អូបាម៉ាសុំទោសលោកអាបេ រឿងអាមេរិកលបធ្វើចារកិច្ចសម្ព័ន្ធមិត្តជប៉ុន
ប្រធានាធិបតីអាមេរិក លោក បារ៉ាក់ អូបាម៉ា បានថ្លែងសុំទោសជប៉ុន នៅថ្ងៃពុធនេះ បន្ទាប់ពីមានពាក្យចចាមអារាមបង្ហើបដោយវីគីលីក ថា វ៉ាស៊ីនតោន ទំនងជាបានលបធ្វើចារកិច្ចឥស្សរជននយោបាយជាន់ខ្ពស់ជប៉ុន ដែលជាសម្ព័ន្ធមិត្តដ៏ជិតដិតរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
តាមរយៈកិច្ចសន្ទនាតាមទូរស័ព្ទ លោកប្រធានាធិបតីអាមេរិក បារ៉ាក់ អូបាម៉ា បានសម្តែងការសោកស្តាយជាពន់ពេកចំពោះរឿងអាស្រូវចារកិច្ចអាមេរិក ដែលបានធ្វើជប៉ុនចោទជាសំណួរតស៊ូមតិយ៉ាងពុះកញ្ជ្រោលឡើង។ ចំណែកលោកអាបេវិញ ដូចធ្លាប់បានទូរស័ព្ទនិយាយជាមួយអនុប្រធានាធិបតី លោក ចូ បៃដិន លោកនាយករដ្ឋមន្ត្រី បានរំលឹកថា ប្រសិនបើឥស្សរជនជប៉ុនដែលវីគីលីកបានលើកឡើងសុទ្ធតែស្ថិតក្រោមការដានចារកិច្ចរបស់អាមេរិកមែន នោះជប៉ុននឹងពិតជាមិនអាចមានទំនាក់ទំនងជាអាមេរិកប្រកបដោយទំនុកចិត្តបានឡើយ។ នេះបើតាមការគូសបញ្ជាក់របស់អ្នកនាំពាក្យរដ្ឋាភិបាលជប៉ុន នាឱកាសធ្វើសន្និសីទកាសែតប្រចាំថ្ងៃ។
រដ្ឋាភិបាលជប៉ុនធ្លាប់បានអះអាងរួចមកហើយ កាលពីដើមខែសីហា ថាសកម្មភាពចារកិច្ចរបស់អាមេរិក ប្រសិនបើជាពិត នោះពិតជាទង្វើដ៏គួរឱ្យសោកស្តាយបំផុត។ តែជាប្រតិកម្មដែលហាក់ដូចជាស្រាលខ្លាំងណាស់បើប្រៀបទៅនឹងកំហឹងរបស់បារាំង ឬអាល្លឺម៉ង់ ក្នុងរឿងចារកិច្ចអាមេរិកនេះ។
វីគីលីក វិបសៃត៍មានឯកទេសខាងផ្សព្វផ្សាយឯកសារសម្ងាត់ បានបង្ហើបឱ្យដឹងកាលពីថ្ងៃទី ៣១កក្កដា ថា អាមេរិកបានឈ្លបស្តាប់អ្នកទទួលខុសត្រូវជាន់ខ្ពស់ក្នុងជួររដ្ឋាភិបាល ក្រុមហ៊ុនធំៗ ព្រមទាំងអភិបាលធនាគារកណ្តាលជប៉ុន។ ប៉ុន្តែខុសពីករណីលោកហ្វ្រង់ស័រហូឡង់ ប្រធានាធិបតីបារាំង និងលោកស្រីប្រមុខរដ្ឋាភិបាលអាល្លឺម៉ង់ លោកអាបេ ទំនងជាមិនរងការធ្វើចារកិច្ចដោយផ្ទាល់ទេ។
អាមេរិកនិងជប៉ុន ជាសម្ព័ន្ធមិត្ត ដ៏ស្អិតល្មួត ! ប្រទេសទាំងពីរតែងតែប្រាស្រ័យទាក់ទងគ្នាយ៉ាងញឹកញយលើវិស័យការពារជាតិ និងមានកិច្ចសហប្រតិបត្តិការយ៉ាងសកម្មក្នុងវិស័យសេដ្ឋកិច្ច។ អាមេរិកតែងបង្ហាញឆន្ទៈគាំទ្ររដ្ឋាភិបាលជប៉ុនរហូតមក។ ឆ្លៀតក្នុងឱកាសសុំទោសនេះ អាមេរិករបស់លោកអូបាម៉ា បានបញ្ជាក់ជាថ្មីជំហរគាំទ្រសេចក្តីថ្លែងការណ៍របស់លោកអាបេ កាលពីថ្ងៃរំលឹកខួប៧០ឆ្នាំនៃការចាញ់សង្គ្រាមលោកលើកទីពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ