម្រាប់ក្រុមឧទ្ទាមតាលីបង់ ដែលកំពុងបង្កើនសមរភូមិប្រយុទ្ធ គ្រប់មុខព្រួញ ដើម្បីដណ្តើមអំណាចពីរដ្ឋាភិបាលអាហ្វហ្កានីស្ថាន គាំទ្រដោយក្រុមបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ