Unicef៖ការអប់រំនៅអាហ្វហ្កានីស្ថានបានធ្លាក់ចុះជាលើកទី១ គិតតាំងពីឆ្នាំ ២០០២
នៅថ្ងៃអាទិត្យ ទី៣ មិថុនា អង្គការ Unicef បានចេញផ្សាយរបាយការណ៍មួយស្តីពីវិស័យអប់រំនៅក្នុងប្រទេសអាហ្វហ្កានីស្ថាន។ តាមរបាយការណ៍ មានក្មេងជិតពាក់កណ្តាល ពោលចំនួន ៣លាន ៧សែននាក់មិនបានទៅសាលារៀនទេ។ នេះជាតួលេខមួយដ៏អាក្រក់ខ្លាំងគិតតាំងពីឆ្នាំ ២០០២ និងតាំងពីការដួលរលំរបបតាលីបង់។ មូលហេតុនៃការថយចុះនៃវិស័យអប់រំត្រូវបាន Unicef ពន្យល់ពីស្ថានការណ៍សន្តិសុខ និងសេដ្ឋកិច្ចធ្លាក់ដុនដាប។
ចុះផ្សាយនៅថ្ងៃ៖
ស្តាប់ - ០២:០២
ផ្អែកតាមរបាយការណ៍របស់អង្គការ Unicef កុមារចំនួន ៣លាន ៧សែននាក់ដែលមិនបានចូលសាលារៀនមានអាយុចន្លោះពី ៧ ទៅ ១៧ឆ្នាំ និងដែលក្នុងនោះ មាន ៦០%ជាក្មេងស្រី។ តែមានតំបន់ខ្លះ ពិសេសតំបន់ដែលកំពុងមានវត្តមានពួកឧទ្ទាមតាលីបង់ច្រើន អត្រាចំនួនក្មេងស្រីដែលមិនបានទៅសាលាមានដល់ទៅជាង ៨៥%។ ក្រៅពីនោះ នៅមានតំបន់ដាច់ស្រយាលជាច្រើនដែលគ្រួសារមានការលំបាកផ្នែកសេដ្ឋកិច្ច និងទទួលការគំរាមផ្លាស់ប្តូរទីលំនៅដោយសារតែបញ្ហាអសន្តិសុខ។
របាយការណ៍របស់ Unicef បានលើកឡើងពីកត្តាសំខាន់ៗមួយចំនួនដែលបានរារាំងកូនក្មេងមិនឲ្យទៅសាលា ឬបង្ខំចិត្តបោះបង់សាលា រួមមាន កង្វះគ្រូបង្រៀន រចនាសម្ព័ន្ធសាលាមិនល្អ ការផ្លាស់ប្តូរទីលំនៅ ឬមួយការបង្ខំឲ្យរៀបការមុនអាយុជាដើម។ តាម Unicef មានហេតុផលសំខាន់ពីរដែលធ្វើឲ្យក្មេងស្រីមិនទៅសាលា ឬបង្ខំចិត្តបោះបង់សាលានៅពាក់កណ្តាលទី គឺជំនឿសាសនា និងការបង្ខំពីឳពុក ម្តាយឲ្យមានប្តីមុនអាយុ។ ទន្ទឹមគ្នានេះ Unicef ក៏បានលើកឡើងពីកង្វះការអប់រំរបស់ឳពុក ម្តាយ និងភាពក្រីក្រ។
អ្នកតំណាងអង្គការ Unicef នៅអាហ្វហ្កានីស្ថានបានបញ្ជាក់ថា អ្វីដែលកំពុងកើតមាននៅអាហ្វហ្កានីស្ថានសព្វថ្ងៃជារឿងដែលមិនអាចទទួលយកបានទេ។ តាមអ្នកតំណាងអង្គការ Unicef នៅអាហ្វហ្កានីស្ថានរូបនេះដដែល នៅពេលដែលក្មេងមិនស្ថិតក្នុងថ្នាក់រៀន ក្មេងនោះកំពុងប្រឈមនឹងគ្រោះហានិភ័យផ្សេងៗ ដូចយ៉ាងត្រូវគេយកទៅធ្វើអាជីវកម្មផ្លូវភេទ ឬមួយត្រូវក្រុមប្រដាប់អាវុធចាប់ឲ្យកាន់អាវុធ។
គួរជម្រាបជូនថាបច្ចុប្បន្ននៅអាហ្វហ្កានីស្ថាន ដែនដីចំនួន ២០% កំពុងស្ថិតក្រោមគ្រប់គ្រងរបស់ក្រុមបះបោរ ហើយមានតែ ៥៦% ប៉ុណ្ណោះដែលបានស្ថិតក្រោមការគ្រប់គ្រងរបស់រដ្ឋាភិបាលក្រុងកាប៊ូល។ ចំណែកដែនដីដែលនៅសេសសល់កំពុងបន្តក្លាយជាសមរភូមិនៃការប្រឈមមុខដាក់គ្នារវាងភាគីជម្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ