ចិនចាត់វិធានការចាស់ដៃប្រឆំាងនឹងការជក់បារីនៅកន្លែងសាធារណៈ
ចាប់ពីថ្ងៃចន្ទ ទី១ មិថុនានេះតទៅ ពលរដ្ឋចិនដែលរស់នៅក្នុងទីក្រុងប៉េកំាងលែងមានសិទ្ធិជក់បារីនៅក្នុងភោជនីយដ្ឋាន ហាងកាហ្វេ កន្លែងធ្វើការ ព្រមទំាងទីកន្លែងសាធារណៈបិទជិតផ្សេងទៀត។ គួររម្លឹកជូនថា កាលពី ៤ឆ្នំាមុន រដ្ឋាភិបាលធ្លាប់បានដាក់ឲ្យអនុវត្តន៍ច្បាប់ស្រដៀងគ្នានេះម្តងហើយ តែការអនុវត្តន៍ជាក់ស្តែងមិនសូវជាទទួលបានលទ្ធផលប៉ុន្មានទេ។ តែជាមួយនឹងច្បាប់ថ្មីថ្ងៃនេះ រដ្ឋអំណាចបានចាត់វិធានការចាស់ដៃចំពោះអ្នកដែលមិនបានគោរពត្រឹមត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ចាប់ពីថ្ងៃទី១ មិថុនានេះតទៅ ប៉េកំាងនឹងក្លាយជាទីក្រុងសាកល្បងមុនគេនៅក្នុងយុទ្ធនាការប្រឆំាងនឹងការជក់បារីនៅកន្លែងសាធារណៈបិទជិត។ កម្មវត្ថុរបស់រដ្ឋអំណាចប៉េកំាង គឺចាប់បង្ខំឲ្យអ្នកជក់បារីប្តូរទម្លាប់របស់ខ្លួនដែលចង់ជក់បារីនៅកន្លែងណាក៏បាន និងនៅពេលណាក៏បាន ដោយគ្មានខ្លាចរអែង ឬបារម្ភពីផលប៉ះពាល់ដល់អ្នកមិនជក់បារីនោះទេ។ កាលពី ៤ឆ្នំាមុន ពោលតំាងពីថ្ងៃទី១ ឧសភា ឆ្នំា ២០១១ រដ្ឋាភិបាលចិនធ្លាប់បានចេញច្បាប់មួយហាមមិនឲ្យជក់បារីនៅកន្លែងសាធារណៈបិទជិត។ តែហាក់ដូចជាគ្មានប្រសិទ្ធិភាពសោះ ព្រោះជាទូទៅគេតែងសង្កេតឃើញថាក្នុងទីក្រុងប៉េកំាង នៅតែមានអ្នកជក់បារីនៅក្នុងភោជនីយដ្ឋាន នៅក្នុងហាងកាហ្វេ នៅក្នុងហាងលក់ទំនិញ នៅពេលជិតតាក់ស៊ី ឬមួយក៏នៅក្នុងជណ្តើរយន្តជាដើម។
ជាមួយនឹងការចូលជាធរមាននូវច្បាប់ថ្មីថ្ងៃនេះ ប៉េកំាងចង់ប្រែក្លាយជាទីក្រុងគំរូមួយនៅក្នុងយុទ្ធនាការប្រឆំាងនឹងថ្នំាជក់។ អ្នកដែលរំលោភបំពានច្បាប់នឹងទទួលការផាកពិន័យយ៉ាងចាស់ដៃ ពោលរហូតដល់ទៅជាង ១ ៥០០ដុល្លារសម្រាប់ម្ចាស់ភោជនីយដ្ឋាន ម្ចាស់ហាងកាហ្វេ ឬម្ចាស់ហាងលក់ទំនិញ និងជាង ៣០ដុល្លារសម្រាប់អ្នកជក់បារី។ ទន្ទឹមគ្នានេះ ចំពោះអ្នកដែលបានទទួលការផាកពិន័យចំនួន ៣ដង ឈ្មោះរបស់អ្នករំលោភបំពាននោះនឹងត្រូវចុះផ្សាយនៅលើគេហទំព័ររដ្ឋាភិបាលរយៈពេល ១ខែ។ មួយវិញទៀត ច្បាប់ថ្មីនេះក៏ហាមមិនឲ្យជក់បារីនៅទីធ្លាសាធារណៈមួយចំនួន ដូចជានៅក្នុងបរិវាណសាលារៀន មន្ទីរពេទ្យ ឬមួយកន្លែងហាត់កីឡា។ ម្យ៉ាងទៀត ច្បាប់ថ្មីក៏ហាមមិនឲ្យផ្សព្វផ្សាយពាណិជ្ជកម្មបារីនៅតាមផ្លូវសាធារណៈ ព្រមទំាងហាមមិនឲ្យមានកន្លែងលក់បារីនៅចម្ងាយតិចជាង ១០០ម៉ែត្រពីសាលាបឋមសិក្សា សាលាមត្តេយ្យ និងទារកដ្ឋាន។
សំណួរដែលកំពុងចោទពេលនេះគឺថា តើនឹងមានវិធានការត្រួតពិនិត្យនៃការអនុវត្តន៍ច្បាប់នោះ ឬអត់?។ គួររម្លឹកជូនថា ចិនដែលមានអ្នកមានជក់បារីប្រមាណជា ៣០០លាននាក់ បារីបានសម្លាប់មនុស្សម្នាក់នៅរៀងរាល់ ៣០វិនាទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ