កូរ៉េខាងជើង៖ អដ្ឋិធាតុទាហានអាមេរិកជាង៥០នាក់ត្រូវបានប្រគល់អោយដល់អាមេរិក
កូរ៉េខាងជើង បានចាត់ចែងប្រគល់អដ្ឋិធាតុទាហានអាមេរិកដែលស្លាប់ក្នុងជំនាន់សង្គ្រាមកូរ៉េ(១៩៥០-១៩៥៣) ឲ្យដល់អាមេរិកវិញ-នេះបើយោងតាមសេតវិមានប្រធានាធិបតីអាមេរិកនៅថ្ងៃព្រហស្បតិ៍នេះ។ ការប្រគល់អដ្ឋិធាតុទាហានអាមេរិកនេះ ត្រូវបានធ្វើឡើងក្រោយពីមានការព្រមព្រៀងគ្នារវាងលោកដូណាល់ ត្រាំនិងលោក គឹម ជុងអ៊ុន នៅឱកាសជំនួបកំពូលមួយរវាងឥស្សរជនទាំងពីររូបកាលពីថ្ងៃទី ១២មិថុនាកន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោក ដូណាល់ ត្រាំ ប្រធានាធិបតីអាមេរិក បានផ្ញើសារ Twitter មួយ នៅចុងរសៀលនេះ ជូនដល់លោក គឺម ជុនអ៊ុន ដើម្បី ថ្លែងអំណរគុណប្រមុខដឹកនាំកូរ៉េខាងជើងនៅក្នុងការប្រគល់ អដ្ឋិធាតុទាហានអាមេរិកជាង ៥០ នាក់ ដល់អាជ្ញាធរអាមេរិក។ ចំពោះលោកប្រធានាធិបតីត្រាំ ព្រឹត្តិការណ៍នេះ នឹងក្លាយទៅជាព្រឹត្តិការណ៍ដ៏សំខាន់ខ្លាំងមួយ សម្រាប់ក្រុមគ្រួសារអាមេរិកជាច្រើនគ្រួរ ក្រោយពី អស់រយៈពេលជាច្រើនឆ្នាំកន្លងមក។
នៅក្នុងសេចក្តីជូនដំណឹងមួយ “សេតវិមាន ធ្លាប់បានគូសបញ្ជាក់ពីពេលមុនថា” លោក គឺម ជុនអ៊ុន បានបំពេញនូវការសន្យាមួយរបស់ខ្លួនហើយដែលលោកបានធ្វើឡើងជាមួយប្រធានាធិបតីអាមេរិកនឹងការប្រគល់នូវអដ្ឋិធាតុទាហានអាមេរិកដែលបានបាត់បង់ជីវិតនៅក្នុងសង្គ្រាមកូរ៉េ។ សេតវិមានប្រធានាធិបតីដដែល បានសង្កត់ពាក្យបន្ថែមទៀតថា“សកម្មភាពរបស់កូរ៉េខាងជើងនេះ គឺជាការលើកទឹកចិត្ត និងក៏ជាថាមពលនៃការផ្លាស់ប្តូរមួយប្រកបដោយវិជ្ជមាន។
ស្របគ្នានេះ យន្តហោះដឹកជញ្ជូនរបស់កងទ័ពអាមេរិកមួយគ្រឿង បានធ្វើដំណើរទៅដល់ទីក្រុង Wonsan ភាគឥសាន្តនៃប្រទេសកូរ៉េខាងជើង ដើម្បីទៅដឹកជញ្ជូនសំណល់អដ្ឋិធាតុទាហានអាមេរិក យកមកកាន់ទីមូលដ្ឋានអាកាសចរណ៍អាមេរិកមួយនៅ Osan ក្នុងប្រទេសកូរ៉េខាងត្បូង-នេះបើយោងតាមវិមានប្រធានាធិបតីអាមេរិកដដែល។
កេសតូចៗចំនួន ៥៥កេស ដែលដាក់អដ្ឋិធាតុទាហានអាមេរិក ត្រូវបានគេលើកម្តងមួយៗយកទៅដាក់ក្នុងយន្តហោះផ្ទាល់របស់កងទ័ពអាមេរិក។ ហើយការរៀបចំពិធីបុណ្យមួយ ក៏នឹង ត្រូវ ចាត់ចែងធ្វើឡើងដែរនៅថ្ងៃពុធសប្តាហ៍ក្រោយ នៅឯ មូលដា្ននអាកាសចរណ៍ អាមេរិក នៅ Osan ក្នុងកូរ៉េខាងត្បូង។
គួរបញ្ចាក់ថា ការប្រគល់អដ្ឋិធាតុទាហានអាមេរិកនេះ ត្រូវបានប្រព្រឹត្តទៅចំថ្ងៃខួប៦៥ឆ្នាំនៃការបញ្ចប់សង្រ្គាមកូរ៉េ ក្នុងឆ្នាំ១៩៥៣។ ហើយការប្រគល់អដ្ឋិធាតុទាហានអាមេរិកនេះ ត្រូវបានទីក្រុង វ៉ាស៊ីនតោន ចាត់ទុកថា ជាកាយវិការមួយប្រកបដោយសុឆន្ទៈ របស់លោក គឹម ជុងអ៊ុន និងក៏ជាក្តីរំពឹងមួយដែរ ថា “ កិច្ចចរចានានា ស្តីពី ការរំសាយអាវុធនុយក្លេអ៊ែរ នៅឧបទ្វីបកូរ៉េ នឹង មានការរីកចំរើនទៅមុខ។
គួររំលឹកថា បើយោងតាមទិន្ន័យរបស់អាមេរិក ទាហានអាមេរិកចំនួន ៧ ៧០០នាក់ ជាផ្លូវការណ៍ នៅតែបាត់ខ្លួនជានិច្ច ក្នុងសង្គ្រាមកូរ៉េ។ រីឯអាជ្ញាធរកូរ៉េខាងជើងវិញ ក៏ធ្លាប់បានប្រាប់ក្នុងអតីតកាលដែរថា កូរ៉េខាងជើង នៅមានអដ្ឋិធាតុទាហានអាមេរិកប្រមាណជា ២០០នាក់-នេះបើយោងតាមក្រសួងការពារជាតិអាមេរិក le Pentagone ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ