ចិនបានបិទបញ្ចប់ជាផ្លូវការនូវការអនុវត្តនយោបាយកូនទោល
នៅថ្ងៃទី២៩ តុលា ឆ្នំា ២០១៥ រដ្ឋាភិបាលចិនបានប្រកាសបិទបញ្ចប់ជាផ្លូវការនូវការអនុវត្តន៍នយោបាយកូនទោល មានន័យថាចាប់ពីពេលនេះតទៅ គ្រួសារចិននីមួយៗអាចយកកូនបាន ២នាក់។ គួរជម្រាបជូនថា នយោបាយកូនទោលត្រូវបានអនុម័តតំាងពីឆ្នំា ១៩៧៩ ក្នុងគោលដៅធានាការគ្រប់គ្រងប្រជាពលរដ្ឋដែលមានចំនួនច្រើនជាងគេក្នុងលោក។ តែបច្ចុប្បន្ន ចិនបាននឹងកំពុងប្រឈមមុខនឹងអត្រាកំណើនមនុស្សចាស់ដែលខ្លួនចំាបាច់បោះបង់ចោលនូវនយោបាយកូនទោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
អស់រយៈពេល ៣៥ឆ្នំាដែលចិនបានអនុវត្តន៍នយោបាយកូនទោល។ តាមពិតទៅ ច្បាប់គ្រួសារត្រូវបានរដ្ឋាភិបាលផ្តើមបន្ធូរបន្ថយតំាងពីឆ្នំា ២០១៣ មកម្ល៉េះ ដោយបានអនុញ្ញាតឲ្យគ្រួសារមួយអាចយកកូន ២នាក់បាន ប្រសិនបើឱពុក ឬម្តាយខ្លួនឯងជាកូនទោល។ តែចាប់ពីពេលនេះតទៅ គ្រប់គ្រួសារទំាងអស់នឹងមានសិទ្ធិយកកូន ២នាក់បាន។ ការសម្រេចបិទបញ្ចប់នយោបាយកូនទោលពេលនេះត្រូវបានធ្វើឡើងនៅក្នុងកិច្ចប្រជុំគណៈកម្មាធិការមជ្ឈិមបក្សកុម្មុយនិស្តដែលបានបើកកិច្ចប្រជុំកាលពីថ្ងៃចន្ទ ទី២៦ តុលា។ គឺជាកិច្ចប្រជុំដើម្បីកំណត់ផែនការ ៥ឆ្នាំ ពីឆ្នំា ២០១៦ ដល់ឆ្នំា ២០២០។
មានកត្តាសំខាន់តែមួយគត់ដែលបានជំរុញឲ្យចិនបោះបង់ចោលនយោបាយកូនទោលពេលនេះ គឺកំណើននៃចំនួនមនុស្សចាស់។ តាមការព្យាករណ៍ឲ្យដឹងថា មានពលរដ្ឋចិនប្រមាណជា ៣៥០លាននាក់នឹងមានអាយុ ៦០ឆ្នំា ឬច្រើនជាងនេះចាប់ពីឥឡូវទៅដល់ឆ្នំា ២០៣០។ ទន្ទឹមគ្នានេះ វិសមភាពរវាងមនុស្សប្រុស និងមនុស្សស្រីក៏ជាចំណោតមួយដែរ។ រដ្ឋាភិបាលសង្ឃឹមថា នយោបាយដែលអនុញ្ញាតឲ្យគ្រួសារមួយអាចយកកូនពីរបាននឹងជួយទប់នឹងកំណើនមនុស្សចាស់ដ៏ឆាប់រហ័ស។ តែបញ្ហានៅត្រង់ថា មានគ្រួសារចិនភាគច្រើនហាក់ដូចជាមិនចង់បានកូនលើសពីមួយទេ ដោយមូលហេតុចំណាយផ្សេងៗ ដូចយ៉ាងចំណាយលើការសិក្សារបស់កូនជាដើម។
យ៉ាងណាក៏ដោយ ការប្រកាសបិទនយោបាយកូនទោលរបស់រដ្ឋាភិបាលពេលនេះ គឺជាដំណឹងល្អណាស់សម្រាប់គ្រួសារដែលចង់បានកូនពីរ។ គួររម្លឹកជូនឡើងវិញថា ច្បាប់ផែនការគ្រួសារកូនទោលដែលចិនបានអនុម័តក្នុងឆ្នំា ១៩៧៩ គឺដើម្បីងាយស្រួលគ្រប់គ្រងប្រជាពលរដ្ឋ និងដែលរដ្ឋាភិបាលធ្លាប់បានអះអាងថា នយោបាយកូនទោលនេះបានអនុញ្ញាតឲ្យចិនទទួលបានកំណើនសេដ្ឋកិច្ច ព្រមទំាងបានរារំាងកំណើតទារកចំនួន ៤០០លាននាក់ក្នុងរយៈពេលជាង ៤០ឆ្នំាចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ