ហ្វីលីពីន និងអាមេរិកបើកសមយុទ្ធក្នុងសមុទ្រចិនខាងត្បូង
នៅថ្ងៃចន្ទ ទី៤ មេសានេះ អាមេរិក និងហ្វីលីពីនបានផ្តើមសមយុទ្ធប្រចាំឆ្នាំរួមគ្នាដោយមានកម្លាំងទាហានចូលរួមប្រមាណជា ១០ ០០០នាក់។ អ្វីជាការកត់សម្គាល់ សមយុទ្ធនេះបានធ្វើឡើងនៅក្នុងដែនទឹកមួយភាគនៃសមុទ្រចិនខាងត្បូង ពោលក្បែរទីប្រជុំកោះដែលហ្វីលីពីន និងចិនកំពុងទាមទារជាអធិបតេយ្យភាពរៀងៗខ្លួន។ សមយុទ្ធនេះជាសក្ខីកម្មមួយបញ្ជាក់ថា ហ្វីលីពីនបានយកអាមេរិកធ្វើជាបង្អែកដើម្បីតទល់នឹងមហាយក្សចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
វាមិនមែនជារឿងភ្ញាក់ផ្អើលទេដែលហ្វីលីពីនយកអាមេរិកធ្វើជាខ្នងដើម្បីតទល់ជាមួយចិននៅក្នុងជម្លោះដណ្តើមទីប្រជុំកោះនៅក្នុងសមុទ្រចិនខាងត្បូង។ មិនភ្ញាក់ផ្អើល ព្រោះហ្វីលីពីនមានចំនួនទ័ព និងចំនួនសព្វាវុធតិចខ្លាំងណាស់ បើធៀបនឹងចិន។ ក្រៅពីពង្រឹងសម្ព័ន្ធភាពយោធាជាមួយសម្ព័ន្ធមិត្តអាមេរិក ហ្វីលីពីនក៏បានពង្រឹងសម្ព័ន្ធភាពយោធាជាមួយប្រទេសជប៉ុន និងអូស្រា្តលីដែរនារយៈពេលប៉ុន្មានឆ្នាំចុងក្រោយនេះ។ ជាមួយអាមេរិកក៏ដូចជាជាមួយជប៉ុន ឬមួយក៏អូស្រ្តាលី ហ្វីលីពីនបានទិញនាវាមុជទឹក និងយន្តហោះចម្បាំង។ ក្នុងខែមីនាកន្លងទៅថ្មីៗនេះ ហ្វីលីពីនថែមទាំងបានបើកមូលដ្ឋានយោធារបស់ខ្លួនចំនួន ៥កន្លែងឲ្យកម្លាំងទ័ពអាមេរិកាំងទៀតផង។
សមយុទ្ធរួមគ្នារវាងទ័ពអាមេរិក និងទ័ពហ្វីលីពីនថ្ងៃនេះនឹងអនុញ្ញាតឲ្យរដ្ឋាភិបាលក្រុងម៉ានីលផ្តើមដាក់ពង្រាយគ្រឿងសព្វាវុធថ្មីៗរបស់ខ្លួននៅក្បែរនឹងគ្រឿងសព្វាវុធរបស់អាមេរិក។ រដ្ឋអំណាចហ្វីលីពីនបានបញ្ជាក់ជាផ្លូវការថា សមយុទ្ធក្រោមទ្រង់ទ្រាយធំពេលនេះមិនមែនសំដៅព្រមាន ឬមួយក៏បន្លាចប្រទេសចិនទេ។ តែអ្វីជាការកត់សម្គាល់ សមយុទ្ធនេះបានធ្វើឡើងនៅផ្នែកមួយនៃកោះប៉ាឡាវ៉ានដែលស្ថិតមិនឆ្ងាយប៉ុន្មានពីទីប្រជុំកោះ Spratleys ដែលចិនបាន និងកំពុងទាមទារជាអធិបតេយ្យភាពរបស់ខ្លួន។
សូមជម្រាបជូនថានាសប្តាហ៍កន្លងទៅ អាមេរិកបានដឹកជញ្ជូនឡានទាហានជាច្រើនគ្រឿង ព្រមទាំងគ្រឿងសព្វាវុធធន់ធ្ងន់ជាច្រើនទៅកាន់ទឹកដីហ្វីលីពីន។ តែឯកអគ្គរដ្ឋទូតអាមេរិកប្រចាំហ្វីលីពីនមិនបានបញ្ជាក់លំអិតទេថា តើសម្ភារៈយោធា និងគ្រឿងសព្វាវុធទាំងអស់នោះនឹងប្រើសម្រាប់តែធ្វើសមយុទ្ធពេលនេះ ឬមួយក៏នឹងត្រូវស្ថិតជាអចិន្រ្តៃយ៍នៅលើមូលដ្ឋានយោធាហ្វីលីពីនដែលក្រុងម៉ានីលទើបបានបើកទ្វារឲ្យទ័ពអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ