ឆ្នាំ២០១៧ បារាំងជាប់ចំណាត់ថ្នាក់លេខ១ ជាប្រទេសមានអំណាច “Soft Power”
ឆ្នាំ២០១៧នេះ បារាំងជាប់ចំណាត់ថ្នាក់លេខ១ ថាជាប្រទេសមានអំណាច“Soft Power” ពោលគឺប្រទេសដែលមានឥទ្ធិពលលើវិស័យសំខាន់ៗក្នុងពិភពលោក តែមិនរាប់បញ្ចូលវិស័យយោធាទេ។ អាមេរិកបានធ្លាក់លេខរៀងដល់លំដាប់ទី៣ អង់គ្លេសជាប់លំដាប់ប្រទេស“Soft Power” ទី២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ការសិក្សាដាក់ចំណាត់ថ្នាក់ប្រទេស“Soft Power” នេះ រៀបចំឡើងដោយមជ្ឈមណ្ឌលផ្នែកការទូតនៃសកលវិទ្យាល័យកាលីហ្វញ៉ាភាគខាងត្បូង និងដោយខទ្ទកាល័យផ្នែកប្រឹក្សាទំនាក់ទំនងទីក្រុង Portland នៅសហរដ្ឋអាមេរិក។ បារាំងបានជាប់ចំណាត់ថ្នាក់លេខ១ ថាជាប្រទេសមានអំណាច“Soft Power” អង់គ្លេសជាប់ចំណាត់ថ្នាក់លេខ២ សហរដ្ឋអាមេរិកជាប់ចំណាត់ថ្នាក់លេខ៣ អាល្លឺម៉ង់លេខ៤ ហើយចំណាត់ថ្នាក់លេខ៥បានទៅលើប្រទេសកាណាដា។
ប្រទេសដែលមានអំណាច“Soft Power” ជាប្រទេសដែលមានឥទ្ធិពលក្នុងវិស័យសំខាន់ៗក្នុងឆាកអន្តរជាតិ ដូចជាផ្នែកនយោបាយ សេដ្ឋកិច្ច វប្បធម៌ តែមិនរាប់បញ្ចូលវិស័យយោធាទេ។ ការសិក្សាដាក់ចំណាត់ថ្នាក់នេះ ក៏ផ្តោតផងដែរទៅលើទស្សនៈយល់ឃើញអន្តរជាតិចំពោះប្រទេសនោះ ចំពោះផ្នែកការទូត ប្រព័ន្ធព័ត៌មានវិទ្យា រឺក៏ការទទាក់ទទួលភ្ញៀវទេសចរបរទេសជាដើម។
បារាំងដែលមានចំណាត់ថ្នាក់លេខ៥ ឆ្នាំ២០១៦ បានឡើងមកដល់លេខ១នាំមុខគេវិញ សម្រាប់ឆ្នាំ២០១៧នេះ។ ការជាប់ឆ្នោតរបស់លោកអេម៉ានុយអែល ម៉ាក្រុង ជាប្រធានាធិបតីបារាំងវ័យក្មេង ៣៩ឆ្នាំ ជាអ្នកកណ្តាលនិយម ជាអ្នកគាំទ្រនយោបាយអឺរ៉ុប ធ្វើអោយបារាំងមានភាពស្វាហាប់ ធ្វើអោយបារាំងជាប្រទេស“Soft Power” នាំមុខគេ។ លោកម៉ាក្រុងជាប្រធានាធិបតីវ័យក្មេងបំផុត ក្នុងប្រវត្តិប្រធានាធិបតីបារាំង។ ប៉ុន្តែ មិនមែនមានតែចំណុចប្រធានាធិបតីនេះតែមួយមុខទេ។ បារាំងជាប់ចំណាត់ថ្នាក់ជាប្រទេស“Soft Power” ក៏ដោយសារបារាំងមានប្រវត្តិល្អផ្នែកបណ្តាញការទូតដែរ។ លើសពីនេះទៀត បារាំងជាប្រទេសទេសចរទី១ក្នុងពិភពលោក។ ឆ្នាំ២០១៦កន្លងទៅ អ្នកទេសចរមកទស្សនានៅបារាំងមានចំនួនរហូត៨២លាន៥សែននាក់ បើទោះបារាំងជាប្រទេសដែលរងការគំរាមកំហែងភេរវកម្មក្តី។
សហរដ្ឋអាមេរិកបានធ្លាក់ពីចំណាត់ថ្នាក់ជាប្រទេសមានឥទ្ធិពលលេខ១ មកដល់លេខ៣ ឆ្នាំ២០១៧នេះ ដោយសារការឡើងកាន់អំណាចរបស់លោកដូណាល់ ត្រាំ។ លោកត្រាំ ប្រកាន់ជំហរគិតផលប្រយោជន៍ជាតិអាមេរិកមុនគេ ម្ល៉ោះហើយទើបរុញសហរដ្ឋអាមេរិកអោយធ្លាក់ចំណាត់ថ្នាក់បែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ