ចិន៖ផ្ទុះនៅទីក្រុងកំពង់ផែមួយបានបណ្តាលឲ្យស្លាប់មនុស្ស ២នាក់ និងរបួសជាច្រើននាក់
នៅក្នុងប្រទេសចិន ព្រឹត្តិការណ៍ផ្ទុះមួយនៅព្រឹកថ្ងៃអាទិត្យ ទី២៦ វិច្ឆិកានេះបានបណ្តាលឲ្យមានមនុស្សស្លាប់យ៉ាងតិច ២នាក់ របួសធ្ងន់ ២នាក់ និងរបួសស្រាលជាច្រើននាក់ទៀត។ ឧប្បត្តិហេតុនេះបានកើតមានឡើងនៅទីតាំងឧស្សាហកម្មមួយនៃទីក្រុងកំពង់ផែ Ningbo ស្ថិតក្នុងខេត្តហ្ស៊ីជាំងដែលមានចម្ងាយ ១០០គីឡូម៉ែត្រពីទីក្រុងសៀហៃ។ ក្រុមអ្នកជួយសង្រ្គោះកំពុងបន្តការងារយ៉ាងសកម្ម ហើយរដ្ឋអំណាចបានបើកការស៊ើបអង្កេតមួយដើម្បីរកមូលហេតុ។
ចុះផ្សាយនៅថ្ងៃ៖
ស្តាប់ - ០២:០៤
រហូតមកដល់ពេលនេះ ព័ត៌មាននៃការផ្ទុះដែលបណ្តាលឲ្យស្លាប់មនុស្ស និងរបួសនៅបន្តស្រពិចស្រពិល ពិសេសគេនៅមិនទាន់ដឹងច្បាស់ពីមូលហេតុនៃការផ្ទុះនោះ។ ព័ត៌មានផ្តល់ដោយសាក្សីដែលបានឃើញព្រឹត្តិការណ៍ផ្ទាល់ភ្នែកឲ្យដឹងថា ការផ្ទុះនោះមានកម្លាំង និងឥទ្ធិពលខ្លាំងរហូតធ្វើឲ្យបាក់រលំអាគារនៅក្បែរខាងស្ថិតក្បែរតំបន់រស់នៅរបស់ប្រជាជន បន្សល់ទុកប្រហោងធំៗនៅតាមជញ្ជាំងអាគារ បំផ្លាញរនាំងដែក និងកម្ទេសកញ្ចក់របស់ហាងទំនិញដែលស្ថិតចម្ងាយ ១គីឡូម៉ែត្រពីកន្លែងផ្ទុះ។
មានព័ត៌មានជាច្រើនបានអះអាងថា ការផ្ទុះនោះបានកើតមាននៅក្នុងទីតាំងរោងចក្រមួយនៃទីក្រុងកំពង់ផែ Ningbo ស្ថិតក្នុងខេត្តហ្ស៊ីជាំងដែលមានចម្ងាយ ១០០គីឡូម៉ែត្រពីទីក្រុងសៀហៃ។ តែរូបភាពបញ្ចាំងដោយទូរទស្សន៍រដ្ឋចិន CCTV មិនបាននិយាយពីទីកន្លែងផ្ទុះទេ តែបាននិយាយពីកម្លាំងផ្ទុះដែលបានកម្ទេចកញ្ចក់ និងបន្សល់ទុកប្រហោងធំនៅជញ្ជាំងអាគារស្ថិតក្បែរនោះ។ ទន្ទឹមគ្នានោះ ទូរទស្សន៍ CCTV ក៏បានបញ្ចាំងពីរូបភាពរថយន្តខ្ទេចខ្ទីរដោយកម្លាំងផ្ទុះ ផ្សែងហ៊ុយទ្រលោមទៅលើមេឃ និងកម្ទេចកម្ទីរបំណែកនៅជុំវិញកន្លែងផ្ទុះ។
តួលេខបណ្តោះអាសន្នចុងក្រោយផ្តល់ដោតអាជ្ញាធរស្រុកឲ្យដឹងថា មានមនុស្សស្លាប់ ២នាក់ របួសធ្ងន់ ២នាក់ និងរបួសស្រាល ១៦នាក់ដែលអ្នកខ្លះបានវិលត្រឡប់ទៅផ្ទះវិញហើយ។ ខណៈនេះ អាជ្ញាធរបានបើកការស៊ើបអង្កេតមួយដើម្បីស្វែងរកមូលហេតុនៃការផ្ទុះនោះ។ សូមជម្រាបជូនថានៅចិន ការផ្ទុះនៅតាមរោងចក្រ ឬទីតាំងឧស្សាហកម្មឧស្សាហ៍កើតមានញឹកញាប់ណាស់ដោយសារតែមានការធ្វេសប្រហែលផ្នែកសន្តិសុខ និងការត្រួតពិនិត្យ។
ជាក់ស្តែងក្នុងឆ្នាំ ២០១៦ មានការផ្ទុះបែកប្រព័ន្ធទឹកនៅក្នុងមជ្ឈមណ្ឌលអគ្គិសនីមួយបានបណ្តាលឲ្យស្លាប់មនុស្សយ៉ាងតិច ២១នាក់។ ក្នុងឆ្នាំ ២០១៥ មានព្រឹត្តិការណ៍ផ្ទុះដ៏ខ្លាំងក្លាមួយនៅទីតាំងរោងចក្រគីមីស្ថិតក្នុងតំបន់កំពង់ផែក្រុង Tianjin ដែលបានបណ្តាលឲ្យមានមនុស្សស្លាប់យ៉ាងតិច ១៦៥នាក់ និងខូចខាតទ្រព្យសម្បត្តិគិតជាលុយជាង ១ ០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ