បោះឆ្នោតថៃ៖ គណបក្សប្រឆាំង ចោទគណបក្សរបស់លោកប្រាយុទ្ធ ចាន់អូចាថា បានទិញសំឡេងឆ្នោត
នៅក្នុងប្រទេសថៃ គណបក្សប្រឆាំង បានដាក់ពាក្យបណ្តឹងទៅ គណៈកម្មាធិការ រៀបចំ បោះឆ្នោត នៅ ថ្ងៃសុក្រនេះ ដើម្បីប្តឹងគណបក្សរបស់របបសឹកថៃ នៅក្នុងបទទិញសន្លឹកឆ្នោត។ គណៈកម្មាធិការរៀបចំការបោះឆ្នោតរងការរិះគន់យ៉ាងខ្លាំងក្លា នៅក្នុងការពន្យារពេល ការប្រកាសលទ្ធផលបោះឆ្នោតសភា កាលពីថ្ងៃអាទិត្យទី២៤មីនាកន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
នៅក្នុងប្រទេសថៃ គណបក្សប្រឆាំងឈ្មោះ ”អណាខុតម៉ៃ (Future Forward) បានដាក់ពាក្យបណ្តឹងទៅ គណៈកម្មាធិការរៀបចំការបោះឆ្នោត នៅថ្ងៃសុក្រនេះ ដើម្បីប្តឹង គណបក្សរបស់របបសឹក ថៃ ឈ្មោះ” ផាឡាំងប្រាឆារ៉ាត់ ( Palang Pracharat) ពី បទទិញសំឡេងឆ្នោត តាមរយៈ ការផ្តល់ ជា អំណោយផ្សេងៗ និង លុយកាក់ ពី បណ្តាអ្នកទទួលខុសត្រូវ នៅក្នុងតំបន់ ដើម្បីឲ្យពួកគេ បោះឆ្នោត ឲ្យ បក្សរបស់លោកប្រាយុទ្ធចាន់អូចា។ ទង្វើរបស់បក្សផាឡាំងប្រាឆារ៉ាត់នេះ ត្រូវបានអ្នកនាំពាក្យរបស់គណបក្សប្រឆាំង “ អណាខុតម៉ៃ “ បរិហារ ថា ជាការធ្វើផ្ទុយនឹងច្បាប់ថៃ ពីព្រោះ ជាទង្វើដែល គេ អាចចាត់ទុក ដូច ជា ការទិញសំឡេងឆ្នោតដែរ។
គណបក្សប្រឆាំង អណាខុតម៉ៃ ដែលទើបនឹងបង្កើតថ្មីៗនេះ បានទទួលសំឡេងឆ្នោតគាំទ្រច្រើន នៅក្នុងលំដាប់ទី៣ ដោយបានសំឡេងឆ្នោតគាំទ្រ រហូតដល់៥លានសន្លឹក ពោលគឺបានច្រើនជាងគណបក្សដ៏ចំណាស់មួយនៅក្នុងប្រទេស គឺបក្សប្រជាធិបតេយ្យរបស់លោក អាភិស៊ីត ទៅទៀត ដែលស្ថិតនៅក្នុងលំដាប់ទី៤។ បក្ស អណាខុតម៉ៃ ដែលធ្វើឲ្យមតិសាធារណៈភា្ញក់ផ្អើលខ្លាំង នៅក្នុងការបោះឆ្នោតសភាលើកនេះ បានទាក់ទាញទឹកចិត្តអ្នកបោះឆ្នោតយុវវ័យយ៉ាងច្រើនសម្បើម។ ប្រធានរបស់បក្សមួយនេះ ហ៊ាន សំដែងការប្រឆាំងនឹងរបបសឹកយ៉ាងខ្លាំងក្លា តាមរយៈសុន្ទរកថារបស់ខ្លួន ដែលឆ្លុះបញ្ចាំងពីការបំភិតបំភ័យរបស់ពួកយោធាថៃ។
ចំណែកគណបក្សប្រឆាំងថៃដ៏ធំមួយឈ្មោះ Pheu Thai វិញ នៅក្នុងពាក្យបណ្តឹង បានអះអាងថា ក្រុមអ្នកសង្កេតការណ៍របស់ខ្លួន បានរកឃើញនូវកំហុសជាច្រើន នៅក្នុងការរើរាប់សន្លឹកឆ្នោត និង ភាពមិនត្រឹមត្រូវនៅក្នុងការប្រកាសលទ្ធផលឆ្នោត។
ជាសរុប ពាក្យបណ្តឹង មានចំនួនជាង ១៤០បណ្តឹង ដែលត្រូវបានដាក់ជូនដល់គណៈកម្មាធិការបោះឆ្នោត។ គណៈកម្មាធិការមួយនេះ បានទទួលស្គាល់ផងដែរ ថា មានកំហុសរបស់មនុស្ស នៅក្នុងការរើរាប់សន្លឹកឆ្នោត ដែលនាំឲ្យមានការខាតបង់សន្លឹកឆ្នោត រហូតដល់ ២ លានសន្លឹក នៅក្នុងចំណោមសន្លឹកឆ្នោតចំនួន ៣៧ លានសន្លឹក។
នៅក្រោយក្រុមអ្នកកាសែត រកឃើញនូវភាពមិនប្រក្រតីនៅក្នុងការប្រកាសលទ្ធផល- គណៈកម្មាធិការរៀបចំការបោះឆ្នោត ក៏បានសម្រេចចិត្ត ដកលទ្ធផលនៃការបោះឆ្នោត ចេញពី វិបសៃតិ៍របស់ខ្លួនវិញ ដោយពុំមានការពន្យល់អ្វីទាំងអស់។ ជិតមួយសប្តាហ៍មកហើយ បន្ទាប់ពីការបោះឆ្នោតសភានេះ គេនៅតែពុំទាន់ដឹងលទ្ធផលពេញលេញនៅឡើយទេ។
គណបក្សប្រឆាំងនៅក្នុងប្រទេសថៃ បាន អំពាវនាវ ឲ្យ មានបាតុកម្ម នៅរសៀលថ្ងៃអាទិត្យខាងមុខនេះនៅទីក្រុងបាងកក ដើម្បីទាមទារ ឲ្យគណៈកម្មការធិការរៀបចំការបោះឆ្នោត គោរពដល់សំឡេងឆ្នោតរបស់ពួកគេ។ ក្រុមគណបក្សប្រឆាំង ដែលបានរួមគ្នាបង្កើត រណសិរ្សប្រជាធិបតេយ្យ និងដឹកនាំដោយគណបក្ស ភឿថៃ និង អណាខុតម៉ៃ បានទាមទារ សិទ្ធ បង្កើតរដ្ឋាភិបាលមួយ ដូចគ្នានឹងការទាមទាររបស់គណបក្សផាឡាំង ប្រឆារ៉ាត របស់លោកប្រាយុទ្ធ ចាន់អូចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ