ក្រោយអាមេរិកដកខ្លួន អ៊ីរ៉ង់បញ្ជាក់ជាថ្មីពីក្តីរំពឹងក្នុងការស្រោចស្រង់កិច្ចព្រមព្រៀងនុយក្លេអ៊ែរឆ្នាំ ២០១៥
នៅថ្ងៃអាទិត្យ ទី១៣ ឧសភា លោកប្រធានាធិបតីអ៊ីរ៉ង់ហាសាន រ៉ូហានីបានបញ្ជាក់ជាថ្មីថា បើផលប្រយោជន៍របស់អ៊ីរ៉ង់ត្រូវបានការពារ នោះអ៊ីរ៉ង់អាចនឹងរក្សាទុកកិច្ចព្រមព្រៀងនុយក្លេអ៊ែរដែលបានចុះហត្ថលេខាក្នុងឆ្នាំ ២០១៥។ ការអះអាងជាថ្មីរបស់លោករ៉ូហានីបានធ្វើឡើង ក្នុងពេលដែលប្រមុខការទូតរបស់លោក គឺលោកម៉ូហាម៉ាត យ៉ាវ៉ាដ ហ្សារីស្វកំពុងស្វែងរកការគាំទ្រនៅបរទេសដើម្បីស្រោចស្រង់កិច្ចព្រមព្រៀងដែលអាមេរិកទើបបានដកខ្លួនចេញ។
ចុះផ្សាយនៅថ្ងៃ៖
ស្តាប់ - ០២:២៥
លោកប្រធានាធិបតីអ៊ីរ៉ង់រ៉ូហានីបានថ្លែងយ៉ាងដូចនេះនៅក្នុងកិច្ចសន្ទនាមួយជាមួយសមភាគីស្រីលង្កាលោកម៉ៃទ្រីប៉ាឡា ស៊ីរីសឺណា។ « ការដកខ្លួនរបស់អាមេរិកជាការរំលោភលើសីលធម៌ និងរបៀបធ្វើនយោបាយ និងការទូត ហើយក៏ជាការបំពានលើច្បាប់អន្តរជាតិ » នេះជាការបញ្ជាក់របស់លោករ៉ូហានី មុននឹងបន្ថែមច្បាស់ៗជាថ្មីម្តងទៀតថា ប្រសិនបើ ៥ភាគីហត្ថលេខីផ្សេងទៀតបន្តគោរពតាមកិច្ចព្រមព្រៀង និងអ៊ីរ៉ង់នៅបន្តទទួលបានផលប្រយោជន៍របស់ខ្លួន នោះអ៊ីរ៉ង់ក៏មិនដកខ្លួនចេញពីកិច្ចព្រមព្រៀងនោះដែរ។
ប្រតិកម្មជាថ្មីរបស់លោករ៉ូហានីពេលនេះបានធ្វើឡើង ចំពេលដែលប្រមុខការទូតរបស់លោក គឺលោកម៉ូហាម៉ាត យ៉ាវ៉ាដ ហ្សារីស្វកំពុងស្វែងរកការគាំទ្រនៅបរទេសដើម្បីស្រោចស្រង់កិច្ចព្រមព្រៀង ពិសេសពីប្រទេសចិន រុស្ស៊ី និងសហភាពអឺរ៉ុបដែលជាភាគីហត្ថលេខីលើកិច្ចព្រមព្រៀង។ « យើងសង្ឃឹមថា ទស្សនកិច្ចក្នុងប្រទេសចិន និងនៅប្រទេសផ្សេងពិតជាអនុញ្ញាតឲ្យយើងមើលឃើញកាន់តែច្បាស់ពីអនាគតកិច្ចព្រមព្រៀង » នេះជាការគូសបញ្ជាក់របស់លោកហ្សារីស្វនៅក្នុងជំនួបជាមួយសមភាគីចិនលោកវ៉ាង យីនាថ្ងៃអាទិត្យ ទី១៣ ឧសភា។
ចំណែកលោកវ៉ាង យីបានឆ្លើយតបវិញដោយមានសុទិដ្ឋិនិយមថា ទស្សនកិច្ចរបស់លោកហ្សារីស្វនៅគ្រប់ប្រទេសហត្ថលេខីពេលនេះនឹងជួយបង្កើនការយល់ដឹងកាន់តែច្បាស់របស់ប្រទេសនីមួយៗ រួមទាំងចិនផង ពីជំហររបស់ប្រទេសអ៊ីរ៉ង់ និងជួយឲ្យអ៊ីរ៉ង់ការពារផលប្រយោជន៍ស្របច្បាប់របស់ខ្លួន។ បន្ទាប់ពីចិន ប្រមុខការទូតអ៊ីរ៉ង់បន្តដំណើរទៅកាន់ប្រទេសរុស្ស៊ីក្នុងថ្ងៃចន្ទ ទី១៤ ឧសភានេះ រួចបន្តដំណើរទៅកាន់ទីស្នាក់ការអឺរ៉ុបក្នុងទីក្រុងព្រុចសែល ប្រទេសបែលហ្ស៊ិកនៅថ្ងៃអង្គារ ទី១៥ ឧសភា។
ដោយឡែកនៅក្នុងប្រទេសអ៊ីរ៉ង់ ប្រមុខឆ្មាំបដិវត្តន៍ឧត្តមសេនីយម៉ូហាម៉ាត អាលី យ៉ាហ្វារីបានព្រមានប្រឆាំងនឹងការប៉ុនប៉ងស្វែងរកអន្តរាគមន៍ពីបរទេសរបស់ថ្នាក់ដឹកនាំអ៊ីរ៉ង់ដើម្បីការពារសន្តិសុខអ៊ីរ៉ង់ បន្ទាប់ពីអាមេរិកបានដកខ្លួនចេញពីកិច្ចព្រមព្រៀង។ « គោលដៅរបស់អាមេរិកគឺបំបែកបំបាក់ការតស៊ូរបស់ពលរដ្ឋអ៊ីរ៉ង់ និងដែលទង្វើនេះមិនមែនជារឿងថ្មីទេ។ បញ្ហាមិនមែនស្ថិតលើទណ្ឌកម្មអាមេរិកលើអ៊ីរ៉ង់ទេ តែស្ថិតនៅត្រង់ថា មានថ្នាក់ដឹកនាំអ៊ីរ៉ង់ខ្លះបែរជាងាកទៅពឹងកម្លាំងបរទេសជាជាងលើកម្លាំងខ្លួនឯងទៅវិញ » នេះជាការបញ្ជាក់របស់ឧត្តមសេនីយអាលី យ៉ាហ្វារី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ