ប៉ូលិសថៃភ្ជាប់ភេរវកម្មនៅវត្តព្រះភូមិ ទៅនឹងក្រុមជួញដូរមនុស្ស ដោយមានការលូកដៃពីបក្សប្រឆាំង
ប៉ូលិសថៃ បានបរិហារនៅល្ងាចថ្ងៃចន្ទទី ២៨ កញ្ញានេះ ថាបក្សប្រឆាំងនយោបាយមានលូកដៃក្នុងភេរវកម្មមរណៈនៅក្រុងបាងកក កាលពីថ្ងៃទី ១៧សីហា ដោយបានអះអាងបន្ថែមទៀតថា អំពើភេរវកម្មបំផ្ទុះគ្រាប់បែកនេះ ជាទង្វើសងសឹករបស់ក្រុមឈ្មួញមេខ្យល់ជួញដូរមនុស្ស ដែលយកកំហឹងរបស់ពួកជនជាតិភាគតិចអ៊ីស្លាមចិនមកបូកបញ្ចូលគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
“គឺជាស្នាដៃរបស់មនុស្សពីរក្រុមដែលមានបំណងដូចគ្នាតែមួយ ... ប្រើគ្នាទៅវិញទៅមក” ! នេះជាសេចក្តីប្រកាសបង្កប់អត្ថន័យរបស់មេប៉ូលិសថៃ ក្នុងសន្និសីទកាសែត ដែលចាត់ទុកដូចជាការបិទបញ្ចប់សំណុំរឿងស៊ើបអង្កេតភេរវកម្មនៅក្រុងបាងកក។
ប៉ូលិសថៃជឿជាក់ថា មូលហេតុនៃភេរវកម្មកាលពីថ្ងៃទី ១៧ សីហា គឺសងសឹកប្រឆាំងនឹងនយោបាយរបស់រដ្ឋាភិបាល ក្នុងការបោសសម្អាតបណ្តាញជួញដូរមនុស្ស។ ភេរវកម្មដែលបានសម្លាប់ជីវិតមនុស្ស២០នាក់ ក្នុងនោះ១៤នាក់ជាបរទេស គ្មានម្ចាស់ទេ ! បន្ទាប់ពីសំដៅទិសតាមដានលើក្រុមអ៊ុយហ្គួរ ជនជាតិភាគតិចកាន់សាសនាអ៊ីស្លាមចិន ថាសហការជាមួយក្រុមជួញដូរមនុស្សមក ប៉ូលិសថៃបានព្រលយជាសាធារណៈលទ្ធភាពទីបី គឺការលូកដៃរបស់បក្សប្រឆាំងនយោបាយ។
បើតាមមេប៉ូលិសថៃ ដែលច្រានចោលដាច់ខាត អំពើភេរវកម្មអន្តរជាតិ បានអះអាងថា ភាពប្រេះឆាក្នុងជីវិតនយោបាយថៃរាប់សិបឆ្នាំកន្លងមក អាចមានពាក់ព័ន្ធនឹងសំណុំរឿងភេរវកម្មនេះ។ នៅក្នុងពេលអង្កេត ប៉ូលិសថៃបានរកឃើញថាក្រុមធ្វើភេរវកម្មនៅក្រុងបាងកកនេះ ទំនងជាបានជួយជនសង្ស័យបង្កភេរវកម្មបំផ្ទុះគ្រាប់បែកកាលពីឆ្នាំ២០១០ និង២០១៤។ ដូច្នេះហើយបានជាប៉ូលិសថៃមិនអាចច្រានចោលមូលហេតុនយោបាយដែលនាំដល់ការធ្វើភេរវកម្មទេ។
ការចោទប្រកាន់បក្សប្រឆាំងពីសំណាក់អាជ្ញាធរសឹកថៃ គ្មានអ្វីគួរឱ្យភ្ញាក់ផ្អើលទេ ប៉ុន្តែនេះគឺជាលើកទីមួយ ដែលប៉ូលិសថៃបានភ្ជាប់ភេរវកម្មក្រុងបាងកកថ្ងៃទី ១៧សីហា ទៅនឹងបក្សប្រឆាំងស្និទ្ធនឹងត្រកូលថាក់ស៊ីន ត្រកូលអ្នកសាធារណរដ្ឋដ៏គ្រោះថ្នាក់សម្រាប់ក្រសែភ្នែកអ្នករាជានិយម។
កាលពីថ្ងៃសៅរ៍ ប៉ូលិសថៃ បានសាកល្បងរៀបចំឆាកឈុតភេរវកម្មឡើងវិញ ជាមួយវត្តមានជនសង្ស័យចាប់បានទាំងពីរ។ ជនសង្ស័យទីមួយ ឈ្មោះ Bilal Mohammed Adem Karadag បើតាមលិខិតឆ្លងដែនតួកគី ជាអ្នកធ្វើភេរវកម្ម និងជនសង្ស័យទីពីរឈ្មោះ Yusufu Mieraili ជាអ្នកចុចទូរស័ព្ទឱ្យបំផ្ទុះគ្រាប់បែកក្នុងកាបូប ស្ពាយខ្នង ដែល ប៊ីឡាល យកទៅផ្លុងចោលនៅក្នុងបរិវេណទីសក្ការៈព្រះភូមិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ