អង្គការពាណិជ្ជកម្មពិភពលោក OMC គាំទ្រជប៉ុននៅក្នុងជម្លោះជាមួយសេអ៊ូលស្តីពីការនាំចូលគ្រឿងសមុទ្រជប៉ុន
អង្គការពាណិជ្ចកម្មពិភពលោក OMC បាន អាកាត់ឲ្យជប៉ុនឈ្នះនៅក្នុងជម្លោះជាមួយកូរ៉េខាងត្បូង។ កូរ៉េខាងត្បូងដែលហាមមិនអោយផលិតផលគ្រឿងសមុទ្រជប៉ុនដែលនេសាទនៅតំបន់ភាគឥសាន្តប្រទេសជិតតំបន់ Fukushima ចូលមកក្នុងស្រុកខ្លួនទេ ដោយខ្លាចគ្រឿងសមុទ្រជប៉ុន មានផ្ទុកនូវសារធាតុវិទ្យុសកម្មនុយក្លេអ៊ែរ។ ទីក្រុងTokyo បានសម្តែងការអបអរសាទរនៅថ្ងៃសុក្រនេះចំពោះជំហររបស់អង្គការពាណិជ្ជកម្មពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
នៅក្នុងរបាយការណ៍មួយរបស់អង្គការពាណិជ្ជកម្មពិភពលោកដែលបានចេញផ្សាយនៅថ្ងៃព្រហស្បតិ៍ម្សិលមិញ បានអោយដឹងថា អង្គការពាណិជ្ជកម្មពិភពលោកដែលហៅកាត់ថា OMCបានសុំឲ្យកូរ៉េខាងត្បូង”ចាត់វិធានការនានារបស់ខ្លួនឲ្យបានសមស្របទៅតាមកាតព្វកិច្ចនៅក្នុងនាមជាសមាជិករបស់អង្គការពាណិជ្ជកម្មពិភពលោក។
គួររំលឹកថា ក្រៅពីការពង្រឹងលើការត្រួតពិនិត្យដ៏ម័តធ្យ័តខ្ពស់នៅលើផលិតផលម្ហូបអាហារមកពីប្រទេសជប៉ុន ទីក្រុងសេអ៊ូល ថែមទាំងបានហាមមិនអោយផលិតផលគ្រឿងសមុទ្រដែលមកពីតំបន់ជាច្រើនក្នុងប្រទេសជប៉ុនចូលមកក្នុងប្រទេសខ្លួនដែរ ក្រោយពីមានគ្រោះមហន្តរាយនុយក្លេអ៊ែរផ្ទុះនៅតំបន់Fukushimaកាលពីខែមីនាក្នុងឆ្នាំ២០១១មក។
ចំពោះវិធានការកម្រិតលើការដោះដូរពាណិជ្ជកម្មរបស់កូរ៉េខាងត្បូងនេះ ត្រូវបានអង្គការពាណិជ្ជកម្មពិភពលោកវិនិច្ឆ័យថា ជាមានភាពតឹងរ៉ឹងខ្លាំងជាងចាំបាច់។
នៅលើការវិនិច្ឆ័យរបស់អង្គការ OMC នេះ “ប្រទេសជប៉ុន បានសម្តែងការអបអរសាទរចំពោះសេចក្តីសម្រេចនានារបស់តុលាការពាណិជ្ជកម្មរបស់អង្គការ OMC ដែលមានជំហរយល់ស្របនឹងជំហររបស់ជប៉ុន-នេះជាប្រតិកម្មរបស់លោក Yoshihide Sugaអ្នកនាំពាក្យរបស់រដ្ឋាភិបាលជប៉ុននៅថ្ងៃសុក្រនេះ។
អ្នកនាំពាក្យរបស់រដ្ឋាភិបាលជប៉ុន ក៏បានថ្លែងបន្ថែមទៀតថា "ជប៉ុនសុំឲ្យកូរ៉េខាងត្បូង ធ្វើការកែតម្រូវដោយភាពស្មោះសរនិងដ៏ឆាប់រហ័សចំពោះវិធានការដ៏រឹតត្បឹតរបស់កូរ៉េខាងត្បូងនៅក្នុងការនាំចូលក្នុងស្រុក ពីព្រោះវាជាការរំលោភលើបទបញ្ញត្តិរបស់អង្គការពាណិជ្ជកម្មពិភពលោក OMC។
ជាបន្ទាន់ភ្លាមនោះ ទីក្រុងសេអ៊ូលវិញ បានជូនដំណឹងអំពីសេចក្តីសម្រេចចិត្តរបស់ខ្លួន ដើម្បីធ្វើការប្តឹងតវ៉ាឡើងវិញ ដើម្បីជាការការពារសុខភាពនិងសុវត្ថិភាពរបស់ប្រជាជនកូរ៉េខាងត្បូង-នេះបើយោងតាមការជូនដំណឹងមួយរបស់ក្រសួងពាណិជ្ជកម្មកូរ៉េខាងត្បូង។ មិនតែប៉ុណ្ណោះ កូរ៉េខាងត្បូងនឹងនៅតែរក្សាទុកដដែល“បំរាមលើការនាំចូលផលិតផលគ្រឿងសមុទ្រជប៉ុនមកក្នុងប្រទេសខ្លួន ហើយរដ្ឋាភិបាលកូរ៉េខាងត្បូងនឹងចាត់គ្រប់វិធានការដើម្បីធ្វើយ៉ាងណាកុំឲ្យប្រជាជនរបស់ខ្លួនទទួលទានម្ហូបអាហារដែលមានសារធាតុវិទ្យុសកម្ម។
គួររំលឹកថា កាលពីលើកមុន សេអ៊ូលបានពង្រឹងការហាមលើការនាំចូលផលិតផលគ្រឿងសមុទ្រមកពីតំបន់ភាគឥសានប្រទេសជប៉ុននៅជិតមជ្ឈមណ្ឌលនុយក្លេអែរហ្វូគីស្ហ៊ីម៉ាផងនិងដែលមកពីក្រុងធំៗចំនួន៧ផ្សេទៀត ដោយភ័យខ្លាចមានផ្ទុកសាធាតុវិទ្យុសកម្មនិងប៉ះពាល់ដល់សុខភាពប្រជាជនរបស់ខ្លួន។
វិធានការខាងលើរបស់កូរ៉េខាងត្បូងនេះ ត្រូវបានអ្នកនាំពាក្យរដ្ឋាភិបាលជប៉ុន លោក Yoshihide Suga ចាត់ទុកថាជាវិធានការដែលគ្មានមូលដ្ឋានវិទ្យសាស្ត្រនិងដែលផ្ទុយនឹងច្បាប់នៃការធ្វើពាណិជ្ជកម្មអន្តរជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ