ជំនួបកំពូលនៅ California រវាងអាមេរិកនិងអាស៊ានពុំមែនជាការប្រឆាំងនឹងចិនទេ
នៅថ្ងៃអង្គារម្សិលមិញលោក Danny Russel អនុរដ្ឋមន្ត្រីក្រសួងការបរទេសអាមេរិកទទួលបន្ទុកអាស៊ីប៉ាស៊ីហ្វិក បានថ្លែងប្រាប់ដល់ទីភ្នាក់ងារសារព័ត៌មានAP Reuters និង AFP ថា “ជំនួបកំពូលដែលលោកអូបាម៉ា គ្រោងធ្វើឡើងនៅពាក់កណ្តាលខែកុម្ភៈនៅ California ជាមួយនឹងក្រុមប្រទេសនៃតំបន់អាស៊ីភាគអាគ្នេយ៍ ពុំមែនជាការប្រឆាំងនឹងប្រទេសចិននោះឡើយ។ ជាសេចក្តីអះអាងមួយដែលធ្វើឡើងនៅខណៈពេលដែលវ៉ាស៊ីនតោននិងប៉េកាំងកំពុងប្រកួតប្រជែងដណ្តើមឥទ្ធិពល យកឈ្នះរៀងៗខ្លួននៅតំបន់អាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅបាំងតែពីរសប្តាហ៍ប៉ុណ្ណោះលោកប្រធានាធិបតីអាមេរិកនឹងទទួលស្វាគមន៍ថ្នាក់ដឹកនាំប្រទេសសមាជិកតំបន់អាស៊ីភាគអាគ្នេយ៍ចំនួន១០រូបនៅក្នុងជំនួបកំពូលក្រៅផ្លូវការមួយដែលនឹងត្រូវប្រព្រឹត្តទៅនៅថ្ងៃទី១៥និង១៦កុម្ភៈខាងមុខនៅក្រុងSunnylands,រដ្ឋCalifornie ។
ជាជំនួបកំពូលថ្មីទែងរវាងទីក្រុងវ៉ាស៊ីនតោននិងក្រុមប្រទេសអាស៊ានដែលលោក Danny Russel អនុរដ្ឋមន្ត្រីក្រសួងការបរទេសអាមេរិកទទួលបន្ទុកតំបន់អាស៊ីប៉ាស៊ីហ្វិក បានថ្លែងសង្កត់ពាក្យប្រាប់ដល់ក្រុមអ្នកកាសែតបរទេសថា” ជាជំនួបដែលពុំមានពាក់ព័ន្ធអ្វីជាមួយនឹងប្រទេសចិននិងក៏ពុំមែនជាការប្រឆាំងនឹងចិនដែរ”។
លោក Russel បានថ្លែងបន្តទៀតថា”ជំនួបនេះ មានកម្រិតខ្ពស់ បូករូមនឹងការធ្វើវិនិយោគអាមេរិកនារយៈពេល៧ឆ្នាំកន្លងមកនៅអាស៊ីប៉ាស៊ីហ្វិកនិងតំបន់អាស៊ាន”។ ប្រសាសន៍របស់លោក Russel នេះ ហាក់ដូចជាចង់គូសបញ្ជាក់ផងដែរថា “នៅពេលនេះ អាមេរិកកំពុងតែស្វែងរកតុល្យាភាពជាថ្មីឡើងវិញនៅតំបន់អាស៊ី ឬ ក្នុងន័យម្យ៉ាងទៀតអាចនិយាយបានដែរថា “អាមេរិក វិលត្រឡប់ទៅកាន់តំបន់អាស៊ី"។
ការវិលត្រឡប់របស់អាមេរិកទៅកាន់តំបន់អាស៊ីនេះ ក៏ជាយុទ្ធសាស្ត្រមួយរបស់អាមេរិកនៅក្នុងការស្វែងរកកម្លាំងជាន្ថែមនៅតំបន់អាស៊ាន ដើម្បីអាចជាកម្លាំងបន្ថែមនៅក្នុងការទប់ទល់នឹងទម្ងន់មហាយក្ខចិននៅក្នុងតំបន់អាស៊ីប៉ាស៊ីហ្វិក។
សូមបញ្ជាក់ថា ទីក្រុងវ៉ាស៊ីនតោន ខិតខំប្រឹងប្រែងយ៉ាងអស់ពីសមត្ថភាពដើម្បី ឲ្យមានការរួបរួមគ្នាមួយនៅតំបន់អាស៊ីអាគ្នេយ៍ ដោយសារតែប្រទេសមួយចំនួនដែលជាសមាជិក មានការឈ្លោះទាស់ទែងគ្នាយ៉ាងធ្ងន់ធ្ងរជាមួយទីក្រុងប៉េកាំង នៅលើ ជម្លោះដែនសមុទ្រចិនខាងត្បូង។
រីឯចិនវិញ តែងតែទាមទារជានិច្ច ថាដែនសមុទ្រចិនខាងត្បូងនេះ ជាដែនអធិបតេយ្យភាពរបស់ខ្លួន ព្រោះនៅទីនេះ សម្បូណ៌ទៅដោយជលផលនិងប្រេងកាតក៏ព្រមទាំងជាកន្លែងយុទ្ធសាស្ត្រដ៏សំខាន់ សំរាប់ពាណិជ្ចកម្មពិភពលោកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ