លុបបំបាត់ការចម្លងអេដស៍ពីម្តាយទៅកូន ថៃជាប់លេខមួយនៅអាស៊ី
ថៃ បានក្លាយជាប្រទេសដំបូងគេបង្អស់នៅអាស៊ី ដែលអាចលុបបំបាត់បានទាំងស្រុង ការចម្លងមេរោគអេដស៍ពីម្តាយទៅកូន។ នេះបើតាមសេចក្តីប្រកាសរបស់អង្គការសុខភាពពិភពលោក ក្នុងខណៈដែលអង្គការសហប្រជាជាតិ ត្រូវបើកជំនួបប្រជុំមួយ ស្តីពីការប្រយុទ្ធប្រឆាំងនឹងជំងឺស៊ីដា ឬអេដស៍ នៅថ្ងៃពុធទី ៨ មិថុនា នេះ នៅទីក្រុងញូវយ៉ក។ អង្គការសហប្រជាជាតិ សង្ឃឹមថា នឹងអាចសម្រេចកម្មវត្ថុទប់ស្កាត់ការចម្លងមេរោគហ៊ីវនេះបាននៅឆ្នាំ២០៣០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ជាជ័យជំនះ គួរឱ្យកត់សម្គាល់ខ្លាំង សម្រាប់ប្រទេសថៃដែលក្នុងអំឡុងទសវត្សរ៍ឆ្នាំ១៩៩០ វីរ៉ុសអេដស៍បានធ្វើការរាតត្បាតយ៉ាងសន្ធោសន្ធៅ។ រហូតមកទល់ពេលនេះ មានតែប្រទេសគុយបាមួយប៉ុណ្ណោះ ដែលសម្រេចលុបបំបាត់បានទាំងស្រុង ការចម្លងវីរ៉ុសពីម្តាយទៅកូន។ នៅអឺរ៉ុបវិញ ប្រទេសអារមេនី បេឡារុស ទើបសម្រេចកម្មវត្ថុនេះបានដែរ ប៉ុន្តែប្រទេសទាំងពីរនេះមានអត្រាអ្នកផ្ទុកមេរោគអេដស៍តិចតួចបំផុតបើប្រៀបទៅនឹងប្រទេសថៃ។
បើតាមអង្គការសហប្រជាជាតិ មានពលរដ្ឋថៃប្រមាណ ៥០ម៉ឺននាក់ កំពុងរស់ជាមួយមេរោគអេដស៍ ទល់នឹងជាងមួយលាននាក់ កាលពី២៥ឆ្នាំមុន។ តាំងពីឆ្នាំ២០០០មក ថៃបានក្លាយជាប្រទេសដំបូងគេមួយនៅតំបន់អាស៊ី ដែលផ្តល់ថ្នាំពន្យារជីវិតដោយឥតគិតថ្លៃដល់ស្ត្រីមានផ្ទៃពោះ មានផ្ទុកមេរោគអេដស៍។ ហើយគ្រប់ស្ត្រីមានផ្ទៃពោះត្រូវបានទទួលការធ្វើតេស្តរកមេរោគអេដស៍ដោយស្វ័យប្រវត្តិ ទោះស្ត្រីនោះរស់នៅក្នុងចុងកាត់ដាច់ស្រយាលខ្លាំងក៏ដោយ។
នាយកប្រតិបត្តិអង្គការប្រយុទ្ធប្រឆាំងស៊ីដារបស់អង្គការសហប្រជាជាតិ បានអះអាង ជោគជ័យរបស់ថៃក្នុងលុបបំបាត់ការចម្លងស៊ីដាពីម្តាយទៅកូន ជាឧទាហរណ៍ជាក់ស្តែង បញ្ជាក់ថាពិភពលោកពិតជាប្រយុទ្ធប្រឆាំងនឹងជំងឺអេដស៍បាន ប្រសិនបើអ្នកនយោបាយគាំទ្រវិទ្យាសាស្ត្រនិងវេជ្ជសាស្ត្រ។
សូមបញ្ជាក់ថា នៅលើពិភពលោកបច្ចុប្បន្ននេះ មានស្ត្រីមានផ្ទុកវីរ៉ុសអេដស៍ប្រមាណជាង១លានបួនសែនពរពោះក្នុងមួយឆ្នាំៗ។ ពួកគាត់ភាគច្រើនរស់នៅក្នុងប្រទេសកំពុងអភិវឌ្ឍន៍ និងពិសេសនៅអាហ្វ្រិក។ បើគ្មានការផ្តល់ថ្នាំពន្យារជីវិតទេ ហានិភ័យនៃការចម្លងមេរោគអេដស៍មានកំរិត ពី ១៥ទៅ៤៥%។ ផ្ទុយវិញ គ្រោះចម្លងមេរោគទៅឱ្យកូន ត្រូវលុបបំបាត់ស្ទើរតែស្រុង (១%) ប្រសិនបើមានការផ្តល់ថ្នាំព្យាបាលតាំងពីកំពុងពរពោះ និងនៅពេលទារកកើតភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ