ចិនចេញប្រតិកម្មប្រឆាំងនឹងទស្សនកិច្ចរបស់នាយករដ្ឋមន្ត្រីឥណ្ឌានៅតំបន់ព្រំដែនជាប់ជម្លោះគ្នា
នៅថ្ងៃសៅរ៍នេះ ប្រទេសចិនបានបញ្ចេញប្រតិកម្មយ៉ាងខ្លាំង ប្រឆាំងនឹងដំណើរទស្សនកិច្ចរបស់នាយករដ្ឋមន្ត្រីឥណ្ឌា ណារិនដ្រា ម៉ូឌី ទៅកាន់រដ្ឋអរុណឆាប្រាដែស Arunachal Pradesh។ អរុណឆាប្រាដែស មានទីតាំងស្ថិតនៅជាប់ព្រំដែនចិន និងជាតំបន់ជាប់ជម្លោះដែលធ្លាប់បានរុញច្រានមហាអំណាចប្រចាំតំបន់ទាំងពីរធ្វើសង្គ្រាមនឹងគ្នាយ៉ាងសន្ធោសន្ធៅ នៅឆ្នាំ១៩៦២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
រដ្ឋាភិបាលចិន មិនដែលទទួលស្គាល់តំបន់ អរុណឆាប្រាដែស ជារបស់ឥណ្ឌាទេ ហើយប្រឆាំងដាច់ខាតរាល់គ្រប់វត្តមានរបស់ឥស្សរជនឥណ្ឌា នៅក្នុងទឹកដីប៉ែកខាងកើត នៃតំបន់ព្រំដែនឥណ្ឌាចិន។ នេះជាពាក្យដាស់តឿន ចែងនៅក្នុងសេចក្តីថ្លែងការណ៍របស់ក្រសួងការបរទេសចិន ដោយបញ្ជាក់ទៀតថា ឥណ្ឌាត្រូវតែចៀសវាងកុំប្រព្រឹត្តនិងធ្វើសកម្មភាពណាដែលប៉ះពាល់នាំឱ្យមានភាពតានតឹង និង ស្មុគស្មាញដល់បញ្ហាព្រំដែន។
ប្រតិកម្មរបស់ចិនបែបនេះធ្វើឡើងតែប៉ុន្មានក្រោយពីលោក ណារិនដ្រា ម៉ូឌី នាយករដ្ឋមន្ត្រីឥណ្ឌាបានអញ្ជើញទៅបំពេញទស្សនកិច្ចនៅក្នុងរដ្ឋ អរុណឆាប្រាដែស បានតែប៉ុន្មានម៉ោងតែប៉ុណ្ណោះ។
តំបន់អរុណឆាប្រាដែស បានក្លាយជាដែនដីរបស់ឥណ្ឌា នៅក្នុងសម័យអាណានិគមនិយមអង់គ្លេស ប៉ុន្តែចិនមិនសុខចិត្តឡើយ និងតែងទាមទារជារហូតមកថាជារបស់ខ្លួន។ រហូតមកទល់នឹងពេលនេះ ឥណ្ឌានិងចិន ពុំទាន់មានកិច្ចព្រមព្រៀងគ្នា ក្នុងការគូសបន្ទាប់ព្រំដែនខណ្ឌចែកប្រទេសទាំងនៅក្នុងតំបន់អរុណឆាប្រាដែសនេះឡើយ។
ជម្លោះដណ្តើមដីមួយចំរៀកនេះ បានរុញច្រានឱ្យឥណ្ឌានិងចិនផ្ទុះសង្គ្រាមនឹងគ្នាយ៉ាងសន្ធោសន្ធៅ កាលពីឆ្នាំ ១៩៦២។ ជាសង្គ្រាមតែមួយគត់រវាងចិននិងឥណ្ឌា។ ជាសង្គ្រាមដ៏ខ្លី រយៈពេល១ខែ តែមានការបង្ហូរឈាមយ៉ាងខ្លាំង និងជាបរាជ័យដ៏ជូរចត់សម្រាប់ឥណ្ឌា។ តែនៅទីបំផុត ក្រោយជម្លោះប្រដាប់អាវុធ ចិនបានដកកងទ័ពថយ ឯតំបន់អរុណឆាប្រាដែសក៏ស្ថិតនៅក្រោមគ្រប់គ្រងរដ្ឋបាលរបស់ឥណ្ឌា។ សង្គ្រាមនេះមិនបានប្រែក្រឡាសស្ថានភាពភូមិសាស្ត្រនយោបាយទេ ប៉ុន្តែជម្លោះព្រំដែន នៅតែជាប្រភពបន្តបំពុលទំនាក់ទំនងចិននិងឥណ្ឌាដែលបច្ចុប្បន្នបានក្លាយជាមហាអំណាចពិភពលោកដដែល។
មានព្រំដែនជាប់គ្នាប្រវែង ជាងពីរពាន់គីឡូម៉ែត្រ និងមានតំបន់ជាប់ជម្លោះដ៏តានតឹងខ្លាំងចំនួនពីរ (តំបន់កាស្មៀ និងតំបន់អរុណឆាប្រាដែស) មហាយក្សចិននិងឥណ្ឌា បានប្រឈមដាក់គ្នាខ្លាំងក្នុងបញ្ហាព្រំដែនម្តងទៀត កាលពីឆ្នាំ២០១៧ ដោយពេលនោះឥណ្ឌាបានបញ្ជូនកម្លាំងទាហានជាច្រើនទៅកាន់តំបន់ដុកឡាំនៃរដ្ឋអរុណឆាប្រាដែស ត្រប់ចំណុចភាគខាងលិចប្រទេសប៉ូតង់ ដើម្បីប្រឆាំងនឹងគម្រោងសាងសង់ផ្លូវយោធារបស់ចិន។ ភាពតានតឹងបានអូសបន្លាយអស់រយៈពេលជិតពីរខែ ទម្រាំប្រទេសទាំងពីរសុខចិត្តដកកម្លាំងទ័ពថយរៀងខ្លួនៗ។ ទំនាក់ទំនងទ្វេភាគី ទើបត្រូវបានសម្រួលនិងកម្តៅឡើងវិញបានបន្តិច នៅពេលប្រធានាធិបតីចិនលោកស៊ីជីនពីងបានទទួលស្វាគមន៍លោកម៉ូឌី នៅទីក្រុងប៉េកាំងកាលពីខែមេសាឆ្នាំ២០១៨កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ