បរិស្ថាន៖មន្រ្តីសង្ឃព្រះពុទ្ធសាសនាអំពាវនាវឲ្យមានកិច្ចព្រមព្រៀងស្តីពីបញ្ហាអាកាសធាតុ
នៅថ្ងៃសុក្រ ទី៣០ តុលានេះ មន្រ្តីសង្ឃព្រះពុទ្ធសាសនានៅទូទំាងពិភពលោក ក្នុងនោះមានប្រមុខសង្ឃទីបេដាឡៃ ឡាម៉ាផងបានអំពាវនាវឲ្យមានកិច្ចព្រមព្រៀងមួយស្តីពីការកាត់បន្ថយកំដៅនៅក្នុងភពផែនដី។ ការអំពាវនាវនេះបានធ្វើឡើង ចំពេលដែលសន្និសីទអន្តរជាតិស្តីពីបញ្ហាអាកាសធាតុត្រៀមបើកធ្វើនៅក្នុងទីក្រុងប៉ារីស ប្រទេសបារំាងនាដំណាច់ខែវិច្ឆិកាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ការអំពាវនាវរបស់មន្រ្តីសង្ឃព្រះពុទ្ធសាសនាត្រូវបានធ្វើឡើងនៅក្នុងសេចក្តីថ្លែងការណ៍រួមមួយចុះហត្ថលេខាដោយមន្រ្តីសង្ឃចំនួន ១៥អង្គដែលភាគច្រើនមកពីប្រទេសអាស៊ី ព្រមទំាងបារំាង និងអាមេរិក។ នៅក្នុងសេចក្តីថ្លែងការណ៍រួមដែលផ្ញើទៅកាន់ថ្នាក់ដឹកនំាក្នុងលោក មន្រ្តីសង្ឃបានសរសេររៀបរាប់ពីផលវិបាកនៃការឡើងកំដៅនៅក្នុងបរិយាសកាសដែលនំាឲ្យប៉ះពាល់ដល់ជីវិតសត្វលោក និងជីវិតធម្មជាតិគ្រប់ប្រភេទ។ សេចក្តីថ្លែងការណ៍ដដែលបានស្នើឲ្យមនុស្សជាតិទំាងអស់ត្រូវតែរួមសាមគ្គីគ្នាឡើងដើម្បីបុព្វហេតុបរិស្ថានដែលសព្វថ្ងៃកំពុងបំផ្លិចបំផ្លាញដោយសកម្មភាពរបស់មនុស្ស ដូចយ៉ាងការផលិតថាមពលដោយប្រើធ្យូងថ្ម និងកង្វះវិធានការក្នុងការទប់ស្កាត់ជាដើម។
ស្ថាប័នព្រះពុទ្ធសាសនាពិភពលោកស្តីពីការផ្លាស់ប្តូរអាកាសធាតុបានបញ្ជាក់ថា នេះជាលើកទី១ បង្អស់ដែលមានមន្រ្តីសង្ឃបាននំាគ្នាយកចិត្តទុកដាក់លើប្រធានរឿងពិភពលោកមួយដើម្បីនិយាយសម្លេងតែមួយដូចគ្នា។ មន្ត្រីសង្ឃហត្ថលេខីទំាង ១៥អង្គបានលើកឡើងពីជំនឿរបស់ព្រះពុទ្ធដែលថា អ្វីៗដែលមានជីវិតនៅក្នុងផែនដីយើងសព្វថ្ងៃនឹងត្រូវចំណុះឲ្យគ្នាទៅវិញមកដោយមិនអាចកាត់ផ្តាច់បានទេ និងថា ការយល់ពីផលវិបាកកើតចេញពីសកម្មភាពរបស់មនុស្សលោក គឺជារឿងសំខាន់ណាស់ដើម្បីកាត់បន្ថយផលវិបាកលើបរិស្ថាន។
មន្រ្តីសង្ឃព្រះពុទ្ធសាសនាក្នុងលោកបានអំពាវនាវឲ្យមានកិច្ចព្រមព្រៀងមួយស្តីពីបញ្ហាអាកាសធាតុនៅក្នុងឱកាសសន្និសីទអន្តរជាតិស្តីពីបញ្ហាអាកាសធាតុដែលតៀមរៀបចំនៅក្នុងទីក្រុងប៉ារីស ប្រទេសបារំាងនាចុងខាងវិច្ឆិកាខាងមុខ។ អ្វីដែលមន្រ្តីសង្ឃបានទទូចខ្លំាងនោះ គឺសុំឲ្យប្តូរពីម៉ូដែលសេដ្ឋកិច្ចដែលចំណុះឲ្យថាមពលធ្យូងថ្មទៅជាម៉ូដែលសេដ្ឋកិច្ចដែលចំណុះឲ្យថាមពលស្អាត ១០០% មិនចេះសាបសូន្យ។ ទន្ទឹមគ្នានេះ មន្រ្តីសង្ឃក៏បានអំពាវនាវឲ្យពិភពលោកចាត់វិធានការគ្រប់បែបយ៉ាងដោយធ្វើយ៉ាងណា កុំសីតុណ្ហភាពក្នុងភពផែនដីកើនលើសពី ១,៥អង្សារធៀបនឹងកម្រិតសីតុណ្ហភាពក្នុងសម័យមុនឧស្សាហកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ