អង្គការក្រៅរដ្ឋាភិបាលព្រួយបារម្ភអំពីការបាត់ខ្លួនអ្នកកាសែតនៅចិន
ក្រោយពីសំណុំរឿងបាត់ខ្លួនបណ្ណាគារិកហុងកុង៥នាក់យ៉ាងចម្លែក រួចលេចខ្លួនត្រលប់មកវិញនៅបីបួនខែបន្ទាប់មក រឿងចម្លែកមួយទៀតបាននិងកំពុងកើតឡើងនៅប៉េកាំងម្តង។ អ្នកកាសែតចិន វ័យជាង៣០ឆ្នាំ ទាក់ទងមិនបានតាំងពីថ្ងៃអង្គារមក។ ភរិយា និងមេធាវី សង្ស័យថាជាចាប់ខ្លួន។ អង្គការការពារសិទ្ធិមនុស្សជាច្រើនទៀត ទម្លាក់ទំនួលខុសត្រូវការបាត់ខ្លួនអ្នកកាសែតរូបនេះទៅលើអាជ្ញាធរប៉េកាំង ដោយភ្ជាប់ហេតុការណ៍ទៅនឹងសំបុត្រចំហមួយអំពាវនាវឱ្យប្រធានាធិបតីចិន ស៊ី ជិនពីង លាលែងពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ជៀជៀ (Jia Jia) ផ្តល់ដំណឹងដល់ប្រពន្ធជាលើកចុងក្រោយ កាលពីថ្ងៃអង្គារទី ១៥មីនា មុននឹងឡើងយន្តហោះទៅកាន់ក្រុងហុងកុង ដើម្បីចូលរួមតាមដានព័ត៌មានក្នុងសិក្ខាសាលាមួយ បើកធ្វើចាប់ពីថ្ងៃព្រហស្បតិ៍ទៅ។ តែនៅពេលឆ្លងរបាំងគយ នៅព្រលានហើយ ស្រាប់តែបាត់ស្រមោលជៀជៀឈឹង និងគ្មានឃើញវត្តមានសោះនៅហុងកុង ! នេះបើតាមអង្គការAmnesty International។
អ្នកសម្របសម្រួលកម្មវិធីដើម្បីអាស៊ីនៃគណៈកម្មាធិការការពារអ្នកកាសែត បានសម្តែងការព្រួយបារម្ភយ៉ាងខ្លាំងនៅថ្ងៃសៅរ៍នេះ ដោយបានអំពាវនាវឱ្យអាជ្ញាធរចេញមុខពន្យល់ពីមូលហេតុនៃការចាប់ខ្លួន ប្រសិនបើជៀជៀ ស្ថិតក្រោមការឃុំឃាំងរបស់ប៉ូលិស។ ចំណែកតំណាងអង្គការHuman Rights Watch បានស្រែកថា ពេលនេះ ចិនមិនមែនត្រឹមតែលុបសាររិញគន់ទេ គឺលុបដល់អ្នកនិពន្ធទៀត។
សម្រាប់ក្រុមអង្គការការពារសិទ្ធិមនុស្ស ការបាត់ខ្លួននេះ ទំនងជាមានទាក់ទងនឹងលិខិតចំហមួយ ដែលសរសេរទាមទារឱ្យប្រធានាធិបតីចុះចេញពីតំណែង។ ចុះហត្ថលេខាដោយសមាជិកពេញសិទ្ធិរបស់បក្សកុម្មុយនិស្ត សំបុត្រនោះបានចោទប្រកាន់ សមមិត្ត ស៊ី ជីនពីង ថាបានបោះបង់គោលការណ៍ដឹកនាំសមូហភាព ដោយផ្តុំអំណាចតែក្នុងដៃឯង ចង់ឱ្យប្រព័ន្ធឃោសនាព័ត៌មាន បម្រើបក្ស មិនមែនបម្រើប្រជាជន។ ប៉ុន្តែលិខិតចំហនេះត្រូវបានលុបចេញវិបសៃត៍ Wujia News ភ្លាមមួយរំពេញ តាំងពីដើមខែម្ល៉េះ។
ចុះតើលិខិតចំហនេះមានពាក់ព័ន្ធអ្វីនឹងអ្នកកាសែត ជៀជៀ ?! គ្មានទេ ! នេះបើតាមមេធាវី ប៉ុន្តែបើតាមអង្គការAmnesty ចិន អ្នកកាសែតយើងទំនងជាបានដឹងរឿងរាវខ្លះទាក់ទងនឹងសំបុត្រនេះ។ ជាទូទៅ បើតាមភាសាកុម្មុយនិស្ត អ្នកកាសែត ឬសកម្មជនដែលពាក់ព័ន្ធ អាចនឹងត្រូវអញ្ជើញដោយចាប់បង្ខំឱ្យពិសាទឹកតែជាមួយអាជ្ញាធរ ក្រែងធ្លោយផ្តល់ព័ត៌មានបានខ្លះៗ។
ជាអ្នកកាសែតវ័យក្មេង មាននិន្នាការល្បីខាងចូលចិត្តធ្វើអត្ថាធិប្បាយអំពីសង្គមនយោបាយ ជៀជៀ បានព្រលយប្រាប់អតីតមិត្តរួមការងារ និងនាយកកាសែត Wujia News ស្តីអំពីការផ្សព្វផ្សាយលិខិតចំហយ៉ាងកម្រវាយប្រហារលើអ្នកកាន់អំណាច។ មុននឹងបាត់ខ្លួន Jia Jia បានបង្ហើប ជាឯកជន ខ្លាចមានការចាប់ខ្លួននេះដែរ។ នេះបើតាមសំដីមិត្តភក្តិជៀជៀ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ