ជប៉ុនប្រកាសផែនការផ្តល់សន្ទុះសេដ្ឋកិច្ចទំហំជាង២៤០ពាន់លានអឺរ៉ូ
នាយករដ្ឋមន្ត្រីជប៉ុន លោក ស៊ីនហ្សូ អាបេ បានប្រកាសនៅថ្ងៃពុធទី ២៧កក្កដានេះ គម្រោងផ្តល់សន្ទុះសេដ្ឋកិច្ច ដ៏ធំសម្បើម ដែលមានទំហំដល់ទៅ ២៨០០០ពាន់លានយ៉េន ឬស្មើនឹងជាង២៤០ពាន់លានអឺរ៉ូ ដើម្បីទ្រទ្រង់សេដ្ឋកិច្ចជាតិ។ នេះបើតាមការផ្សព្វផ្សាយរបស់សារព័ត៌មានក្នុងស្រុក។
ចុះផ្សាយនៅថ្ងៃ៖
ស្តាប់ - ០១:៥៥
គម្រោងផ្តល់សន្ទុះសេដ្ឋកិច្ចទំហំ ជាង២៤០ពាន់លានអឺរ៉ូនេះ នឹងត្រូវយកទៅបំប៉ោងកញ្ចប់ថវិការដ្ឋ សម្រាប់ចំណាយសាធារណៈ និងសម្រាប់ជួយវិស័យវិនិយោគសមូហភាពនិងក្រុមហ៊ុនសហគ្រាស។
រដ្ឋាភិបាលនឹងផ្តល់ព័ត៌មានលម្អិតនិងស៊ីជម្រៅទាក់ទងនឹងផែនការនេះ នៅសប្តាហ៍ក្រោយ។ នាយករដ្ឋមន្ត្រីអភិរក្សជប៉ុន លោកស៊ីនហ្សូ អាបេ ដែលធ្លាប់បានស្បថនាឱកាសវិលត្រលប់មកកាន់តំណែងជាថ្មី កាលពីឆ្នាំ២០១២ យកឈ្នះឱ្យបានវិបត្តិឱនភាពជាតិ និងធ្វើឱ្យសេដ្ឋកិច្ចជប៉ុនមានលំនឹងសក្តិសមជាមហាអំណាចសេដ្ឋកិច្ចទីបីលើពិភពលោក បានសម្រេចលើកផែនការផ្តល់សន្ទុះនេះ ដោយសង្ឃឹមថានឹងអាចរំញោចសេដ្ឋកិច្ចជាតិឱ្យមានសកម្មភាពខ្លាំងឡើងវិញ។
កាលពីដើមខែ លោក អាបេ បានសន្យាចាត់វិធានការផ្តល់សន្ទុះជាមួយក្រុមអ្នកវិនិយោគសំខាន់ៗនៅតំបន់ ដើម្បីជួយពលរដ្ឋជាមេគ្រួសារមានកូនតូចៗ និស្សិត កសិករ ឬ ជួយអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់។
រដ្ឋាភិបាលក៏ធ្លាប់បានសន្យាដែរថា នឹងការពារក្រុមហ៊ុនសហគ្រាស ប្រឆាំងនឹងសម្ពាធអន្តរជាតិ។ ព្រោះថាសេចក្តីសម្រេចចិត្តរបស់ពលរដ្ឋអង់គ្លេសដើរចេញពីសហភាពអឺរ៉ុប បានបង្កឱ្យមានការប៉ះពាល់យ៉ាងខ្លាំងដល់ប្រាក់យ៉េនជប៉ុន។ ប្រាក់យ៉េនឡើងថ្លៃ បែបនេះ ហាក់ដូចជាបានដាក់ទោសលើសេដ្ឋកិច្ចជាតិ និងជាពិសេសលើការនាំចេញ។
ប៉ុន្តែនៅថ្ងៃនេះ គ្រាន់តែបានឮសេចក្តីប្រកាសបង្ហើបបង្ហាញពីផែនការផ្តល់សន្ទុះភ្លាម ភាគហ៊ុនជប៉ុន បានស្ទុះឡើង។ ឯចំណែកលុយយ៉េនក៏ធ្លាក់ថ្លៃគួរឱ្យកត់សម្គាល់។ អ្នកវិនិយោគសង្ឃឹមទុកបន្ថែមទៀតថា ធនាគារកណ្តាលជប៉ុនដែលនឹងត្រូវជួបប្រជុំគ្នានៅថ្ងៃស្អែក ក៏នឹងអាចមានការបន្ធូរបន្ថយនយោបាយរូបិយវត្ថុ។ ការនេះរឹតតែសម្រួលដល់សេដ្ឋកិច្ចជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ