លោកស្រីអ៊ុង សានស៊ូជីអំពាវនាវឲ្យមានការផ្សះផ្សា ចំពេលដែលភូមាត្រៀមបើកសករាជថ្មី
នៅក្នុងប្រទេសភូមា លទ្ធផលនៃការបោះឆ្នោតសភាកាលពីថ្ងៃអាទិត្យ ទី៨ វិច្ឆិកានៅមិនទាន់បានប្រកាសជាផ្លូវការនៅឡើយទេ តែលទ្ធផលបណ្តោះអាសន្នដែលកំពុងធ្លាក់មកជាបណ្តើរៗបានផ្តល់ជោគជ័យយ៉ាងធំធេងចំពោះគណបក្សប្រឆំាងរបស់លោកស្រីអ៊ុង សានស៊ូជី គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ ចំណែកមន្រ្តីរបស់គណបក្សកាន់អំណាចដែលជាអតីតយោធាក៏បានផ្តើមទទួលស្គាល់ជាបណ្តើរៗពីបរាជ័យរបស់ខ្លួន។ នៅថ្ងៃពុធ ទី១១ វិច្ឆិកានេះ លោកស្រីអ៊ុង សានស៊ូជីបានអំពាវនាវឲ្យមានជំនួបជាមួយលោកប្រធានាធិបតីថេន សេន លោកប្រធានរដ្ឋសភាស្វេ ម៉ាន់ និងមេបញ្ជាការកងទ័ពលោកមីន អ៊ុងឡេង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៧
គឺតាមរយៈលិខិតជាចំហមួយដែលលោកស្រីប្រមុខបក្សប្រឆំាងអ៊ុង សានស៊ូជីបានស្នើឲ្យមានជំនួបជាមួយលោកប្រធានាធិបតីថេន សេន លោកប្រធានរដ្ឋសភាស្វេ ម៉ាន និងមេបញ្ជាការកងទ័ពឧត្តមសេនីយមីន អ៊ុងឡេង។ លោកស្រីអ៊ុង សានស៊ូជីបានសុំជួបសន្ទនាជាមួយឥស្សរជនទំាង ៣រូបនៅសប្តាហ៍ក្រោយដើម្បីនិយាយពីការផ្សះផ្សា។ ជាការឆ្លើយតបវិញភ្លាមៗក្នុងថ្ងៃនេះ លោកថេន សេនបានយល់ព្រមជួបមួយទល់មួយជាមួយលោកស្រីអ៊ុង សានស៊ូជី តែគេត្រូវរង់ចំាការប្រកាសលទ្ធផលបោះឆ្នោតជាផ្លូវការ។ ដោយឡែក នៅមិនទាន់មានចម្លើយយ៉ាងណាពីលោកប្រធានរដ្ឋសភាស្វេ ម៉ាន់ និងឧត្តមសេនីយមីន អ៊ុងឡេង។
លទ្ធផលផ្លូវការនៅមិនទាន់បានប្រកាសឲ្យដឹងទេ តែលទ្ធផលដែលធ្លាក់មកជាបន្តបន្ទាប់បានបង្ហាញពីជោគជ័យលើសលប់របស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ លទ្ធផលធ្លាក់មកក្នុងថ្ងៃនេះក៏បានបង្ហាញកាន់តែច្បាស់ថែមទៀតពីការដែលគណបក្សប្រឆំាងទទួលបានសម្លេងភាគច្រើនដាច់ខាតនៅក្នុងរដ្ឋសភា។ រូបលោកស្រីអ៊ុង សានស៊ូជីផ្ទាល់ខ្លួនបានបញ្ជាក់ថា គណបក្សរបស់លោកស្រីទទួលបានដល់ទៅ ៨២% នៃអសនៈនៅក្នុងរដ្ឋសភា និងថា ជ័យជំនះរបស់គណបក្សប្រឆំាង គឺបានលេចរូបរាងកាន់តែច្បាស់ក្រឡែត។
មួយវិញទៀត ការដែលលោកស្រីអ៊ុង សានស៊ូជីបានសុំជួបសន្ទនាជាមួយប្រធានាធិបតី ប្រធានរដ្ឋសភា និងមេបញ្ជាការកងទ័ពពេលនេះ គឺជាសក្ខីកម្មមួយដែលបញ្ជាក់ថា ការផ្លាស់ប្តូរជាប្រវត្តិសាស្រ្តនៅភូមាកំពុងមានដំណើរទៅមុខដើម្បីបិទទំព័រសករាជចាស់ដ៏ខ្មៅងងឹត។
លោកស្រីអ៊ុង សានស៊ូជីចង់រក្សាសេចក្តីថ្លៃថ្នូរសម្រាប់អ្នកឈ្នះ និងអ្នកចាញ់
លោកស្រីអ៊ុង សានស៊ូជីសុំជួបសន្ទនាជាមួយឥស្សរជនជាន់ខ្ពស់ទំាង ៣រូប គឺប្រធានាធិបតី ប្រធានរដ្ឋសភា និងមេបញ្ជាការកងទ័ព គឺមិនមែនដើម្បីនិយាយពីការចែកអំណាចគ្នាទេ តែក្នុងគោលដៅផ្សះផ្សា។ ភូមាជាប្រទេសក្រីក្រមួយនៅអាស៊ីអាគ្នេយ៍ដែលស្គាល់តែរបបដឹកនំាយោធា សូម្បីតែរដ្ឋាភិបាលស៊ីវិលដែលទើបបង្កើតឡើងក្នុងឆ្នំា ២០១១ ក៏ដឹកនំាឲ្យអតីតយោធាដែរ រាប់ទំាងលោកប្រធានាធិបតីថេន សេន។ ដូច្នេះវាជារឿងមួយចំាបាច់ខ្លំាងណាស់ដែលការផ្លាស់ប្តូរនឹងត្រូវធ្វើឡើងដោយសន្សឹមៗ។ ត្រង់ចំណុចនេះ លោកស្រីអ៊ុង សានស៊ូជីដែលត្រូវបានពួកយោធាចាប់ឃុំក្នុងគេហដ្ឋានអស់រយៈពេលជិត ២០ឆ្នំាបានយល់ច្បាស់ណាស់។
អ៊ីចឹងហើយបានជាពេលនេះ និងបើទោះបីជាលោកស្រីដឹងថា គណបក្សរបស់លោកស្រីទទួលបានជោគជ័យយ៉ាងធំធេងនៅក្នុងការបោះឆ្នោតពេលនេះក៏ដោយ ក៏លោកស្រីមិនបានបញ្ចេញមោទនភាពខ្លំាងក្លាជាសាធារណៈប៉ុន្មានទេ ហើយក្រុមសកម្មជនរបស់លោកស្រីក៏មិនសូវសាទរគគ្រឹកគគ្រេងប៉ុន្មានដែរ។ យុទ្ធសាស្រ្តរបស់លោកស្រីអ៊ុង សានស៊ូជីគឺមិនចង់បំបាក់មុខ មាត់គណបក្សកាន់អំណាចយ៉ាងគំហុក ពោលចៀសវាងការប្រើឃ្លាថា « អ្នកឈ្នះមុខខ្លាញ់ អ្នកចាញ់មុខសេះ »។ អ្វីដែលលោកស្រីអ៊ុង សានស៊ូជីចង់បាន គឺរក្សាសេចក្តីថ្លៃថ្នូរទំាងអ្នកឈ្នះ និងអ្នកចាញ់។
នេះជាជម្រើសផ្សះផ្សាបង្ការទុកមុនដោយលោកស្រីអ៊ុង សានស៊ូជីបារម្ភខ្លាចព្រឹត្តិការណ៍ក្នុងឆ្នំា ១៩៩០ កើតមានជាថ្មីម្តងទៀត។ កាលណោះ គណបក្សប្រឆំាងឈ្នះឆ្នោតភ្លូកទឹក ភ្លូកដី តែរបបសឹកមិនទទួលស្គាល់លទ្ធផល រួចចាប់លោកស្រីទៅឃុំឃំាង។
កងទ័ពនៅតែមានតួនាទីសំខាន់ក្នុងសង្គមភូមា
រដ្ឋសភាភូមាមានអសនៈទំាងអស់ចំនួន ៤៤០ តែមានអសនៈ ១ភាគ៤ ត្រូវបានកក់ទុកសម្រាប់កងទ័ពជាស្វ័យប្រវត្តិដោយមិនបាច់បោះឆ្នោត។ ទោះជាយ៉ាងនេះក្តី លោកស្រីអ៊ុង សានស៊ូជីសង្ឃឹមថា គណបក្សរបស់លោកស្រីនឹងមានសម្លេងភាគច្រើនដាច់ខាតដើម្បីដឹកនំារដ្ឋាភិបាលតែម្នាក់ឯង។ តែបញ្ហានៅត្រង់ថា ទោះបីជាមានសម្លេងដាច់ខាតក៏ដោយ ក៏រដ្ឋាភិបាលដឹកនំាដោយគណបក្សលោកស្រីអ៊ុង សានស៊ូជីគ្មានសិទ្ធិតែងតំាងរដ្ឋមន្រ្តីក្រសួងសំខាន់ៗមួយចំនួនទេ ពិសេសគឺក្រសួងការពារជាតិ ក្រសួងមហាផ្ទៃ និងក្រសួងទទួលបន្ទុកកិច្ចការព្រំដែន។ ការតែងតំាងរដ្ឋមន្រ្តីក្រសួងការពារជាតិ ក្រសួងមហាផ្ទៃ និងក្រសួងទទួលបន្ទុកកិច្ចការព្រំដែន ជាភារៈកិច្ចរបស់មេបញ្ជាការកងទ័ព។
ក្រសួងដែលសេសសល់សម្រាប់លោកស្រីអ៊ុង សានស៊ូជីមានដូចជាក្រសួងការបរទេស សុខាភិបាល ឬមួយក៏ក្រសួងអប់រំ។ មួយវិញទៀត ការធ្វើវិសោតនកម្មច្បាប់រដ្ឋធម្មនុញ្ញនឹងត្រូវការសម្លេងគំាទ្រពីសភាជាង ៧៥%។ តែដោយសម្លេង ២៥% ស្ថិតក្នុងកណ្តាប់ដៃកងទ័ពដែលមានសិទ្ធិវេតូរួចទៅហើយ កំណែទម្រង់ច្បាប់រដ្ឋធម្មនុញ្ញដើម្បីអនុញ្ញាតឲ្យលោកស្រីអ៊ុង សានស៊ូជីទទួលតំណែងប្រធានាធិបតីជារឿងមិនអាចទៅរួច។
ដូច្នេះឃើញថា ទោះបីជាលទ្ធផលបោះឆ្នោតបានផ្តល់ជោគជ័យភ្លូកទឹក ភ្លូកដីដូចក្តីសង្ឃឹមរបស់លោកស្រីអ៊ុង សានស៊ូជីក៏ដោយ ក៏កងទ័ពនៅតែដើរតួនាទីយ៉ាងសំខាន់នៅក្នុងសង្គមភូមា និងដែលលោកស្រីអ៊ុង សានស៊ូជីគ្មានជម្រើសអ្វីក្រៅពីរួមសហការណ៍ជាមួយកងទ័ពទេ។ បើអ្វីៗមានដំណើរការទៅមុខដោយរលូន រដ្ឋាភិបាលថ្មីនឹងត្រូវដំណើរការនៅដើមឆ្នំា ២០១៦ ក្នុងខែកុម្ភៈ ឬមីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ