ប្រព័ន្ធប្រកាន់វណ្ណៈ កំពុងអង្រួនឥណ្ឌាក្នុងហិង្សា
បាតុកម្មរបស់ពលរដ្ឋវណ្ណៈកណ្តាលនៅឥណ្ឌា ដើម្បីទាមទារសិទ្ធិសិក្សា និងការងារ បានរាលដាលទៅជាអំពើហិង្សា។ នៅក្នុងរយៈពេលជាងមួយសប្តាហ៍នេះ មានមនុស្សយ៉ាងតិច ១៩នាក់ត្រូវស្លាប់ និងរបួសជាង១៧០នាក់ ហើយប្រព័ន្ធផ្គត់ផ្គង់ទឹកសម្រាប់ប្រជាជនរាប់លាននាក់ត្រូវកាត់ផ្តាច់ មធ្យោបាយធ្វើដំណើរត្រូវជាប់គាំង ស្ថានីយ៍រថភ្លើង-អាគារពិព័រណ៍ត្រូវដុតបំផ្លាញ ... ទាហានច្រើនពាន់នាក់ត្រូវបានដាក់ពង្រាយដើម្បីបង្ក្រាបអំពើហិង្សា។ មកទល់នឹងថ្ងៃអង្គារនេះការប្រឈមមុខដាក់គ្នានៅតែកើតមានឡើង បើទោះបីជាមានកិច្ចព្រមព្រៀងបញ្ចប់ជម្លោះ កាលពីថ្ងៃចន្ទក៏ដោយ។ តើអំពើហិង្សានេះកើតឡើងដោយមកពីមូលហេតុអ្វី?
ចុះផ្សាយនៅថ្ងៃ៖
តាំងពីជាច្រើនខែថ្ងៃមកហើយ ដែលសម្ពាធសហគមបានឡើងតានតឹងខ្លាំង នៅភាគខាងជើងឥណ្ឌា ក្នុងរដ្ឋអារីយ៉ាណា ជាប់នឹងញូវដែលី។ រដ្ឋដែលមានពលរដ្ឋភាគច្រើន (២៩%) ជាវណ្ណៈកសិករ រស់រកស៊ីរំពឹងលើដីស្រែកសិកម្ម ឬហៅថា វណ្ណៈ ហ្សាត Jat។
បាតុកម្មដើម្បីប្តូរវណ្ណៈ
ប៉ុន្តែដីស្រែកសិកម្ម ត្រូវបានរួញបន្តិចម្តងៗ ក្លាយជាចំណីនៃរោងចក្រឧស្សាហកម្ម បូកផ្សំនឹងគ្រោះធម្មជាតិឥតឈប់ឈរ រាំងស្ងួតខ្លាំង ចំណូលកសិកម្មធ្លាក់ថ្លៃជាលំដាប់ ជីវភាពពួកគេជួបការលំបាកកាន់តែខ្លាំងឡើងៗ។ ក្នុងនាមជាពលរដ្ឋក្នុងវណ្ណៈកសិករ ធ្វើដីស្រែចម្ការ ពួកគេគ្មានសិទ្ធិទៅសិក្សានៅថ្នាក់ឧត្តមទេ អត្រាអស់ចេះអក្សរក្នុងសហគមនេះ ខ្ពស់ណាស់។ គ្មានចំណេះដឹង គ្មានសិទ្ធិសិក្សា ពិបាករកការងារធ្វើ មិនអាចរស់បាននឹងរបរកសិកម្មហើយ តើពួកគេអាចរស់បានដោយរបៀបណា ?
កាលពីឆ្នាំទៅ អភិបាលរដ្ឋអារីយ៉ាណា បានព្រមព្រៀងផ្តល់កូតា១០%ទៅឱ្យវណ្ណៈ ហ្សាត សម្រាប់ចូលសិក្សានិងការងាររដ្ឋការ ប៉ុន្តែតុលាការកំពូលបានព្យូរសេចក្តីសម្រេចរបស់រដ្ឋាភិបាលនេះវិញកាលពីខែកក្កដា។ តាំងពេលនោះមក ភាពតានតឹងឡើងខ្លាំង តំណាងថ្នាក់ដឹកនាំវណ្ណៈនេះ បានប្រែក្លាយការគំរាម មកជាបាតុកម្មពិត ទាមទារឱ្យរដ្ឋាភិបាលចាត់ទុកវណ្ណៈហ្សាត ក្នុងចំណោមវណ្ណៈទាបបំផុត ដើម្បីអាចមានសិទ្ធិបានទៅសិក្សា បានចូលធ្វើការនៅក្នុងស្ថាប័នរដ្ឋ។
កាលពីឆ្នាំទៅ វណ្ណៈប៉ាទីដារ វណ្ណៈអ្នករកស៊ី ម្ចាស់ដី ក៏បានដឹកនាំបាតុកម្មហិង្សាក្នុងបំណងតែមួយដូចគ្នានេះដែរគឺ ដើម្បីប្រាក់ខែ និងការសិក្សា។ វណ្ណៈប៉ាទីដារ វណ្ណៈហ្សាត និងវណ្ណៈកណ្តាលផ្សេងៗទៀត ចង់ដើរចេញពីភាពទ័លច្រក ព្រោះពួកគេត្រូវបាន ចាត់ទុកជាអ្នកមានជីវភាពធូរធារមធ្យម មិនអាចទទួលបានកូតាដូចអ្នកវណ្ណៈក្រីក្រ តែនៅអន់ថយមិនអាចប្រៀបនិងរត់ទាន់អ្នកមានវណ្ណៈខ្ពស់បាន។
ឥណ្ឌាសម័យទំនើប មានការប្រកាន់វណ្ណៈ ?
បើតាមច្បាប់រដ្ឋធម្មនុញ្ញ ឥណ្ឌាសម័យថ្មីគ្មានវណ្ណៈទេ ! ប្រព័ន្ធប្រកាន់វណ្ណៈ ត្រូវបានគេចាត់ទុកជាទម្រង់នៃការរើសអើង ក្នុងទម្លាប់ប្រពៃណីបូរាណ ដែលគ្មានហេតុផលអ្វីត្រូវមានវត្តមានក្នុងសង្គមឥណ្ឌាសម័យទំនើប សម័យឧស្សាហកម្ម និងដែលមានសេដ្ឋកិច្ចលូតលាស់ខ្លាំងនោះទេ។
ប្រព័ន្ធប្រកាន់វណ្ណៈ ដែលពីមុនមកបានរារាំងមិនឱ្យពលរដ្ឋក្នុងវណ្ណៈក្រោម និងទាបៗបំផុត មិនឱ្យឆ្លងសហគម ត្រូវបានសាបរលាបបន្តិចម្តងៗទៅតាមពេលវេលាហើយ។ លោក ណារិនដ្រា ម៉ូឌី ជាកូនអ្នកលក់តែ បានក្លាយជានាយករដ្ឋមន្ត្រី ជាភស្តុតាងបញ្ជាក់ថាគ្មានទៀតទេ ការប្រកាន់វណ្ណៈ។
ដើម្បីកាត់បន្ថយការប្រកាន់ និងបែងចែងវណ្ណៈ ដែលមានចាក់ឬសចាក់គល់ក្នុងវប្បធម៌ឥណ្ឌា តាំងពីបូរាណកាលមក ច្បាប់ថ្មីបានចែង កំណត់ជាកូតា ឱ្យពលរដ្ឋក្នុងវណ្ណៈទាប វណ្ណៈក្រោម អាចមានសិទ្ធិចូលសិក្សាដល់ថ្នាក់មហាវិទ្យាល័យ មានសិទ្ធិចូលធ្វើការជាបុគ្គលិករដ្ឋ ដែលអាចធានាជីវភាពរស់នៅបាន។
ប៉ុន្តែការរើសអើង មាក់ងាយចំពោះវណ្ណៈក្រីក្រ នៅតែមានជាសន្ធោសន្ធៅដដែលនៅតាមតំបន់ជនបទ តំបន់គ្មានការអភិវឌ្ឍន៍ ដែលតំណាងឱ្យដល់ទៅជាងពាក់កណ្តាលនៃពលរដ្ឋឥណ្ឌាសរុប។
ហេតុអ្វី ឥណ្ឌានៅបន្តប្រើប្រព័ន្ធកូតាវណ្ណៈ ?
នេះគឺជាប្រធានបទដ៏រសើបបំផុត សម្រាប់អ្នកនយោបាយ។ ប្រព័ន្ធកូតាតាមវណ្ណៈ ត្រូវបានគេមើលឃើញថាជាមធ្យោបាយតែមួយគត់ ដែលអាចផ្តល់សំណាងស្មើៗគ្នាដល់ពលរដ្ឋឥណ្ឌាគ្រប់រូប គ្រប់ស្រទាប់វណ្ណៈ មិនថាជាអ្នកមាននិងអ្នកក្រ។
ប៉ុន្តែបញ្ហានៅត្រង់ថា នៅក្នុងប្រទេសមួយដូចយ៉ាងឥណ្ឌា ដែលមានពលរដ្ឋមួយភាគបួន ជាជនក្រីក្រ មានចំណូលមិនដល់១អឺរ៉ូផងក្នុងមួយថ្ងៃ ហើយជាងនេះទៅទៀត នៅរវាងមួយទសវត្សរ៍ទៀត ចំនួនពលរដ្ឋឥណ្ឌានឹងកើនឡើងលើសពលរដ្ឋចិនទៅទៀត ត្រូវប្រឈមមុខខ្លាំងនឹងបញ្ហាឥតការងារធ្វើ និងធ្វើការមិនគោរពពេលវេលា (ការរំលោភសិទ្ធិការងារបុគ្គលិកកម្មករ)។
ថ្វីបើឥណ្ឌា បាននិងកំពុងស្គាល់កំណើនសេដ្ឋកិច្ច ៧,៣%មែន ប៉ុន្តែឥណ្ឌារងការរិះគន់ច្រើនណាស់ ទាក់ទងនឹងកង្វះខាតផ្នែកទីផ្សារការងារសម្រាប់យុវជន។ ក្នុងមួយឆ្នាំៗ ឥណ្ឌាកត់ត្រាឃើញមានយុវជនយុវនារី រាប់លាននាក់ថ្មីបន្ថែមទៀត កំពុងរង់ចាំស្វែងរកការងារ។ ជាឧទាហរណ៍ជាក់ស្តែង នៅក្នុងរដ្ឋ អារីយាណា គិតចាប់ពីឆ្នាំ១៩៩១មក តម្លៃផលិតផលឧស្សាហកម្មបានកើនឡើង ១០៦៦% តែចំនួនការងារបានកើនឡើងតែ៨០%ប៉ុណ្ណោះ និងបានចាប់ធ្លាក់ចុះជាបន្តបន្ទាប់ទៀត តាំងពីឆ្នាំ២០០៦មក។
ចំពោះការងាររដ្ឋការ គ្រប់គ្នាសម្រុកចង់ក្លាយជាមន្ត្រីបុគ្គលិកក្នុងក្របខ័ណ្ឌរដ្ឋ ដែលជាតួនាទីដ៏មានលំនឹងបំផុត។ ការជ្រើសរើសបុគ្គលិកចូលក្របខ័ណ្ឌស្រូបយកបានយុវជនយុវនារីរាប់ពាន់នាក់ ក្នុងមួយឆ្នាំៗ ប៉ុន្តែបេក្ខជនដែលធ្លាក់តែងមានអារម្មណ៍មកពីប្រព័ន្ធកូតារើសអើងវណ្ណៈ រើសអើងសមត្ថភាព។
ប្រព័ន្ធកូតានេះផ្ទាល់តែម្តង ក៏មានបញ្ហា ព្រោះថ្វីបើស្រទាប់វណ្ណៈទាបបំផុតមានចែងច្បាស់ក្នុងកូតា វណ្ណៈកណ្តាលមធ្យមតែងត្រូវបានមើលរំលង ឯការអនុវត្តអាចប្រែប្រួលទៅតាមរដ្ឋ។ នៅពេលឃោសនាបោះឆ្នោត អ្នកនយោបាយតែងសន្យាសើរើប្រព័ន្ធកូតានេះ បញ្ចុះឬដំឡើងកូតាទៅឱ្យវណ្ណៈនេះ ឬវណ្ណៈនោះ ប៉ុន្តែគ្រាន់តែដើម្បីប្រមូលសំឡេងឆ្នោតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ