អាជ្ញាធររុស្ស៊ីបិទកម្មវិធីផ្ញើសារWeChat របស់ចិន
ក្រុមហ៊ុនអ៊ីនធ័រនែតចិន Tencent បានសំដែងការសោកស្តាយ នៅថ្ងៃសៅរ៍នេះ ចំពោះការដែលអាជ្ញាធររុស្ស៊ីបិទដំណើរការកម្មវិធីផ្ញើសារWeChat ចិន ក្នុងទឹកដីរុស្ស៊ី។ រុស្ស៊ីពន្យល់ថា ក្រុមហ៊ុនអ៊ីនធ័រនែតចិនមិនបានចុះបញ្ជីតាម ក្រឹតក្រមដែលតំរូវដោយរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ហេតុការណ៍អាជ្ញាធររុស្ស៊ីបិទកម្មវិធីផ្ញើសារWeChat របស់ចិន ក្នុងទឹកដីរុស្ស៊ី កើតឡើងចំពេលរុស្ស៊ីកំពុងរឹតបន្តឹងការត្រួតពិនិត្យតាមអ៊ីនធ័រណែត។ រុស្ស៊ីពន្យល់ទៅក្រុមហ៊ុនអ៊ីនធ័រណែតចិនថា បិទកម្មវិធីផ្ញើសារ WeChat របស់ចិន គឺដោយសារក្រុមហ៊ុនអ៊ីនធ័រនែតចិន Tencent មិនបានផ្ញើព័ត៌មានចាំបាច់ ដើម្បីចុះបញ្ជីស្របតាមច្បាប់រុស្ស៊ី។ ប៉ុន្តែ ក្រុមហ៊ុន Tencent ប្រាប់ថា មិនបានយល់ឃើញខ្លឹមសារច្បាប់រុស្ស៊ី ដូចដែលរុស្ស៊ីប្រាប់ដូច្នេះទេ។ ក្រុមហ៊ុនចិនប្រាប់ទៀតថា បានទាក់ទងអាជ្ញាធររុស្ស៊ីដែរ។
គិតដល់ចុងឆ្នាំ២០១៦ កម្មវិធីផ្ញើសារWeChatរបស់ក្រុមហ៊ុនអ៊ីនធ័រណែតចិន Tencent មានអ្នកប្រើប្រាស់៨៨៩លាននាក់។ តាមរយៈកម្មវិធី WeChat គេអាចផ្ញើសារជាអត្ថបទ រឺសម្លេង គេអាចចែករំលែករូបថត និងរូបភាពវីដេអូ ដូចហ្វេសប៊ុកដែរ។ អ្នកប្រើប្រាស់ WeChat ក៏អាចលេងហ្គេម ទិញឥវ៉ាន់ រឺបង់ថ្លៃតាក់ស៊ី តាមរយៈប្រព័ន្ធអេឡិចត្រូនិកដែលភ្ជាប់ជាមួយកម្មវិធី WeChatដែរ។ គេមិនដឹងថា តើអ្នកប្រើប្រាស់កម្មវិធីផ្ញើសារ WeChat នៅរុស្ស៊ីមានប៉ុន្មាននាក់អោយពិតប្រាកដទេ ប៉ុន្តែ អ្នកប្រើប្រាស់ WeChatភាគច្រើន ជាអ្នករស់នៅក្នុងទឹកដីចិន។ ក្រុមហ៊ុនចិន Tencent វិញក៏មិនបានប្រឹងប្រែងធ្វើអោយកម្មវិធីWeChatរបស់ខ្លួន មានប្រជាប្រិយភាពដែរ។
WeChat មិនមែនទើបតែជាបណ្តាញសង្គមទី១ដែលរុស្ស៊ីបិទដំណើរការទេ។ កន្លងមក រុស្ស៊ីបានបិទបណ្តាញLinkedln រួចមកហើយ។ ប៉ុន្មានឆ្នាំចុងក្រោយនេះ រុស្ស៊ីបានរឹតបន្តឹងការត្រួតពិនិត្យតាមអ៊ីនធ័រណែត។ ចាប់ពីខែកញ្ញាឆ្នាំ២០១៥មក ច្បាប់ចម្រូងចម្រាសរុស្ស៊ី តំរូវអោយបណ្តាញសង្គម សេវាផ្ញើសារ សេវាស្វែងរកផ្សេងៗទាំងរបស់រុស្ស៊ី ទាំងរបស់បរទេស អោយស្តុកទុកទិន្នន័យព័ត៌មានផ្ទាល់ខ្លួនរបស់អ្នកប្រើប្រាស់ជាជនជាតិរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ