បារាំងអរិភាពនឹងការវិនិយោគរបស់ចិន នៅអឺរ៉ុប
ប្រធានក្រុមហ៊ុនប្រេងតូតាល់របស់បារាំង នៅថ្ងៃសុក្រម្សិលមិញ បានប្រកាសគាំទ្រ ជំហររបស់ប្រធានាធិបតីបារាំង ដែលចង់ឲ្យគេប្រុងប្រយ័ត្នច្រើនពីការវិនិយោគរបស់ចិន នៅក្នុងដែនសហភាពអឺរ៉ុប។ ប្រធានាធិបតី បារាំង លោកអេម៉ានុយអែលម៉ាក្រុងត្រូវបិទបញ្ចប់ទស្សនកិច្ច ២ថ្ងៃ នៅប្រទេសក្រិក សមាជិកមួយរបស់សហភាពអឺរ៉ុប ដែលសំបូរដោយវត្តមានក្រុមហ៊ុនវិនិយោគរបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងអំឡុងទស្សនកិច្ចនៅប្រទេសក្រិក ប្រធានាធិបតីបារាំង អំពាវនាវជាថ្មីឲ្យអឺរ៉ុបការពារ ការវិនិយោគជាយុទ្ធសាស្រ្តរបស់ប្រទេសសមាជិក។ លោកអេម៉ានុយអែល ម៉ាក្រុង ចង់ផងដែរឲ្យក្រិកបើកទ្វារទទួលការវិនិយោគអន្តរជាតិ ហើយអឺរ៉ុបត្រូវជួយឲ្យក្រិកឲ្យពេញដៃជើង។ តើប្រធានាធិបតីបារាំងកំពុងចង់មានន័យថា ក្រុមហ៊ុនអឺរ៉ុប ត្រូវមានអាទិភាពក្នុងការវិនិយោគនៅក្រិក? តើបារាំងកំពុងច្រណែនចិន?
ក្រិក ដែលបានស្គាល់វិបត្តិបំណុលរដ្ឋ អស់ជាច្រើនឆ្នាំ បានបើកទ្វារ ទទួលឲ្យក្រុមហ៊ុនចិនចូលទៅដាក់ទុនវិនិយោគ រាប់ពាន់លានដុល្លារ ទៅលើវិស័យហេដ្ឋារចនាសម្ព័ន្ធ ដែលរដ្ឋក្រិកត្រូវបង្ខំចិត្តធ្វើឯកជនភាវូបនីយកម្ម ដើម្បី សងប្រាក់បំណុលរដ្ឋ។ នៅឆ្នាំ ២០១៦ ក្រុមហ៊ុនចិនCosco ទើបបានចូលគ្រប់គ្រងវិនិយោគ កំពង់ផែក្រិក។
ថ្នាក់ដឹកនាំបារាំង មិនថា នៅផ្នែកនយោបាយ ឬសេដ្ឋកិច្ច មិនចង់ឃើញ សេដ្ឋកិច្ចក្រិក ធ្លាក់ក្នុងដៃ របស់ចិននោះទេ។“ក្រុមហ៊ុនចិនកំពុងលុកលុយអឺរ៉ុប ដូចដែលពួកគេបានធ្វើនៅអាហ្រ្វិក។ ចិនបានឃើញយ៉ាងច្បាស់ពីចំណុចខ្សោយដូចជាក្រិក ម៉ាសេដ្វាន់ និងប្រទេសតូចៗផ្សេងទៀតរបស់អឺរ៉ុប” នេះជាប្រសាសន៍របស់លោកPatrick Pouyanné ប្រធានក្រុមហ៊ុនប្រេងតូតាល់ ដែលចេញមុខគាំទ្រជំហររបស់ប្រធានាធិបតី បារាំង ដែលអរិភាព មិនទុកចិត្ត ការវិនិយោគរបស់ក្រុមហ៊ុនចិន នៅក្នុងទឹកដីអឺរ៉ុប។
នៅខែមិថុនាកន្លងទៅ លោកប្រធានាធិបតីបារាំង ម៉ាក្រុង ធ្លាប់បានអំពាវនាវសុំឲ្យគណៈកម្មការអឺរ៉ុបបង្កើតយន្តការពិសេសមួយ ដើម្បី ត្រួតពិនិត្យ រាល់ការវិនិយោគ ដែលធ្វើឡើងដោយប្រទេស ក្រៅសហភាពអឺរ៉ុប ជាពិសេស នៅក្នុងវិស័យវិនិយោគជាយុទ្ធសាស្រ្ត។ ប្រទេសនៅអឺរ៉ុបខាងលិច គាំទ្រគំនិតផ្តួចផ្តើមរបស់ប្រធានាធិបតី បារាំង ប៉ុន្តែ បណ្តាប្រទេសនៅភាគខាងកើត និងខាងត្បូងអឺរ៉ុប ដូចជាក្រិកជាដើម បដិសេធមិនឲ្យមានវិធានការ ដែលប្រឆាំងចិន។
សម្រាប់ប្រធានក្រុមហ៊ុនតូតាល់ ផ្ទុយពីក្រុមហ៊ុននៅអឺរ៉ុប ក្រុមហ៊ុនចិន ជាសម្បត្តិរបស់រដ្ឋចិន ដែលអាចចាក់លុយ គ្មានកំណត់ ដើម្បីការពារផលប្រយោជន៍វិនិយោគរបស់ក្រុមហ៊ុនចិន។ ប្រធានក្រុមហ៊ុនតូតាល់បានរិះគន់ផងដែរ ពីភាពមិនស្មោះត្រង់របស់ក្រុមហ៊ុនចិន នៅក្នុងការវិនិយោគលើឧស្សាកម្មផលិតកញ្ចក់ស្រូបពន្លឺព្រះអាទិត្យ ដែលជាដើមហេតុ ធ្វើឲ្យក្រុមហ៊ុនអឺរ៉ុប ចាញ់ប្រៀប ខាត រហូតត្រូវបិទទ្វារ។
នៅក្រិក ប្រធានក្រុមហ៊ុនតូតាល់ ស្ថិតក្នុងចំណោមថ្នាក់ដឹកនាំក្រុមហ៊ុនបារាំង ដែលអមដំណើរប្រធានាធិបតីបារាំង នៅប្រទេសក្រិក។ នៅក្រិក ក្រុមហ៊ុនតូតាល់កំពុងរង់ចាំភ្លើងខៀវរបស់សភាក្រិក ដែលនឹងសម្រេចថា តើនឹងអនុញ្ញាតឲ្យតូតាល់ វិនិយោគ លើការរុករកប្រេងនៅក្នុងសមុទ្រភាគខាងលិចក្រិកដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ