វិបត្តិរ៉ូហ៊ីងយ៉ា ៖ អាល់កៃដាព្រមានភូមា លោកស្រីស៊ូជី លុបគម្រោងទៅមហាសន្និបាតអ.ស.ប.
វិបត្តិរ៉ូហ៊ីងយ៉ាកំពុងក្លាយជាជំងឺមហារីកផ្អើលពិភពលោកហើយឬ? លោកស្រីអ៊ុងសានស៊ូជី បានប្រកាសលុបចោលគម្រោងទៅចូលរួមមហាសន្និបាតអង្គការសហប្រជាជាតិ ខណៈដែលអង្គការសហប្រជាជាតិយល់ថាអំពើហិង្សាលើជនជាតិរ៉ូហ៊ីងយ៉ានៅភូមា ជាការបោសសម្អាតជាតិពិន្ធុ និងត្រូវបើកប្រជុំដោយបិទទ្វារនៅថ្ងៃពុធនេះ។ ហើយនៅថ្ងៃនេះដែរ បណ្តាញអាល់កៃដា បានធ្វើការព្រមានភូមាថានឹងទទួលសំណងជាទណ្ឌកម្មតបនឹងទង្វើរើសអើងបង្ក្រាបជនជាតិភាគតិចអ៊ីស្លាមនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បើតាមប្រភពវិបសៃត៍SITE ឯកទេសខាងតាមដានសកម្មភាពរបស់ពួកអ៊ីស្លាមជ្រុលនិយម អង្គការអាល់កៃដា បានចេញសេចក្តីអំពាវនាវឱ្យយុទ្ធជនជីហាតអ៊ីស្លាមបង់ក្លាដែស ឥណ្ឌា ប៉ាគីស្ថាន និងហ្វីលីពីន នាំគ្នាធ្វើដំណើរទៅភូមា ដើម្បីជួយជនជាតិរ៉ូហ៊ីងយ៉ា ដែលកំពុងរត់ភៀសខ្លួនទៅបង់ក្លាដែស ជាជំនួយកម្លាំង និងអាវុធ ព្រមទាំងការរៀបចំផែនការទប់ទល់នឹងការបង្ក្រាបរបស់រដ្ឋាភិបាលភូមាទៀត។ អាល់កៃដា បានធ្វើការព្រមានរដ្ឋាភិបាលភូមា ដោយចំៗ ថានឹងបានទទួលសំណងយ៉ាងសក្តិសម ចំពោះអ្វីដែលភូមាបានធ្វើបាបក្រុមជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម។
សម្រាប់រដ្ឋាភិបាលភូមា សេចក្តីប្រកាសនេះជាការបញ្ជាក់អំពីហេតុផលត្រឹមត្រូវនៃការក្តីព្រួយបារម្ភ និងចំណាត់ការរបស់ខ្លួន ក្នុងការប្រយុទ្ធប្រឆាំងនឹងភេរវកម្ម។ រដ្ឋាភិបាលភូមាក៏បានព្រមានអំពីគ្រោះជួបការវាយប្រហារភេរវកម្មថ្មីៗទៀត ប្រឆាំងនឹងផលប្រយោជន៍យោធានិងប៉ូលិស។
សូមបញ្ជាក់ថា ជនជាតិរ៉ូហ៊ីងយ៉ាប្រមាណជិត៤០ម៉ឺននាក់ នាំគ្នារត់ភៀសខ្លួនទៅបង់ក្លាដែស ទាំងត្រដាបត្រដួស ផ្អើលសហគមន៍អន្តរជាតិ គឺដើម្បីគេចពីប្រតិបត្តិការយោធារបស់កងកម្លាំងរដ្ឋាភិបាលភូមា តបទៅនឹងការវាយប្រហារលើទីស្នាក់ការនិងបន្ទាយប៉ូលិសព្រំដែន កាលពីថ្ងៃទី២៥សីហា ពីសំណាក់ពួកឧទ្ទាមអ៊ីស្លាមប្រដាប់អាវុធដើម្បីរ៉ូហ៊ីងយ៉ា។
ប៉ុន្តែទំហំនៃអំពើហិង្សា និងការរត់ភៀសខ្លួនរបស់ជនស៊ីវិលរ៉ូហ៊ីងយ៉ា មានសណ្ឋានដូចជាការបោសសម្អាតជាតិពិន្ធុ។ នេះបើពាក្យព្រលយរបស់ឧត្តមស្នងការសិទ្ធិមនុស្សអង្គការសហប្រជាជាតិ។ ឯចំណែកក្រុមប្រឹក្សាសន្តិសុខអង្គការសហប្រជាជាតិ ក៏ត្រូវបើកប្រជុំ ដោយបិទទ្វារ នៅថ្ងៃពុធនេះ ជាលើកទីពីរ ក្នុងចន្លោះពេលតែមួយសប្តាហ៍។
ភូមា-វិបត្តិរ៉ូហ៊ីងយ៉ា បានក្លាយជាប្រធានបទកាន់ផុសផុលឡើង ព្រោះនៅតែប៉ុន្មានថ្ងៃទៀត នឹងដល់ពេលបើកមហាសន្និបាតអង្គការសហប្រជាជាតិ ប៉ុន្តែលោកស្រីគំរូប្រជាធិបតេយ្យ អ៊ុងសានស៊ូជី ដែលរងការរិះគន់ខ្លាំងចំពោះចំណាត់ការវិបត្តិរ៉ូហ៊ីងយ៉ា បន្តគាំទ្រនយោបាយរបស់ពួកយោធា ដោយសុខចិត្តរក្សាភាពស្ងប់ស្ងាត់ទៀត និងដើម្បីគេចពីសម្ពាធអន្តរជាតិ លោកស្រីសុខចិត្តលុបចោលគម្រោងទៅអង្គការសហប្រជាជាតិ ដោយបញ្ជូនអនុប្រធានាធិបតីទីពីរទៅជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ