ឥណ្ឌានិងអាមេរិកបង្កើនការរឹតចំណងយោធា ដើម្បីទប់ទល់មហិច្ឆតាវាតទីនិយមចិន ?!
នៅថ្ងៃអង្គារនេះ រដ្ឋមន្ត្រីការពារជាតិអាមេរិក លោក អាស្តុន កាទ័រ Ashton Carter បានអញ្ជើញទៅបំពេញទស្សនកិច្ចនៅប្រទេសឥណ្ឌា។ លោក អាស្តុន កាទ័រ ត្រូវជួបនាយករដ្ឋមន្ត្រី និងរដ្ឋមន្ត្រីការពារជាតិឥណ្ឌា ព្រមទាំងអ្នកឥស្សរជនជាន់ខ្ពស់ឥណ្ឌាជាច្រើនរូប ដើម្បីរឹតចំណងទំនាក់ទំនងវិស័យយោធារវាងប្រទេសទាំងពីរ ឥណ្ឌា-អាមេរិក ឱ្យបានកាន់ស្អិតល្មួត ព្រោះពេលនេះ ក្តីព្រួយបារម្ភបានរីកធំធាត់ខ្លាំងជាលំដាប់ នៅក្នុងតំបន់ ដោយហេតុតែការពង្រីកមហិច្ឆតាវាតទឹកដីឥត ឈប់ឈររបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ចប់ហើយ ការរើសអើង មើលគ្នាក្នុងក្រសែភ្នែកសង្ស័យ ដែលធ្លាប់មានក្នុងសម័យសង្គ្រាមត្រជាក់។ ពេលនេះ ឥណ្ឌានិងអាមេរិកកំពុងខិតរកគ្នា និងរឹងបន្តឹងចំណងផ្នែកយោធា ! ទស្សនកិច្ចរបស់រដ្ឋមន្ត្រីការពារជាតិអាមេរិក នៅក្រុងញូវដែលី ថ្ងៃនេះជាភស្តុតាង។
អាមេរិកចង់ល្បងអូសទាញបន្តិចម្តងៗប្រទេសឥណ្ឌាឱ្យចូលក្នុងបណ្តាញសម្ព័ន្ធការពារជាតិប្រចាំតំបន់អាស៊ីប៉ាស៊ីហ្វិក ក្នុងខណៈដែលប្រទេសក្នុងតំបន់កំពុងព្រួយបារម្ភខ្លាចចិនប្រើកម្លាំងក្រសោបយកសមុទ្ទចិនខាងត្បូងមកគ្រប់គ្រងតែម្នាក់ឯង។ ឯចំណែកឥណ្ឌាវិញ ក៏មិនស្រណុកចិត្តដែរ នៅពេលបានឃើញនាវាចម្បាំងចិនបង្ហាញវត្តមានកាន់ញយឡើងៗ នៅតំបន់អាស៊ីអាគ្នេយ៍និងក្នុងមហាសមុទ្ទឥណ្ឌា។ ហេតុដូច្នេះហើយបានជារដ្ឋមន្ត្រីការពារជាតិអាមេរិកចង់ឃើញឥណ្ឌាកាន់ដៃអាមេរិក ការពារសណ្តាប់ធ្នាប់អន្តរជាតិ ក្នុងដែនទឹក។
លើវិស័យឧស្សាហកម្មយោធាវិញ អាមេរិកនិងឥណ្ឌាមានកិច្ចសហប្រតិបត្តិការកាន់តែធំៗនិងច្រើនឡើងៗ។ ញូវដែលីត្រូវការបច្ចេកវិទ្យាថ្មីៗរបស់អាមេរិក ដើម្បីអភិវឌ្ឍន៍អាវុធយុទ្ធភណ្ឌ “Made in India” ជាពិសេសចំណេះធ្វើរបស់អាមេរិកក្នុងការផលិតនាវាផ្ទុកយន្តហោះជំនាន់ថ្មី មកជំនួសនាវាផ្ទុកយន្តហោះកញ្ចាស់ៗរបស់ឥណ្ឌាដែលអាចបង្ហោះតែយន្តហោះធុនស្រាល។
មិនតែប៉ុណ្ណោះ អាមេរិកនឹងក្លាយជាអ្នកផ្គត់ផ្គង់យន្តហោះចម្បាំងប្រភេទF-១៦ ឬ F-១៨ ក្នុងក្របខ័ណ្ឌនៃកិច្ចសន្យាយក្សសហផលិតយន្តហោះជាងមួយរយគ្រឿង ដោយមួយចំណែកផលិតនៅឥណ្ឌា។ កិច្ចសន្យានេះមានទម្រង់ដូចគ្នានឹងកិច្ចសន្យាជាមួយបារាំង តែឥណ្ឌាព្រមទិញពីប៉ារីស ត្រឹមយន្តហោះចម្បាំងRafale ៣៦គ្រឿងទេ។
នៅក្នុងដំណើរទស្សនកិច្ចនេះ គេសង្ឃឹមថាអាមេរិកនិងឥណ្ឌា នឹងអាចបង្ហើយកិច្ចព្រមព្រៀងស្តីពីភស្តុភារយោធាដើម្បីសម្រួលប្រតិបត្តិការយោធារួមនៅក្នុងតំបន់ដែលប្រទេសទាំងពីរចរចាគ្នាតាំងពីជាច្រើនឆ្នាំមកហើយ។ កិច្ចព្រមព្រៀង ដែលនឹងសម្រួលកិច្ចការយោធាជាច្រើន ដូចជាអាចធ្វើសមយុទ្ធបន្ទាន់ ឬទិញ-លក់គ្រឿងបន្លាស់អាវុធយុទ្ធភណ្ឌ ប្រេងឥន្ធនៈទៅឱ្យឥណ្ឌា ដោយត្រង់ៗ។
សូមបញ្ជាក់ថា ឥណ្ឌាគឺជាប្រទេសនាំចូលសព្វាវុធធំជាងគេនៅលើពិភពលោក ដោយទិញច្រើនពីរុស្ស៊ី អាមេរិក បារាំង និងអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ