ចិនសន្យាមិនឱ្យមានបដិវត្តន៍វប្បធម៌កើតឡើងជាថ្មីទេ
បដិវត្តន៍វប្បធម៌ គឺជា “កំហុសទាំងស្រុង” និង “មិនត្រូវឱ្យកើតមាន” ទៀតទេ ! នេះគឺជាពាក្យសន្យារបស់សារព័ត៌មានផ្លូវការចិនចេញផ្សាយនៅថ្ងៃអង្គារទី ១៧ ឧសភា ២០១៦។ សារព័ត៌មានផ្លូវការ ដែលប្រៀបដូចជាអ្នកនាំពាក្យរបស់បក្សកុម្មុយនិស្តចិន តាំងពីដើមមកស្ងាត់មាត់ឈឹងគ្មានចេញស្តីអ្វីទាំងអស់ទាក់ទងនឹងខួប៥០ឆ្នាំនៃការថ្ងៃផ្តើមបដិវត្តន៍វប្បធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
យើងមិនអនុញ្ញាតឱ្យមានបដិវត្តន៍វប្បធម៌ទៀតទេ ! បដិវត្តវប្បធម៌មិនអាចរស់ឡើងវិញឡើយ ! គ្មានឡើយបដិវត្តន៍វប្បធម៌សម្រាប់ចិនសម័យថ្មី ! នេះជាការគូសបញ្ជាក់របស់សារព័ត៌មានប្រជាជនចិន ក្នុងបទវិចារណកថាចេញផ្សាយនៅថ្ងៃនេះ ដោយថែមទាំងបរិហារថា បដិវត្តន៍វប្បធម៌នោះ គឺជាកំហុសដ៏ធ្ងន់ធ្ងរ ទាំងផ្នែកគោលការណ៍ និងការអនុវត្ត។
ថ្ងៃទី ១៦ឧសភា ១៩៦៦ លោក ម៉ៅ សេទុង អតីតបុរសខ្លាំងទីមួយរបស់ចិន បានចេញថ្លែងការណ៍ផ្លូវការ ធ្វើបដិវត្តន៍វប្បធម៌ពលករ លាងខួរក្បាលយុវជន ដើម្បីដណ្តើមអំណាច បោសសម្អាតផ្ទៃក្នុងបក្ស ដែលបាននាំប្រទេសឱ្យធ្លាក់ក្នុងអន្លុងដ៏ជ្រៅ ប្រជាជនរាប់លាននាក់ សមាជិកបក្សរាប់សិបរយនាក់បានបាត់បង់ជីវិត រកទុក្ខទារុណ អស់រយៈពេល១០ឆ្នាំ។
រហូតដល់ឆ្នាំ១៩៨១ ទើបអាជ្ញាធរចិនបានប្រកាសទទួលស្គាល់ជាផ្លូវការលើកដំបូង ថាបដិវត្តិវប្បធម៌ ជាមហន្តរាយជាតិ ប៉ុន្តែថ្វីបើពាក្យថាបដិវត្តន៍វប្បធម៌មិនមែនជាពាក្យហាមឃាត់ និងត្រូវបានទម្លាក់ទំនួលខុសត្រូវលើប្រមុខម៉ៅ សេទុងម្នាក់ក៏ដោយ ក៏បក្សកុម្មុយនីស្តចិន កំរិតនិងត្រួតពិនិត្យយ៉ាងខ្លាំងលើរាល់កិច្ចពិភាក្សាណាទាក់ទងនឹងប្រធានបទនេះ ព្រោះខ្លាចរាលដាលប៉ះពាល់ដល់ភាពស្របច្បាប់នៃបក្សដែលកំពុងកាន់អំណាច។
អ្នកសង្កេតការណ៍ និងជំនាញចិនជាច្រើន បានអំពាវនាវឱ្យចិនធ្វើវិភាគស៊ីជម្រៅអំពីឬសគល់នៃព្រឹត្តិការណ៍បដិវត្ត ដើម្បីកុំឱ្យមហន្តរាយបែបនេះវិលត្រលប់មកវិញបាន។ ប៉ុន្តែ ជាទូទៅ សារព័ត៌មាន ក៏ដូចជាអ្នកនយោបាយចិនផ្សេងៗ ចៀសមិនធ្វើអត្ថាធិប្បាយទេ។ តាំងពីមុន និងរហូតមកទល់ថ្ងៃចន្ទទី ១៦ម្សិលមិញ ដែលចំថ្ងៃខួប៥០ឆ្នាំគត់នៃការផ្តើមបដិវត្តន៍ គ្មានសារព័ត៌មានណាមួយនិយាយប៉ះពាល់ប្រធានបទនេះទេ។ កាលពីខែឧសភា ការប្រគុំតន្ត្រីមួយនៅវិមានប្រជាជន ដោយមានតែងលំអរឆាកបែបរំលឹកដល់បដិវត្តន៍វប្បធម៌ បានបង្កបង្កើតជារឿងអាស្រូវយ៉ាងខ្លាំង។ ចិនទំនងជាបានទទួលមេរៀនគ្រប់គ្រាន់ពីបដិវត្តន៍វប្បធម៌ ដោយត្រូវប្រុងប្រយ័ត្នជាប់ជានិច្ចប្រឈមនឹងជំងឺបដិវត្តន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ