ជប៉ុន៖ហេតុអ្វីបានជាប្រជាជនភាគច្រើនផ្តើមធុញទ្រាន់ និងពិបាកទ្រាំនឹងវត្តមានទ័ពអាមេរិក?
នៅក្នុងប្រទេសជប៉ុន ប្រជាជនរស់លើកោះអូគីណាវ៉ាជាច្រើនម៉ឺននាក់បាននាំគ្នាចុះផ្លូវធ្វើបាតុកម្មជាថ្មីនាថ្ងៃអាទិត្យ ទី១៩ មិថុនានេះដើម្បីប្រឆាំងនឹងវត្តមានទ័ពអាមេរិក។ បាតុកម្មក្នុងគោលដៅដូចគ្នានេះក៏មានរៀបចំធ្វើនៅពីមុខសភាក្នុងទីក្រុងតូក្យូដែរ។ បាតុកម្មជាថ្មីរបស់ប្រជាជនជប៉ុនថ្ងៃនេះជាសក្ខីកម្មថ្មីទៀតដែលបញ្ជាក់ថា វត្តមានទ័ពអាមេរិកលើដែនដីជប៉ុនបាន និងកំពុងធ្វើឲ្យប្រជាជនជប៉ុនភាគច្រើនកាន់តែធុញទ្រាន់ និងពិបាកទ្រាំទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០១
អ្វីៗបានបន្សល់ទុកដោយសង្រ្គាមលោកលើកទី២។ នៅក្រោយសង្រ្គាមលោកលើកទី២ អាមេរិកក្នុងនាមជាអ្នកឈ្នះបានកាន់កាប់កោះអូគីណារបស់ជប៉ុនអស់រយៈពេល ២៧ឆ្នាំ មុននឹងប្រគល់ទៅឲ្យជប៉ុនកាន់កាប់វិញក្នុងឆ្នាំ ១៩៧២។ ក៏ប៉ុន្តែ អាមេរិកបានបន្តរក្សាទុកមូលដ្ឋានយោធា និងទ័ពរបស់ខ្លួននៅលើកោះអូគីណាវ៉ាមកដល់សព្វថ្ងៃ។ គួររម្លឹកជូនថាតាំងពីក្រោយការបិទបញ្ចប់សង្រ្គាមលោកលើកទី២ ក្នុងឆ្នាំ ១៩៤៥ មក មានវត្តមានទ័ពអាមេរិកចំនួន ៤៧ ០០០នាក់បានប្រចាំការក្នុងទឹកដីជប៉ុនដែលក្នុងនោះ មានប្រមាណជា ២៥ ០០០នាក់ស្ថិតនៅលើកោះអូគីណាវ៉ា។ ទន្ទឹមគ្នានេះ មូលដ្ឋានយោធាអាមេរិក ៧៥% នៅក្នុងទឹកដីជប៉ុនក៏បានសាងសង់នៅលើកោះអូគីណាវ៉ាដែរ។
ជម្រើសយកកោះអូគីណាវ៉ាជាមូលដ្ឋានយោធា និងជាជម្រកកម្លាំងទ័ពអាមេរិកយ៉ាងច្រើនសម្បើមនៅជប៉ុនមិនមែនជាជម្រើសចៃដន្យទេ។ មិនចៃដន្យ ព្រោះក្រោមភ្នែកច្រមុះក្រុងតូក្យូ ក៏ដូចក្រុងវ៉ាស៊ីនតោន កោះអូគីណាវ៉ាដែលស្ថិតមិនឆ្ងាយពីកោះតៃវ៉ាន់គឺជាទីតាំងយុទ្ធសាស្រ្តមួយយ៉ាងសំខាន់សម្រាប់ប្រឈមទប់នឹងការគំរាមកំហែងរបស់ប្រទេសជិតខាង ពិសេសពីប្រទេសចិន។ សូមរម្លឹកជូនថា ជប៉ុន និងចិនកំពុងបន្តប្រទាញប្រទង់គ្នាលើទីប្រជុំកោះសេនកាគុដែលបច្ចុប្បន្នស្ថិតក្រោមការគ្រប់គ្រងរបស់ក្រុងតូក្យូ តែក្រុងប៉េកាំងដែលដាក់ឈ្មោះថា ទីប្រជុំកោះឌីយ៉ាវយូនៅបន្តទាមទារជារបស់ខ្លួន។
ជានិច្ចកាល ចិនតែងតែបញ្ជូននាវារបស់ខ្លួនទៅកាន់តំបន់ក្បែរទីប្រជុំកោះនោះ ហើយសមយុទ្ធដំឡើងសាច់ដុំដាក់ចិនរវាងទ័ពអាមេរិក និងជប៉ុនក៏តែងធ្វើនៅក្នុងសមុទ្រនៃកោះអូគីណាវ៉ាដែរ។
ដើមចមនៃភាពចម្រូងចម្រាសរវាងអាមេរិក និងជប៉ុនលើកោះអូគីណាវ៉ា
កោះអូគីណាវ៉ាដែលមានដាក់តាំងមូលដ្ឋានទ័ពអាមេរិកប្រមាណជា ៧៥% និងមានវត្តមានទ័ពអាមេរិកចំនួន ២៥ ០០០នាក់ក្នុងចំណោមវត្តមានទ័ពអាមេរិកសរុបទាំង ៤៧ ០០០នាក់នៅក្នុងទឹកដីជប៉ុន គឺមានតាំងពីក្រោយការបិទបញ្ចប់សង្រ្គាមលោកលើកទី២ ក្នុងឆ្នាំ ១៩៤៥ មកម្ល៉េះ ចុះហេតុអ្វីបានជាទើបកើតមានភាពចម្រូងចម្រាសជាង ១០ឆ្នាំកន្លងទៅនេះទៅវិញ ពិសេស ហេតុអ្វីបានជាប្រជាជនកោះអូគីណាវ៉ាបញ្ចេញកំហឹងប្រឆាំងនឹងវត្តមានទ័ពអាមេរិកកាន់តែខ្លាំងឡើងៗនាពេលនេះ?។
មានហេតុផលសំខាន់ចំនួនពីរ ទី១ មកពីមានបន្ទាយទាហានខ្លះស្ថិតក្បែរទីប្រជុំជនខ្លាំងពេក ពិសេសបន្ទាយទាហានទ័ពអាកាសដែលសម្លេងឡើង ចុះរបស់យន្តហោះបានធ្វើឲ្យរំខានការរស់នៅប្រចាំថ្ងៃរបស់ប្រជាជនកោះអូគីណាវ៉ា និងទី២ មកពីមានការកើតឡើងនូវទង្វើ និងអកប្បកិរិយាខុសឆ្គងកាន់តែច្រើនរបស់ទាហានអាមេរិកនៅកោះអូគីណាវ៉ា ពិសេសគឺការចាប់រំលោភ និងសម្លាប់។ រឿងរ៉ាវរំលោភ និងសម្លាប់បានផ្ទុះដំបូងក្នុងឆ្នាំ ១៩៩៥ ដែលមានទាហានអាមេរិក ៣នាក់បានចាប់ជំរិត រួចរំលោភលើក្មេងស្រីជប៉ុនអាយុ ១២ឆ្នាំម្នាក់។ នៅដំណាច់ខែមេសាកន្លងទៅថ្មីៗនេះ មានស្រ្តីកោះអូគីណាវ៉ាម្នាក់អាយុ ២០ឆ្នាំត្រូវបានទាហានអាមេរិកចាប់រំលោភ រួចសម្លាប់ចោល។
គឺទង្វើដ៏ព្រៃផ្សៃច្រំដែលរបស់ទាហានអាមេរិករបៀបនេះហើយដែលបានធ្វើឲ្យប្រជាជនកោះអូគីណាវ៉ាធុញទ្រាន់ និងពិបាកទ្រាំមើលវត្តមានទ័ពអាមេរិកក្នុងទឹកដីរបស់ខ្លួនជាបន្តទៀត។ នៅក្នុងបាតុកម្មជាថ្មីថ្ងៃនេះ ប្រជាជនកោះអូគីណាវ៉ាបានទាមទារឲ្យបិទបន្ទាយ និងដកទ័ពអាមេរិកចេញពីកោះអូគីណាវ៉ា។
សង្រ្គាមប៉ាកការវាងអាមេរិក និងជប៉ុនអាចបន្តតានតឹង
តាំងពីផ្ទុះរឿងអាស្រូវចាប់រំលោភកូនក្មេងអាយុ ១២ឆ្នាំពីសំណាក់ទាហានអាមេរិក ៣នាក់ក្នុងឆ្នាំ ១៩៩៥ មក រដ្ឋបាលអាមេរិក និងរដ្ឋាភិបាលជប៉ុនបានផ្តើមគិតគូរយ៉ាងយកចិត្តទុកដាក់ចំពោះការទាមទាររបស់ប្រជាជនកោះអូគីណាវ៉ា។ កិច្ចព្រមព្រៀងរវាងក្រុងវ៉ាស៊ីនតោន និងក្រុងតូក្យូត្រូវបានរកឃើញក្នុងឆ្នាំ ២០០៥ ដោយមានការដកទ័ពអាមេរិកចំនួន ៨ ០០០នាក់ទៅដាក់នៅក្រៅប្រទេសជប៉ុន ពោលដាក់នៅកោះ Guam និងកោះហាវ៉ៃក្នុងទឹកដីអាមេរិកដែលមានចម្ងាយមិនឆ្ងាយខ្លាំងពីកោះអូគីណាវ៉ាទេ។ កម្មវត្ថុរបស់អាមេរិក គឺរក្សាទុកទ័ពអាមេរិកនៅក្បែរជប៉ុនដើម្បីធ្វើណា ឲ្យអាមេរិកអាចបញ្ជូនត្រឡប់វិញភ្លាមៗក្នុងករណីចាំបាច់ណាមួយ។
បន្ទាប់មកទៀត ជប៉ុន និងអាមេរិកក៏បានព្រមព្រៀងគ្នាក្នុងការប្តូរទីតាំងមូលដ្ឋានយោធាមួយចំនួនដែលស្ថិតក្បែរទីប្រជុំជន ពិសេសមូលដ្ឋានទ័ពអាកាសទៅដាក់កន្លែងផ្សេងក្នុងទឹកដីកោះអូគីណាវ៉ា។ តែបញ្ហានៅត្រង់ថា ប្រជាជនកោះអូគីណាវ៉ាមិនចង់ឃើញការប្តូរពីកន្លែងមួយទៅកន្លែងថ្មីដូច្នេះទេ គឺចង់ឲ្យអាមេរិកបិទបន្ទាយ និងដកកម្លាំងទាហានរបស់ខ្លួនទាំងអស់ចេញពីកោះអូគីណាវ៉ាតែម្តង។ ដូច្នេះឃើញថា សង្រ្គាមប៉ាកការវាងអាមេរិក និងជប៉ុន និយាយជារួម និងជាមួយប្រជាជនកោះអូគីណាវ៉ា និយាយដោយឡែកកំពុងបន្ត និងត្រូវបន្តវែងឆ្ងាយដោយគេមិនដឹងថា នឹងត្រូវបិទបញ្ចប់របៀបម៉េចទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ