គណៈកម្មការ៖សាកសពលោកម៉ាកូសមិនសក្តិសមនឹងកប់នៅទីបញ្ចុះសពវីរៈបុរសទេ
នៅក្នុងប្រទេសហ្វីលីពីន សាកសពលោកអតីតប្រធានាធិបតីកាន់អំណាចផ្តាច់ការម៉ាកូសកំពុងក្លាយជាសង្រ្គាមពាក្យសម្តីរវាងលោកប្រធានាធិបតីរ៉ូឌ្រីហ្គោ ឌុយទែរតេ និងគណៈកម្មការជាតិទទួលបន្ទុករឿងរ៉ាវប្រវត្តិសាស្រ្តនៅហ្វីលីពីន។ លោកឌុយទែរតេមានគម្រោងបញ្ជូនសាកសពលោកម៉ាកូសទៅកប់នៅទីបញ្ចុះសពវីរៈបុរស តែគណៈកម្មការប្រវត្តិសាស្រ្តបានឆ្លើយបកទៅលោកឌុយទែរតេវិញថា សាកសពអតីតប្រធានាធិបតីហ្វីលីពីនម៉ាកូសមិនសក្តិសមជាវីរៈជនដែលត្រូវបញ្ជូនទៅបញ្ចុះនៅកន្លែងកប់សាកសពវីរៈបុរសទេ។
ចុះផ្សាយនៅថ្ងៃ៖
ស្តាប់ - ០២:៤៣
គណៈកម្មការជាតិទទួលបន្ទុករឿងរ៉ាវប្រវត្តិសាស្រ្តដែលជាស្ថាប័នមួយរបស់រដ្ឋាភិបាលហ្វីលីពីនទើបបានចេញសេចក្តីថ្លែងការណ៍មួយដោយបញ្ជាក់ថា សាកសពលោកអតីតប្រធានាធិបតីហ្វីលីពីនម៉ាកូសគ្មានលក្ខណៈសម្បត្តិ និងមិនបានបំពេញលក្ខខណ្ឌគ្រប់គ្រាន់ដើម្បីអាចបញ្ជូនទៅកប់នៅទីបញ្ចុះសពជាមួយសាកសពវីរៈបុរសផ្សេងទៀតទេ។ តាមសេចក្តីថ្លែងការណ៍របស់គណៈកម្មការ លោកម៉ាកូសបាននិយាយភូតកុហកជាច្រើនករណី ពិសេសទាក់ទងនឹងរឿងមេដាយដែលលោកថាទទួលបានពីអាមេរិក ឬមួយក៏សំណុំរឿងយោធាគ្មានតម្លាភាពជាដើម។
ក្រៅពីនិយាយភូតកុហក អតីតប្រធានាធិបតីហ្វីលីពីនក៏ជាប់ឈ្មោះជាអ្នកកាន់អំណាចផ្តាច់ការ ជាជនរំលោភសិទ្ធិមនុស្ស និងជាជនពុករលួយដោយជាប់ចោទពីបទលួចបង្វែរលុយរដ្ឋប្រមាណជា ១០ ០០០លានដុល្លារ។ ក្នុងឆ្នាំ ២០០៤ អង្គការតម្លាភាពអន្តរជាតិបានដាក់ចំណាត់ថ្នាក់លោកម៉ាកូសជាមេដឹកនាំពុករលួយខ្លាំងជាងគេលំដាប់ទី២។ ចម្លើយរបស់គណៈកម្មការជាតិទទួលបន្ទុករឿងរ៉ាវប្រវត្តិសាស្រ្ត គឺដើម្បីតបនឹងលោកប្រធានាធិបតីឌុយទែរតេដែលកាលពីថ្ងៃអាទិត្យ ទី៧ សីហាកន្លងទៅបានសន្យាបញ្ជូនសាកសពលោកម៉ាកូសទៅកប់នៅទីបញ្ចុះសពវីរៈបុរសហ្វីលីពីនផ្សេងទៀត។ សម្រាប់លោកឌុយទែរតេ លោកម៉ាកូសជាប្រធានាធិបតីដ៏ល្អជាងគេដែលហ្វីលីពីនមិនធ្លាប់មានទេ។
សូមរម្លឹកជូនថា លោកម៉ាកូសបានកាន់តំណែងប្រធានាធិបតីហ្វីលីពីនជាង ២០ឆ្នាំ ពីខែធ្នូ ឆ្នាំ ១៩៦៥ ដល់ខែកុម្ភៈ ឆ្នាំ ១៩៨៦។ ក្រោយធ្លាក់ពីតំណែងដោយរដ្ឋប្រហារយោធាក្នុងឆ្នាំ ១៩៨៦ លោកម៉ាកូស និងក្រុមគ្រួសារក៏បាននិរទេសន៍ខ្លួនទៅរស់នៅសហរដ្ឋអាមេរិក។ ៣ឆ្នាំក្រោយមក ពោលក្នុងឆ្នាំ ១៩៨៩ លោកម៉ាកូសបានចែកឋានក្នុងរដ្ឋហាវ៉ៃ ទឹកដីអាមេរិក។ ក្រោយមរណៈភាពរបស់ប្តី ភរិយា និងក្រុមគ្រួសារក៏បានវិលចូលស្រុកកំណើតវិញ រួចក៏យកសាកសពលោកម៉ាកូសទៅរក្សាទុកនៅស្រុកកំណើត។
បន្តិចម្តងៗមកដល់សព្វថ្ងៃ ក្រុមគ្រួសារត្រកូលម៉ាកូសបន្តចូលប្រឡូកក្នុងឆាកនយោបាយហ្វីលីពីន។ ភរិយាមេម៉ាយទើបជាប់ឆ្នោតអាណត្តិទី៣ ជាប្រធានរដ្ឋសភា និងកូនស្រីបន្តកាន់តំណែងជាចៅហ្វាយខេត្តមួយ។ អស់ជាច្រើនឆ្នាំមកហើយដែលគ្រួសារត្រកូលម៉ាកូសបានទាមទារឲ្យយកសាកសពលោកម៉ាកូសទៅកប់ជាមួយសាកសពវីរៈបុរសហ្វីលីពីនផ្សេងទៀត។ តែត្រូវបានបដិសេធដោយប្រធានាធិបតីមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ