ថៃ៖របបសឹកប្រកាសជួយគាំទ្រប្រជាកសិករដែលរងគ្រោះដោយតម្លៃអង្ករធ្លាក់ថ្លៃ
នៅក្នុងប្រទេសថៃ របបសឹកបានប្រកាសចូលអន្តរាគមន៍ជួយប្រជាកសិករដែលកំពុងរងគ្រោះដោយការធ្លាក់ចុះតម្លៃអង្ករនៅលើទីផ្សារអន្តរជាតិ។ នយោបាយឧបត្ថម្ភធនដល់ប្រជាកសិករដោយរដ្ឋាភិបាលរបស់លោកនាយករដ្ឋមន្រ្តីចាន់អូចាពេលនេះត្រូវបានគេមើលឃើញថា មានលក្ខណៈស្រដៀងគ្នានឹងនយោបាយអនុវត្តន៍ដោយរដ្ឋាភិបាលរបស់លោកស្រីអតីតនាយករដ្ឋមន្រ្តីយីងឡាក់។ តែអ្វីជាការកត់សម្គាល់ នយោបាយរបស់លោកស្រីយីងឡាក់បែរជាបានធ្វើឲ្យលោកស្រីទទួលរងការរិះគន់ទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
គឺនៅក្រោយកិច្ចប្រជុំគណៈរដ្ឋមន្រ្តីដែលលោកនាយករដ្ឋមន្រ្តីប្រាយុទ្ធ ចាន់អូចាបានប្រកាសឲ្យដឹងនូវនយោបាយឧបត្ថម្ភធនដល់ប្រជាកសិករដែលកំពុងរងគ្រោះដោយតម្លៃអង្ករចុះថ្លៃខ្លាំងនៅលើទីផ្សារអន្តរជាតិ។ នៅក្នុងនយោបាយឧបត្ថម្ភធននោះ រដ្ឋាភិបាលបានគ្រោងកញ្ចប់ថវិកាជាង ៥០០លានដុល្លារសម្រាប់ឲ្យប្រជាកិសករខ្ចីក្នុងរយៈពេលខ្លីដើម្បីស្តុកអង្កររបស់ខ្លួនមួយរយៈដោយរងចាំតម្លៃអង្ករឡើងថ្លៃឡើងវិញ។ ជាសរុប មានប្រជាកសិករប្រមាណ ២លាននាក់អាចទទួលបានការគាំទ្រពីផែនការជំនួយនេះ។ លោកចាន់អូចាបានថ្លែងដោយសង្ឃឹមថា ប្រជាកសិករពិតជាពេញចិត្តនឹងនយោបាយឧបត្ថម្ភធននេះ នោះបើទោះបីរដ្ឋាភិបាលមិនអាចឆ្លើយតបតាមសំណូមពររបស់ពួកគេបាន ១០០% ក៏ដោយ។
អ្វីជាការកត់សម្គាល់ នយោបាយឧបត្ថម្ភធនដល់ប្រជាកសិករប្រកាសដោយរបបសឹកពេលនេះមិនខុសគ្នានឹងនយោបាយអនុវត្តន៍ដោយរដ្ឋាភិបាលរបស់លោកស្រីអតីតនាយករដ្ឋមន្រ្តីយីងឡាក់ទេ។ តែបញ្ហានៅត្រង់ថា នយោបាយរបស់លោកស្រីយីងឡាក់បែរជាបានទទួលរងការរិះគន់ពីរបបសឹកដដែលនេះ ហើយដែលលោកស្រីកំពុងជាប់ក្តីក្តាំនៅឯតុលាការមកដល់សព្វថ្ងៃពីបទធ្វេសប្រហែសក្នុងការអនុវត្តនយោបាយឧបត្ថម្ភធនដល់ប្រជាកសិករ និងដែលអាចទទួលទោសដេកក្នុងគុកដល់ទៅ ១០ឆ្នាំផង។ គួររម្លឹកជូនថា បន្ទាប់ពីរងគ្រោះដោយរដ្ឋប្រហារយោធាក្នុងខែឧសភា ឆ្នាំ ២០១៤ មក លោកស្រីយីងឡាក់ត្រូវបានរបបសឹកហាមមិនឲ្យធ្វើនយោបាយ។
ពិតណាស់ ថៃជាប្រទេសនាំអង្ករចេញទី១ ក្នុងលោក និងដែលអង្ករជាសក្តានុពលសេដ្ឋកិច្ចធំធេងរបស់ប្រទេសជាតិ តែគេមិនត្រូវភ្លេចនិយាយទេថា អង្ករក៏មានបង្កប់ដោយន័យនយោបាយផ្ទៃក្នុងយ៉ាងស៊ីជម្រៅដែរ។ ការហ៊ាននិយាយយ៉ាងដូចនេះ ព្រោះជាទូទៅ និងជាលក្ខណៈប្រពៃណី ប្រជាកសិករ និងប្រជារាស្រ្តថៃរស់នៅតាមជនបទបានគាំទ្រគ្រួសារត្រកូលថាក់ស៊ីនដែលជាអ្នកប្រឆាំងនឹងរបបសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ