អាស៊ីខាងត្បូងមួយភាគអាចក្លាយជាតំបន់លែងរស់នៅកើត នៅឆ្នាំ២១០០ ព្រោះកំដៅក្តៅហួសកម្រិត
សីតុណ្ហភាពក្តៅសើមហួសហេតុពេក អាចប៉ះពាល់តំបន់មួយភាគ នៅអាស៊ីខាងត្បូង នៅឆ្នាំ២១០០ចុងសតវត្សនេះតែម្តង។ នេះបើយោងតាមការសិក្សារបស់ក្រុមអ្នកស្រាវ ជ្រាវអាមេរិក ចុះផ្សាយនៅថ្ងៃពុធនេះ ក្នុងទស្សនាវដ្តី សាយអិន អាដវិនស៏ Science Advances។ បើគ្មានវិធានការកាត់បន្ថយឧស្ម័នផ្ទះកញ្ចក់ទេ តំបន់មួយភាគនៅអាស៊ីខាងត្បូង ដែលមានមនុស្ស១ភាគ៥ក្នុងពិភពលោករស់នៅ នឹងក្លាយជាតំបន់ដែលគេអាចលែងរស់នៅបានទៀតហើយ នៅចុងសតវត្សនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្រុមអ្នកស្រាវជ្រាវអាមេរិកនៅវិទ្យាស្ថានបច្ចេកវិទ្យាម៉ាសាឈូសេត Massachusetts Institut of Technology និងសកលវិទ្យាល័យ Loyola Marymount នៅLos Angeles បានចុះផ្សាយការសិក្សានៅថ្ងៃពុធនេះថា បើគ្មានវិធានការកាត់បន្ថយឧស្ម័នផ្ទះកញ្ចក់ ដើម្បីទប់ស្កាត់ការកើនសីតុណ្ហភាពនៃភពផែនដីទេ នោះឆ្នាំ២១០០ចុងសតវត្សនេះ កំដៅបែបសើមនឹងកើនឡើងខ្លាំង ធ្វើអោយតំបន់អាស៊ីខាងត្បូង១ភាគ លែងជាតំបន់ដែលគេរស់នៅបានតទៅទៀត។ កំដៅបែបសើមអាចនឹងកើនឡើង នៅរដូវក្តៅ ប៉ះពាល់ខ្លាំងដល់សុខភាពមនុស្ស។ តំបន់អាស៊ីខាងត្បូងមួយចំណែកដែលរងផលវិបាកខ្លាំងជាងគេនោះ មានភាគខាងជើងប្រទេសឥណ្ឌា បង់ក្លាដែស្ហ ភាគខាងត្បូងប៉ាគីស្ថាន។ តំបន់ទាំងនេះជាតំបន់ក្រីក្រ មានប្រជាជនរស់នៅ១៥០០លាននាក់។
នៅទីនោះ ប្រជាជនភ្ជួររាស់ដីច្រើនម៉ោង។ ពួកគេគ្មានផលិតផលក្រែមលាបស្បែក រឺផលិតផលអ្វី ដើម្បីការពារសុខភាពទេ។ កំដៅបែបសើមនេះ បើវាឡើងដល់៣៥អង្សារ វានឹងធ្វើអោយមនុស្សបែកញើស ពិបាកទ្រាំក្នុងខ្លួន។ សូម្បីតែកំដៅឡើងលើសពី៣១អង្សារតែបន្តិច ក៏ប៉ះពាល់សុខភាពមនុស្សយើងដែរ។
កាលពីឆ្នាំ២០១៥ ឥណ្ឌានិងប៉ាគីស្ថានបានរងផលអវិជ្ជមានដោយសារសីតុណ្ហភាពក្តៅខ្លាំងរួចមកហើយ។ កាលនោះ មានមនុស្ស៣៥០០នាក់ បានស្លាប់។ យោងតាមក្រុមអ្នកស្រាវជ្រាវអាមេរិក កំដៅក្តៅជ្រុលនេះ អាចនឹងកើតឡើងតែក្នុងប៉ុន្មានទសវត្សទៀតប៉ុណ្ណោះ វានឹងប៉ះពាល់ដល់តំបន់ដីមានជីជាតិនៅតាមស្ទឹងIndus និងទន្លេGange ដែលជាតំបន់កសិកម្មដ៏សំខាន់នៅឥណ្ឌា។ ភាគខាងកើតប្រទេសចិនដែលសំបូរមនុស្សរស់នៅ ក៏រងផលប៉ះពាល់ដូចគ្នាដែរ។
ទោះបីការសិក្សាបង្ហាញថា សីតុណ្ហភាពក្តៅហួសហេតុ អាចប៉ះពាល់តំបន់ឈូងសមុទ្រពែរស៍ជាងគេ នៅចុងសតវត្សនេះក្តី តំបន់រងផលប៉ះពាល់លំដាប់បន្ទាប់ពីនេះ គឺតំបន់ភាគខាងជើងឥណ្ឌា និងភាគខាងកើតប្រទេសចិន។ វិធានការចំពោះមុខ គឺត្រូវកាត់បន្ថយឧស្ម័នផ្ទះកញ្ចក់ ដើម្បីទប់ស្កាត់ការកើនសីតុណ្ហភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ