អាមេរិកចង់បង្កើនការល្បាតនៅក្នុងសមុទ្ទចិនខាងត្បូង
មន្ទីរបញ្ចកោណអាមេរិក ចង់បង្កើនការល្បាតនៅក្នុងសមុទ្ទចិនខាងត្បូង ឱ្យបានកាន់ញឹកញាប់ ក្នុងកំរិតពីរទៅបីដងក្នុងខែ។ សម្រាប់អាមេរិក ការបង្កើនសកម្មភាពល្បាត ជាធ្វើឡើងក្នុងកម្មវត្ថុតែមួយគត់ គឺធានាសេរីភាពនៃការធ្វើចរាចរណ៍ នៅក្នុងដែនទឹកដែលចិនជាប់ជម្លោះជាមួយបណ្តាប្រទេសជិតខាង។ នេះបើតាមកាសែត Wall Street Journal។
ចុះផ្សាយនៅថ្ងៃ៖
ស្តាប់ - ០១:៤១
កម្មវត្ថុរបស់រដ្ឋាភិបាលអាមេរិកថ្មី គឺត្រូវសម្របឥរិយាបថឱ្យបានសក្តិសមទៅនឹងមហិច្ឆតាវាតទីរបស់ចិន ជាជាងបន្តនយោបាយអាមេរិកចាស់បន្សល់ទុកដោយអតីតប្រធានាធិបតីបារ៉ាក់ អូបាម៉ា។ នេះបើតាមការពន្យល់ចុះផ្សាយដោយសារព័ត៌មានអាមេរិក Wall Street Journal។
ប៉ុន្តែអ្នកទទួលខុសត្រូវនៃក្រសួងការពារជាតិអាមេរិកបានបដិសេធមិនផ្តល់ព័ត៌មានលម្អិត ទាក់ទងនឹងពេលវេលា ព្រមទាំងទីកន្លែងច្បាស់លាស់ដែល កងល្បាតអាមេរិកត្រូវចេញធ្វើប្រតិបត្តិការឡើយ។ សារព័ត៌មានអាមេរិកដដែល បានត្រឹមគូសបញ្ជាក់ថា មេបញ្ជាការកងទ័ពអាមេរិកប្រចាំប៉ាស៊ីហ្វិក ប្រាថ្នាចង់បានប្រតិបត្តិការល្បាត ដើម្បីសេរីភាពនៃចរាចរណ៍ផ្លូវទឹក ចំនួនពីរ ឬបីដង ក្នុងមួយខែ ក្នុងរយៈពេលប៉ុន្មានខែខាងមុខនេះ។
ប្រតិបត្តិការល្បាត ត្រូវធ្វើឡើង ដោយកងនាវាចម្បាំងផងនិងដោយកងយន្តហោះប្រដេញទៀត។ នេះបើតាមការលម្អិតរបស់កាសែត។
សូមបញ្ជាក់ថា តាំងពីតែពីលោក ដូណាល់ ត្រាំ បានឡើងកាន់តំណែងជាប្រធានាធិបតីអាមេរិក កាលពីខែមករា២០១៧មក អាមេរិកបានអនុវត្តប្រតិបត្តិការល្បាតក្នុងសមុទ្ទចិនខាងត្បូង ចំនួនបីដងហើយ។ បេសកកម្មដើម្បីសេរីភាពផ្លូវទឹកលើកចុងក្រោយ បានការចូលរួមពី នាវាពិឃាត (នាវាចម្បាំង) USS John S. McCain។ នាវាដែលត្រូវរងគ្រោះ បុកទង្គិចជាមួយនឹងនាវាដឹកប្រេង ក្នុងច្រកសមុទ្ទសិង្ហបុរី កាលពីថ្ងៃទី ២១ សីហា រហូតបង្កឱ្យទាហានអាមេរិក១០នាក់ស្លាប់។
ហេតុការណ៍គ្រោះថ្នាក់នោះ ក៏បានជំរុញឱ្យចិនបញ្ចេញប្រតិកម្មប្រឆាំង ព្រោះនាវាអាមេរិកបានចូលទៅកៀកតំបន់កូនកោះ Mischief នៃតំបន់ប្រជុំកោះជាប់ជម្លោះស្ព្រាតលី ប្រមាណតែ៦មាយផង និងកៀកនាវាចម្បាំងចិន រហូតមានការស្រែកព្រមានគ្នាតាមមីក្រូផង។ ក្នុងសម័យដឹកនាំដោយលោកអូបាម៉ា អាមេរិកធ្លាប់បានធ្វើប្រតិបត្តិការបែបនេះចំនួនបួនដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ