ទស្សនកិច្ចលោកអាបេនៅគុយបា បើកទំព័រថ្មីរវាងតូក្យូនិងឡាហាវាន
លោក Shinzo Abe ជាប្រមុខរដ្ឋាភិបាលជប៉ុនទីមួយដែលបានអញ្ជើញទៅបំពេញទស្សនៈកិច្ចផ្លូវការពីរថ្ងៃនៅគុយបាដោយគិតចាប់ពីថ្ងៃព្រសហ្បតិ៍ម្សិលមិញទៅដើម្បីចាប់បើកទំព័រថ្មីមួយនៅលើទំនាក់ទំនងរវាងទីក្រុងតូក្យូនិងទីក្រុងឡាហាវាន។ នៅពេលអញ្ជើញទៅដល់គុយបាភ្លាម នាយករដ្ឋមន្ត្រីជប៉ុន ត្រូវបានទទួលស្វាគមន៍ពីសំណាក់លោកប្រធានាធិបតីគុយបា Raul castro និងបន្ទាប់មកបងប្រុសរបស់គាត់គឺលោក Fidel Castro ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ប្រទេសជប៉ុនដែលជាសម្ព័ន្ធមិត្តដ៏ជិតស្និទ្ធបំផុតរបស់សហរដ្ឋអាមេរិក ជាយូរពេលមកហើយ នៅតែរក្សាទំនាក់ទំនងការទូតយ៉ាងស្តួចស្តើងជាមួយប្រទេសគុយបា។ ក៏ប៉ុន្តែក្រោយពីអាមេរិក មានទំនាក់ទំនងការទូតជាមួយគុយបាតាំងពីចុងឆ្នាំ២០១៤មក ជប៉ុនបានឆ្លៀតឧកាសដ៏កម្រនេះដើម្បីមកបំពេញទស្សនកិច្ចថ្មីមួយនៅទីក្រុងឡាហាវាន។
យោងតាមកាសែតផ្លូវការគុយបា ឈ្មោះ Granma ដែលចេញផ្សាយកាលពីម្សិលមិញ លោក Shinzo Abe នៅក្នុងកិច្ចសន្ទនាមួយ បានថ្លែងប្រាប់ថា “លោកសង្ឃឹមដោយស្មោះសរថា ទស្សនៈកិច្ចរបស់លោកនៅគុយបានេះ នឹងប្រែក្លាយទៅជាឱកាសល្អមួយសម្រាប់ជប៉ុនដើម្បីអាចចាប់បើកទំព័រថ្មីមួយនៅក្នុងទំនាក់ទំនងមិត្តភាពរវាងជប៉ុននិងគុយបា។
ម្យ៉ាងទៀត នៅទីក្រុងឡាហាវាន នាយករដ្ឋមន្ត្រីជប៉ុន បានជួបសន្ទានាជាបន្តបន្ទាប់គ្នាដំបូងជាមួយប្រធានាធិបតីគុយបា លោកRaul Castro និងបន្ទាប់មកជាមួយ លោក Fidel Castro ដែលជាបីតានៃបដិវត្តន៍គុយបា និងដែលបានដកខ្លួនពីការគ្រប់គ្រងរដ្ឋអំណាចតាំងពីឆ្នាំ២០០៦មកម៉្លេះ។
នាពេលជួបប្រាស្រ័យជាមួយអតីតប្រធានាធិបតីគុយបាដែលឥឡូវនេះមានចំណាស់៩០ឆ្នាំហើយនោះ នាយករដ្ឋមន្ត្រីជប៉ុន បានរំលឹកឡើងជាអាទិ៍ អំពីគ្រោះថ្នាក់នានាដែលកំពុងតែគំរាមកំហែងពិភពលោកនិងភាពចំាបាច់នានានៅក្នុងការពង្រឹងនិងការប្រឹងប្រែងដើម្បីកំទេចបំផ្លាញសពា្វវុធនុយក្លេអ៊ែរដែលបច្ចុប្បន្នតំណាងដោយទីក្រុងព្យុងយ៉ាង។ កិច្ចសន្ទនារវាងលោក Shinzo Abe និងលោក Fidel Castro នេះ ត្រូវបានប្រព័ន្ធផ្សព្វផ្សាយរដ្ឋគុយបា ជូនដំណឹងនៅពេលល្ងាចម្សិលមិញដែរ។
ជប៉ុនដែលជាប្រទេសអ្នកគាំទ្រចំពោះ មធ្យោបាយថ្មីៗដើម្បីបិទបញ្ចប់ការគំរាមដែលកាន់តែមានលក្ខណៈធ្ងន់ធ្ងរឡើងៗនិងជាក់ស្តែង ពីសំណាក់ប្រទេសកូរ៉េខាងជើង។ កូរ៉េខាងជើងដែលបានបាញ់សាកល្បងគ្រាប់នុយក្លេអ៊ែរនិងគា្រប់ម៊ីស៊ីលអន្តរទ្វីបជាច្រើនលើកនិងដែលធ្វើឲ្យទីក្រុងតូក្យូមានការខ្វល់ខ្វាយជាពន់ពេកចំពោះសន្តិសុខប្រទេសជាតិខ្លួន។ លើសពីនេះ លោក Abe បានជូនដំណឹងដែរថា លោកនឹងលើកនិយាយពីបញ្ហានេះជាមួយរដ្ឋាភិបាលគុយបា គុយបាដែលជាប្រទេសមួយនៅតែថែរក្សាទំនាក់ទំនងយ៉ាងជិតស្និទ្ធជាមួយកូរ៉េខាងជើង។
ទន្ទឹមនេះ លោក Abe បានគូសបញ្ជាក់បន្ថែមទៀតថា “ជាមួយ គុយបា លោកមានបំណងដឹកនាំនូវកិច្ចចរចាបើកចំហរមួយ ជាអាទិ៍ក្នុងគោលដៅដើម្បីលើកស្ទួយនៅលើវិស័យពាណិជ្ជកម្ម វិនិយោគទុន និងសហប្រតិបត្តិការរវាងជប៉ុននិងគុយបា ពីព្រោះការប្តោះប្តូរពាណិជ្ចកម្មរវាងប្រទេសទាំងពីរ បានធ្លាក់ចុះនៅក្នុងរយៈពេលដ៏យូរលង់មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ