ហុងកុងរៀបចំបោះឆ្នោតជ្រើសរើសប្រមុខដឹកនាំថ្មី
ការបោះឆ្នោតជ្រើសរើសថ្នាក់ដឹកនាំហុងកុង ថ្មីបានចាប់ផ្តើមបើកធ្វើ នៅព្រឹកថ្ងៃអាទិត្យទី ២៦ មីនានេះ។ ប្រមុខរដ្ឋាភិបាលថ្មីរបស់ហុងកុងនឹងមិនចេញមកពីការបោះឆ្នោតសកលរបស់ប្រជាជននោះតេ ប៉ុន្តែ ដូចទម្លាប់មុនៗ ប្រមុខដឹកនាំហុងកុង នឹងត្រូវបោះឆ្នោត ជ្រើសរើសដោយគណៈកម្មាធិការមួយ ដែលមានសមាជិក ១១៩៤ រូប។ នៅថ្ងៃសៅរ៍ នៅមួយថ្ងៃមុនគេរៀបចំការបោះឆ្នោត ប្រជាជនហុងកុង ដើម្បីប្រជាធិបតេយ្យបានដង្ហែរក្បួនធ្វើបាតុកម្មប្រឆាំងទីក្រុងប៉េកាំង ដែលពួកគេចោទថា បានលូកដៃ ក្នុងកិច្ចការបោះឆ្នោតហុងកុង ដើម្បីប្រយោជន៍ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
“ត្រូវប្រឆាំងដាច់ខាត បេក្ខជនដែលជ្រើសតាំងដោយទីក្រុងប៉េកាំង។ យើងត្រូវតែជ្រើសរើសថ្នាក់ដឹកនាំរបស់យើង ដោយខ្លួនយើងផ្ទាល់” នេះជាពាក្យដែលគេឃើញសរសេរនៅលើបដារបស់បាតុករហុងកុង ដែលដកស្រង់ដោយអ្នកកាសែតរបស់ទីភ្នាក់ងារព័ត៌មានបារាំង AFP។ នៅថ្ងៃសៅរ៍ សកម្មជន និងអ្នកគាំទ្ររាប់រយនាក់ បានចុះថ្នល់ធ្វើបាតុកម្ម ជាមួយនឹងឆ័ត្រពណ៌លឿង ដែលជានិមិត្តរូបនៃចលនាទាមទារប្រជាធិបតេយ្យនៅហុងកុង។
បាតុកម្មធ្វើឡើងនៅមួយថ្ងៃមុនដែលការិយាល័យបោះឆ្នោតបើកទ្វារនៅទីក្រុងហុងកុង។ ដោយសារបាតុករមានគម្រោងបន្តធ្វើបាតុកម្ម នៅថ្ងៃបោះឆ្នោត អាជ្ញាធរគ្រោងនឹងពង្រាយប៉ូលិសហុងកុង ចំនួន ១៨០០នាក់ដើម្បីធានាសន្តិសុខនៅហុងកុង។ ចំនួនប៉ូលិសនៅតាមដងផ្លូវ នឹងមានច្រើនជាងអ្នកទៅបោះឆ្នោត។ នៅ ហុងកុង មានប្រជាជនសរុបជាង ៧លាននាក់ ប៉ុន្តែ មានមនុស្សប្រមាណតែជិត ១២០០នាក់តែប៉ុណ្ណោះ ដែលមានសិទ្ធិទៅបោះឆ្នោតជ្រើសរើសប្រមុខរដ្ឋាភិបាលហុងកុងថ្មី។ អ្នកទៅបោះឆ្នោត ទាំងនោះ គឺ ជាសមាជិករបស់គណៈកម្មាធិការបោះឆ្នោត ដែលពីរ ភាគបី មាននិន្នាការគាំទ្រក្រុងប៉េកាំង។
បេក្ខជនបីរូបឈរឈ្មោះសម្រាប់ការបោះឆ្នោតជ្រើសរើសថ្នាក់ដឹកនាំហុងកុង។ ប៉ុន្តែ មានតែពីរូប ដែលលេចធ្លោជាងគេ។ ទី ១គឺលោកស្រី Lam Carrie អតីតប្រធានលេខា ឬមនុស្សសំខាន់ទី ២ របស់រដ្ឋាភិបាល ចាស់។ លោកស្រីLamត្រូវបានប្រជាជនហុងកុងច្រើនមិនពេញចិត្ត ដោយសារតែជំហរ ចេញមុខ របស់លោកស្រី គាំទ្រនយោបាយក្រុងប៉េកាំង។ គេជឿថា លោកស្រីLam នឹងអាចឈ្នះឆ្នោតលើកនេះ ព្រោះរដ្ឋអំណាចចិនបានដាក់សម្ពាធលើសមាជិកជាច្រើនរបស់គណៈកម្មាធិការ ឲ្យបោះឆ្នោតគាំទ្រលោកស្រី។
ចំណែកបេក្ខជនទី ២ គឺលោកJonh Tsang ដែលមិនសូវទោរទន់ខ្លាំងទៅរកចិនដីគោក និងដែលបានទទួលសំឡេងគាំទ្រច្រើនពីប្រជាជនហុងកុង និងពីក្រុមដើម្បីប្រជាធិបតេយ្យ។ ក្រុមនេះ បានប្រកាសរួចហើយថា នឹងរក្សាសំឡេងជាង ៣០០របស់ខ្លួន នៅក្នុងគណៈកម្មាធិការបោះឆ្នោត សម្រាប់លោក Jonh Tsangតែម្នាក់ឯង។ សូមបញ្ជាក់ថា ដើម្បីអាចជាប់ឆ្នោត ដឹកនាំក្រុងហុងកុង គេត្រូវការសំឡេងគាំទ្រយ៉ាងតិចបំផុត ចំនួន ៦០១សំឡេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ