ថៃ៖លោកស្រីយីងឡាក់ចាត់ទុកខ្លួនឯងថា ជាអ្នករងគ្រោះក្នុងល្បែងនយោបាយ
ថ្ងៃអង្គារ១សីហានេះ អតីតនាយករដ្ឋមន្ត្រីថៃ យីងឡាក់ ស៊ីណាវ៉ាត់ បានចាត់ទុកខ្លួនឯងផ្ទាល់ថា ជាអ្នករងគ្រោះនយោបាយ។ លោកស្រីយីងឡាក់កំពុងប្រឈមនឹងការកាត់ទោសពីតុលាការ នៅចុងខែសីហានេះ ពីបទធ្វេសប្រហែសក្នុងកម្មវិធីឧបត្ថម្ភអង្ករជួយកសិករ កាលពេលលោកស្រីនៅកាន់អំណាច។ លោកស្រីអាចទទួលទោសអោយជាប់ពន្ធនាគារ១០ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
អតីតនាយករដ្ឋមន្ត្រីថៃ យីងឡាក់ ស៊ីណាវ៉ាត់ បានចាត់ទុកខ្លួនឯងថា ជាអ្នករងគ្រោះ ក្នុងល្បែងនយោបាយ។ លោកស្រីលើកឡើងថា លោកស្រីមិនដែលអនុញ្ញាតអោយមានអំពើពុករលួយទេ ហើយលោកស្រីក៏មិនធ្លាប់បានធ្វើអ្វីមិនល្អដែរ។ ថ្ងៃអង្គារនេះ សកម្មជនគាំទ្រលោកស្រីយីងឡាក់ រាប់រយនាក់បាននាំគ្នាតវ៉ានៅមុខតុលាការកំពូលក្រុងបាងកក សំដែងការគាំទ្រអោយលោកស្រីយីងឡាក់ឈ្នះក្តីក្តាំ នឹងអាចឡើងមកដឹកនាំប្រទេសដូចពីមុនវិញ។ ក្រុមបាតុករមិនបានខ្វល់នឹងបំរាមរបស់របបសឹក ដែលហាមការធ្វើបាតុកម្មនយោបាយទេ។ បំរាមនេះនៅតែមានជាធរមាន តាំងពីមានរដ្ឋប្រហារឆ្នាំ២០១៤ ទំលាក់លោកស្រីយីងឡាក់មក។
លោកស្រីយីងឡាក់កំពុងរងការចោទប្រកាន់ពីបទធ្វេសប្រហែសក្នុងកម្មវិធីឧបត្ថម្ភអង្ករជួយកសិករ ក្នុងពេលលោកស្រីកាន់អំណាច។ កម្មវិធីនយោបាយអង្ករនេះ ធ្វើអោយរដ្ឋថៃខាតបង់ថវិកាសន្ធឹកសន្ធាប់ ដោយសាររដ្ឋទិញអង្ករពីកសិករក្នុងតម្លៃខ្ពស់ជាងទីផ្សារ ហើយអង្ករត្រូវស្តុកទុកចោលមិនអាចលក់ចេញទៅក្រៅបាន។ នៅចុងខែសីហានេះ តុលាការថៃអាចនឹងកាត់ទោសអោយលោកស្រីជាប់ពន្ធនាគារ១០ឆ្នាំបាន។ ថ្ងៃអង្គារនេះ លោកស្រីសង្ឃឹមថា តុលាការអាចពិនិត្យសំណុំរឿងលោកស្រីដោយផ្អែកតាមហេតុការណ៍ និងស្ថានការណ៍នយោបាយ កាលពីពេលមុន មិនមែនលើស្ថានការណ៍នយោបាយសព្វថ្ងៃនេះទេ។
គ្រួសារត្រកូលស៊ីណាវ៉ាត់ដែលតែងទទួលជោគជ័យក្នុងការបោះឆ្នោត តាំងពីឆ្នាំ២០០១មក ក៏នៅតែមិនអាចគេចពីសំណាញ់ច្បាប់ថៃ។ បងប្រុសលោកស្រីយីងឡាក់ គឺលោកថាក់ស៊ីន ដែលធ្លាប់ធ្វើជានាយករដ្ឋមន្ត្រីដែរនោះ ត្រូវបានធ្លាក់ពីអំណាចកាលពីឆ្នាំ២០០៦ ដោយសាររដ្ឋប្រហារដែរ។ លោកថាក់ស៊ីនត្រូវតុលាការកាត់ក្តីអោយជាប់ ពន្ធនាគារ២ឆ្នាំ ពីបទពុករលួយ។ លោកកំពុងភៀសខ្លួននៅក្រៅប្រទេស។ ថ្ងៃពុធស្អែកនេះ តុលាការនឹងចេញសាលក្រមក្តីក្តាំ ទាក់ទងប្អូនថ្លៃរបស់លោកថាក់ស៊ីន គឺលោកសុំឆៃ វង់សាវ៉ាត់។ លោកវង់សាវ៉ាត់ ធ្លាប់ធ្វើជានាយករដ្ឋមន្ត្រីក្នុងរយៈពេលខ្លី ក្នុងឆ្នាំ២០០៨។ លោកអាចជាប់ពន្ធនាគារទាក់ទងនឹងការបង្ក្រាបហិង្សាទៅលើចលនាបាតុកម្មក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ