កប៉ាល់ដឹកប្រេងរបស់អ៊ីរ៉ង់បានផ្ទុះឆេះ និងលិចទៅក្នុងសមុទ្រ នៅថ្ងៃអាទិត្យ
កប៉ាល់ដឹកប្រេងអ៊ីរ៉ង់ ដែលបានផ្ទុះឆេះ ដោយសារបុកជល់ជាមួយ កប៉ាល់ដឹកទំនិញរបស់ហុងកុង កាលពីថ្ងៃសៅរ៍ ទី៦មករា បានលិចចូលទៅក្នុងសមុទ្រ កាលពីថ្ងៃអាទិត្យ ម្សិលមិញ។ អាជ្ញាធរអ៊ីរ៉ង់ វិញ បានបញ្ជាក់ថា គេគ្មានសង្ឃឹមនឹងអាចរកឃើញ អ្នកដែលរួចរស់ជីវិត ពីគ្រោះថ្នាក់ផ្ទុះកប៉ាល់ដឹកប្រេងអ៊ីរ៉ង់ ទៀតនោះទេ។
ចុះផ្សាយនៅថ្ងៃ៖
បន្ទាប់ពីឆេះពេញមួយសប្តាហ៍ ដោយសារគ្រោះថ្នាក់ បុកជាមួយ កប៉ាល់ដឹកទំនិញចិន កប៉ាល់ដឹកប្រេងមកពីអ៊ីរ៉ង់ បានលិចជាស្ថាពរចូលទៅក្នុងទឹកសមុទ្រ។ នៅពាក់កណ្តាលថ្ងៃអាទិត្យ មុននឹងតួកប៉ាល់ទាំងមូលលិចចូលទៅក្នុងទឹក ភ្លើងបានឆាបឆេះ សន្ធោសន្ធៅកប៉ាល់ដឹកប្រេងអ៊ីរ៉ង់ និងបញ្ចេញផ្សែងពុល ក្រាស់ឃ្មឹក កំពស់ជិត ១ពាន់ម៉ែត្រ ទៅក្នុងអាកាស។ នេះបើតាមរដ្ឋបាលសាធារណៈខាងផ្នែកមហាសាគរ ដែលដកស្រង់ដោយទីភ្នាក់ងារព័ត៌មានចិនថ្មី។
នៅខាងភាគីអ៊ីរ៉ង់ អ្នកទទួលខុសត្រូវខាងផ្នែកជួយសង្រ្គោះបន្ទាន់បាននិយាយប្រាប់ទូរទស្សន៍រដ្ឋ អ៊ីរ៉ង់ថា គេលែងមានសង្ឃឹមថា នឹងអាចរកឃើញមនុស្សទាំង៣១នាក់ ដែលបានបាត់ខ្លួន នៅក្នុងហេតុការណ៍ផ្ទុះកប៉ាល់ កាលពីថ្ងៃសៅរ៍។ តាមអ្នកនាំពាក្យរបស់ក្រុមអ្នកជួយសង្រ្គោះអ៊ីរ៉ង់ ទោះបីជាមានការខ្នះខ្នែង បាញ់ពន្លត់ភ្លើង គេនៅតែមិនអាចចូលទៅជិតកប៉ាល់ ដែលផ្ទុះ និងរុំព័ទ្ធជិតដោយឧស្ម័នផ្សែងពុល។ នៅមុនបុកផ្ទុះជាមួយកប៉ាល់ទំនិញចិន កប៉ាល់Sanchi ដាក់ទង់ជាតិប៉ាណាម៉ា ប៉ុន្តែ ជាកម្មសិទ្ធិរបស់ក្រុមហ៊ុនដឹកប្រេងអ៊ីរ៉ង់ មានអ្នកបម្រើការ៣២នាក់ ដែលនៅក្នុងនោះ ៣០នាក់ជាជាតិអ៊ីរ៉ង់ និង២នាក់ ជាជាតិបង់ក្លាដែស។
សូមអាន៖គ្រោះមហន្តរាយធំៗ នៃការលេច ហៀរប្រេងនៅលើសមុទ្រ
តាមអ្នកកាសែតរបស់ទូរទស្សន៍រដ្ឋចិន ដែលបានធ្វើដំណើរតាមឧទ្ធម្ភាគចក្រជាមួយ អាជ្ញាធរផ្នែកសាគររបស់ចិន បានរៀបរាប់ពីការលេចអណ្តែតប្រេង ក្នុងទំហំ ក្រឡា ១០គីឡូម៉ែត្រការ៉េ។
មុននឹងផ្ទុះឆេះ នៅថ្ងៃសៅរ៍ កប៉ាល់Sanchi មានដឹកប្រេងឆៅ ១៣៦ ០០០តោនពីអ៊ីរ៉ង់ សំដៅប្រទេសកូរ៉េខាងត្បូង។ អ្នកការពារបរិស្ថានបារម្ភថា ហេតុការណ៍លេចអណ្តែតប្រេង ទៅលើទឹកសមុទ្រ នឹងបង្កឲ្យមានគ្រោះមហន្តរាយដ៏ធ្ងន់ធ្ងរ ដល់បរិស្ថាន និងជីវិតសត្វសមុទ្រ។ ប៉ុន្តែវិស្វករចិន ដែលដកស្រង់សំដីដោយទូរទស្សន៍រដ្ឋចិន CCTV បានបញ្ជាក់ថា ប្រេងលេចអណ្តែតចេញពីកប៉ាល់ Sanchiនឹងមិនប៉ះពាល់ខ្លាំងដល់បរិស្ថាននោះទេ ព្រោះថា វាជាប្រេងស្រាល ដែលហើរទៅក្នុងអាកាស និងមិនសូវប៉ះពាល់ខ្លាំងដល់ជីវិតក្នុងសមុទ្រ។ មួយវិញទៀត ការប៉ះពាល់ដល់មនុស្សក៏មានតិច ព្រោះថា កន្លែងដែលកប៉ាល់ដឹកប្រេងផ្ទុះលិច ស្ថិតនៅឆ្ងាយ ជាង៣០០គីឡូម៉ែត្រឯណោះពីកំពង់ផែសៀងហៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ