យោធាភូមាបោះឆ្នោតដោយគ្មានអ្នកសង្កេតការណ៍
មួយថ្ងៃមុនការបោះឆ្នោតជាប្រវត្តិសាស្ត្រ ដែលនឹងអាចនាំលោកស្រី អ៊ុង សានស៊ូជី ឱ្យបានក្លាយជាអ្នកដឹកនាំប្រទេសនោះ ក្តីព្រួយបារម្ភ មានកាន់តែខ្លាំងនៅថ្ងៃសៅរ៍នេះ ព្រោះនៅទីបំផុត ការបោះឆ្នោតមុនកាលកំណត់របស់ក្រុមយោធា ប្រព្រឹត្តទៅដោយគ្មានការចូលរួមពីសំណាក់អ្នកសង្កេតការណ៍អន្តរជាតិទេ។ ថ្ងៃបោះឆ្នោតកាន់តែខិតមកដល់ ភាពភ័យខ្លាចមានកាន់តែខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កាលពីថ្ងៃទី ២០តុលា ប្រធានក្រុមសង្កេតការណ៍អឺរ៉ុប បានអបអរ និងកោតសរសើរមេទ័ពភូមា ដែលបានព្រមព្រៀង ជាលាយលក្ខណ៍ឱ្យអ្នកសង្កេតការណ៍បានចូលទៅក្នុងបន្ទាយតាមដានការបោះឆ្នោត។ សម្រាប់អឺរ៉ុប ក្រុមយោធាភូមា ពិតជាមានឆន្ទៈល្អ ដូចឆ្នាំ២០១១ ដែលរបបសឹកសុខចិត្តដោះឯកសណ្ឋានមកដឹកនាំប្រទេសតាមបែបស៊ីវិល។
ប៉ុន្តែនៅថ្ងៃនេះ គឺមានតែការខកចិត្ត។ ពាក្យសន្យាមិនត្រូវបានគោរព ក្រុមអ្នកសង្កេតការណ៍អឺរ៉ុបមិនអាចចូលទៅបន្ទាយទាហានបាន ! ដូច្នេះតើអាចនិយាយអំពីការបោះឆ្នោតប្រកបដោយតម្លាភាពបានយ៉ាងដូចម្តេចទៅ ?! ភូមាមានទាហានប្រមាណពី៤ទៅ៥សែននាក់ ដែលជាចំនួនមិនអាចមើលស្រាលបានឡើយបើប្រៀបទៅនឹងចំនួនពលរដ្ឋមានសិទ្ធិបោះឆ្នោតជាង៣០លាននាក់។
ប្រឈមមុខនឹងស្ថានការណ៍បែបនេះទាំងពលរដ្ឋភូមា ទាំងអ្នកសង្កេតការណ៍អឺរ៉ុប សុទ្ធតែបង្កើនក្តីព្រួយបារម្ភទ្វេឡើង។ ជាងនេះទៅទៀត មួយរយៈចុងក្រោយនេះ ប្រធានាធិបតីភូមា ដែលជាអតីតឧត្តមសេនីយ៍ និងជាអតីតនាយករដ្ឋមន្ត្រីរបបសឹក បានបង្កើនការគំរាមកំហែងគ្រប់បែបយ៉ាង។ ថ្វីបើនៅថ្ងៃល្ងាចមិញ លោក ថេន សេន បានប្រកាសតាមកញ្ចក់ទូរទស្សន៍ ថារដ្ឋាភិបាលនិងយោធានឹងទទួលស្គាល់លទ្ធផលឆ្នោតមែន តែតំណាងអង្គការក្រៅរដ្ឋាភិបាល Human Rights Watch ក្រែងថាប្រធានាធិបតីរូបនេះ មិនអាចប្រកាន់ជំហរបានរឹងមាំ ក្រសោបអតីតយោធាគ្រាក់ៗក្នុងរបបចាស់ឱ្យដើរតាមគន្លងតែមួយបាន។
បក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី អ៊ុងសានស៊ូជី ព្រួយអំពីការលួចបន្លំសន្លឹកឆ្នោត នាឱកាសនេះ។ ឯការបោះឆ្នោតនៅបរទេស បានប្រព្រឹត្តយ៉ាងច្របូកច្របល់។ ក្នុងពេលរង់ចាំ ពលរដ្ឋភូមាគ្មានអ្វីរំពឹង ក្រៅអំពីយកអបិយជំនឿមកធ្វើត្រីមុខ ទាយថាថ្ងៃទី៨ វិច្ឆិកា ជាថ្ងៃជោគជ័យសម្រាប់ស្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ