សេអ៊ូលនិងតូក្យូនឹងចែករំលែកគ្នានូវព័ត៌មានសម្ងាត់នៅក្នុងបញ្ហាកូរ៉េខាងជើង
ប្រទេសជប៉ុននិងកូរ៉េខាងត្បូង នៅថ្ងៃពុធនេះ បានចុះហត្ថលេខាលើកិច្ចព្រមព្រៀងមួយក្នុងការចែករំលែកព័ត៌មានសម្ងាត់រវាងគ្នា ពាក់ព័ន្ធបញ្ហាកូរ៉េខាងជើង។ កិច្ចព្រមព្រៀងទ្វេភាគីនេះ បានធ្វើឲ្យប្រជាជនកូរ៉េខាងត្បូងមួយផ្នែក ធ្វើការប្រឆាំង ដោយសារតែ ប្រជាជនកូរ៉េខាងត្បូងមួយផ្នែកធ្លាប់មានអតីតកាលដ៏ជូរចត់ជាមួយជប៉ុននៅក្នុងជម្លោះប្រវត្តិសាស្ត្រ។
ចុះផ្សាយនៅថ្ងៃ៖
ស្តាប់ - ០១:៥៧
ក្រសួងការពារជាតិកូរ៉េខាងត្បូង បានវាយតម្លៃថា”ជាកិច្ចព្រមព្រៀងចាំបាច់មួយរវាងប្រទេសជិតខាងទាំងពីរ ដោយសារតែការគំរាមកំហែងផ្នែកយោធារបស់ព្យុងយ៉ាង។ដោយកន្លងមក ព្យុងយ៉ាង បានសាកល្បងនុយក្លេអ៊ែរចំនួនពីរលើកនៅឆ្នាំនេះនិងការបាញ់គ្រាប់មីស៊ីលចំនួន២០គ្រាប់។
នៅក្នុងសេចក្តីជូនដំណឹងមួយរបស់ខ្លួន “សេអ៊ូល បានព្រមានប្រាប់ថា “កូរ៉េខាងជើង បានត្រៀមជាស្រេចដើម្បីសាកល្បងនុយក្លេអ៊ែរឬក៏ធ្វើការបាញ់គ្រាប់មីស៊ីលថ្មីៗទៀត។
ហេតុនេះហើយ បានជាកូរ៉េខាងត្បូងត្រូវតែពង្រឹងលើផ្នែកសន្តិសុខជាតិខ្លួនឲ្យបានខ្លាំងថែមទៀត ដោយសហប្រតិបត្តិការរួមគ្នាជាមួយជប៉ុននៅក្នុងការចែករំលែកព័ត៌មានសម្ងាត់រវាងគ្នាទៅវិញទៅមក ដើម្បីប្រឈមទល់នឹងការគំរាមកំហែងផ្នែកយោធាកូរ៉េខាងជើងដែលកាន់តែកើនឡើងជាលំដាប់។
ក៏ប៉ុន្តែកិច្ចព្រមព្រៀងទ្វេភាគីជប៉ុននិងកូរ៉េខាងត្បូងនេះ ពុំបានធ្វើឲ្យមតិសាធារណៈនៅកូរ៉េខាងត្បូង មានការយល់ស្របគ្នាទាំងស្រុងនោះទេ ដោយសារតែប្រជាជនកូរ៉េខាងត្បូងកាលពីជំនាន់អាណានិគមជប៉ុននៅឆ្នាំ១៩១០-១៩៤៥ ធ្លាប់បានទទួលរងការអាម៉ាសយ៉ាងល្វីងជូរចត់ក្នុងអតីតកាលដែលជប៉ុនខ្លួនឯង ពុំដែលធ្វើការសុំទោសប្រជាជនកូរ៉េខាងត្បូងអោយបានសមរម្យឡើយនៅក្នុងជម្លោះប្រវត្តិសាស្រ្តនោះ។
រីឯ គណបក្សប្រឆាំងដ៏សំខាន់មួយនៅកូរ៉េខាងត្បូង បានសំដែងការប្រឆាំងយ៉ាងខ្លាំងក្លានិងចាត់ទុកកិច្ចព្រមព្រៀងនេះ ថា”ជាការក្បថជាតិនិងជាការអាម៉ាសមុខ”។
នៅជប៉ុនវិញ រដ្ឋមន្ត្រីក្រសួងការបរទេសលោកFumio Kishida បានប្រកាសថា”កិច្ចសហប្រតិបត្តិការរវាងជប៉ុននិងកូរ៉េខាងត្បូង កាន់តែមានសារៈសំខាន់ខ្លាំងឡើងៗជាងពេលណាៗទាំងអស់នៅលើវិស័យការពារសន្តិសុខជាតិនៅក្នុងកាលទសៈមួយដែលនុយក្លេអ៊ែរកូរ៉េខាងជើងកាន់តែបង្កើនការគំរាមខ្លាំងឡើងៗនៅក្នុងតំបន់។ លោក Fumio Kishida បានថ្លែងសង្កត់ពាក្យទៀតថា “ការចុះហត្ថលេខាលើសន្ធិសញ្ញានេះ មានអត្ថន័យដ៏សំខាន់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ