ឧបទ្វីបកូរ៉េ ៖ តំបន់គ្មានកងទ័ពក្រោមសម្ពាធជាអចិន្ត្រៃយ៍
ភាពតានតឹងក្នុងឧបទ្វីបកូរ៉េបានឡើងមួយកំរិតទៀត នៅថ្ងៃចន្ទនេះ ក្នុងខណៈដែលកូរ៉េទាំងពីរកំពុងត្រៀមខ្លួនប្រារព្ធខួប៧០ឆ្នាំ នៅថ្ងៃសៅរ៍ខាងមុខ -ខួបនៃការរំដោះប្រទេសចេញពីនឹមជប៉ុន នៅឆ្នាំ១៩៤៥។ កូរ៉េខាងត្បូងបានចោទប្រកាន់របបក្រុងព្យុងយ៉ាងថាបានដាក់មីនក្នុងតំបន់គ្មានកងទ័ព បណ្តាលឱ្យទាហានកូរ៉េខាងត្បូង ដែលកំពុងបំពេញការងារត្បាតតាមបណ្តោយព្រំដែន ពីរនាក់របួសដាច់ជើង។ ប្រឈមមុខនឹងទង្វើរំលោភបទឈប់បាញ់នេះ កូរ៉េខាងត្បូងបានគំរាមថានឹងធ្វើការសងសឹក ដោយបើកយុទ្ធនាការឃោសនាដាក់មីក្រូប្រឆាំងកូរ៉េខាងជើង នៅតាមព្រំដែនឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥១
បើតាមក្រសួងការពារជាតិកូរ៉េខាងត្បូង មានមីនបីគ្រាប់បានផ្ទុះ ហើយជាគ្រាប់មីនដែលរបបព្យុងយ៉ាងបានលួចចូលមកដាក់បង្កប់ដោយចេតនា ក្នុងបំណងតែមួយគឺដើម្បីសម្លាប់ទាហានរបស់សត្រូវ។
គ្រាប់មីនដាក់បង្កៃថ្មីៗ
មេបញ្ជាការយោធារបស់អង្គការសហប្រជាជាតិ ដែលទទួលបន្ទុកត្រួតពិនិត្យការអនុវត្តបទឈប់បាញ់ ក៏បានចេញសេចក្តីថ្លែងការប្រកាសលទ្ធផលនៃការអង្កេតរបស់ខ្លួនដែរ ដែលបញ្ជាក់ថា មិនមែនជាគ្រាប់មីនចាស់ សល់ពីសម័យសង្គ្រាម ឬកប់សល់តាំងពីមុនមកទេ។ ជាគ្រាប់មីនទើបដាក់បង្កប់ថ្មីៗ។ កូរ៉េខាងជើង ទំនងជាបានលួចឆ្លងចូលមកដោយសម្ងាត់ ក្នុងតំបន់សន្តិសុខរួម នៃតំបន់គ្មានកងទ័ព ប្រចាំឧបទ្វីបកូរ៉េ បង្កប់មីនដាក់លើចំផ្លូវ ដែលទាហានកូរ៉េខាងត្បូង តែងដើរត្បាត និងដែលឮពួកគេដឹងនិងស្គាល់ច្បាស់។
បើតាមការប៉ាន់ស្មាន មានគ្រាប់មីនជាងមួយលានគ្រាប់ ត្រូវបានគេដាក់ពង្រាយនៅតាមតំបន់ព្រំដែនខណ្ឌចែកកូរ៉េទាំងពីរ។ មីនមួយភាគធំជាគ្រាប់មិនទាន់ផ្ទុះ ដែលទាហានជើងអាកាសបានទម្លាក់ពីយន្តហោះ នៅអំឡុងសង្គ្រាមត្រជាក់ នាទសវត្សរ៍ឆ្នាំ១៩៦០ ពោលគឺជាពេលដែលមានការប្រឈមមុខគ្នាខ្លាំងជាមួយកូរ៉េខាងជើង។
ព្រំដែនដែលមានកម្លាំងយោធាច្រើនជាងគេបំផុតនៅលើពិភពលោក
បើនិយាយតាមភាសាបច្ចេកទេស កូរ៉េខាងជើងនិងខាងត្បូង ជាប្រទេសមានសង្គ្រាមនឹងគ្នានៅឡើយទេ។ ជម្លោះរវាងបងប្អូនបង្កើតគូសត្រូវនឹងគ្នា ត្រូវបានបិទបញ្ចប់ដោយការព្រមព្រៀងឈប់បាញ់ មិនមែនដោយសន្ធិសញ្ញាសន្តិភាពទេ។ នៅឆ្នាំ១៩៥៣ សេអ៊ូលនិងព្យុងយ៉ាងបានចុះហត្ថលេខាលើបទឈប់បាញ់ និងបង្កើតជាតំបន់គ្មានកងទ័ពឡើង។
តំបន់គ្មានកងទ័ព ដែលមានប្រវែង២៥០គីឡូម៉ែត្រ ទទឹង៤គីឡូម៉ែត្រ គូសខណ្ឌចែកកូរ៉េទាំងពីរ ត្រង់បន្ទាប់ខ្សែស្របទី៣៨ តាំងពីជាង៦០ឆ្នាំ គឺជាតំបន់ទ្រនាប់ ជាចំការមីន រនាំងរថពាសដែក មានប៉ុស្តិទាហានយាម ឬជាចំរឹងដែក ព័ទ្ធលួស ... នៅកណ្តាលតំបន់គ្មានកងទ័ព មានបន្ទាត់ខណ្ឌចែកប្រទេសទាំងពីរ ដែលជាព្រំដែនពិតកាត់ចែកប្រទេសទាំងពីរ មានទីស្នាក់ការអង្គការសហប្រជាជាតិ អាគារខៀវៗ ដែលជាគណៈកម្មការយោធាទទួលបន្ទុកត្រួតពិនិត្យការអនុវត្តបទឈប់បាញ់ និងសម្រាប់ទទួលឱ្យទាហានទាំងពីរភាគីចរចាគ្នា។ ខាងត្បូងបន្ទាត់ព្រំដែនខាងកូរ៉េខាងត្បូងមានផ្ទះសេរីភាព។ នៅខាងជើង គឺមានសំណង់បែបរចនាបទសូវៀតPanmungak ជាបន្ទាយទាហាន។
ថ្វីបើគេដឹងថាកូរ៉េខាងជើងមានប្រមូលផ្តុំកម្លាំងទ័ពប្រមាណ១,២លាននាក់ ឯកូរ៉េខាងត្បូងមានកម្លាំងទ័ព៦៥៥០០០នាក់ បូកបន្ថែមនឹងកម្លាំងទ័ពជំនួយអាមេរិក ២៨០០០នាក់មែន ប៉ុន្តែគេមិនបានដឹងអំពីចំនួនទាហានពិតប្រាកដឈរជើងនៅតំបន់គ្មានកងទ័ពនេះទេ ព្រោះជាការសម្ងាត់យោធា។ សេអ៊ូលបញ្ចេញតែតួលេខទេសចរធ្វើដំណើរទៅទស្សនាតំបន់នោះថាមានដល់ទៅ ១សែននាក់ក្នុងមួយឆ្នាំៗ។ អ្នកជំនាញប៉ាន់ស្មានថា ភាគីម្ខាងផ្តុំកម្លាំងឈរជើងប្រមាណពី ៦០ទៅ៧០% តាមបណ្តោយព្រំដែន។
រូងដីឈ្លានពាន
មិនតែប៉ុណ្ណោះ ព្យុងយ៉ាងបានលួចជីករូងក្រោមដី ក្រោមតំបន់គ្មានកងទ័ព ដើម្បីសម្រុកចូលទៅកូរ៉េខាងត្បូងបាន។ រូងដីដែលគេស្គាល់ច្បាស់ជាងគេ គឺរូងជម្រៅ៧៣ម៉ែត្រ ក្រោមដី នៅខាងត្បូងអាគារការិយាល័យអង្គការសហប្រជាជាតិតែម្តង។ រកឃើញនៅឆ្នាំ១៩៧៨ រូង ដែលមានប្រវែង១,៧គីឡូម៉ែត្រ កម្ពស់និងទទឹងពីរម៉ែត្រ អាចបញ្ជូនទាហានបាន៣ម៉ឺននាក់ឆ្លងកាត់ក្នុងម៉ោងៗ ទំនងជាធ្វើឡើងសម្រាប់វាយឆ្មក់លើក្រុងសេអ៊ូល ដែលស្ថិតនៅចម្ងាយប្រមាណតែ៥០គីឡូម៉ែត្រពីតំបន់គ្មានកងទ័ព។ដូច្នេះ ក្នុងស្ថានភាពជាក់ស្តែង តំបន់គ្មានកងទ័ពនេះ មិនដូចជាពាក្យហៅទេ ព្រោះជាតំបន់ដែលមានកម្លាំងយោធាច្រើនជាងគេបំផុតនៅលើពិភពលោក។ ជាព្រំប្រទល់ដែលមានកម្លាំងយោធាខ្លាំងជាងគេបំផុតនៅលើលោក និងជាតំបន់ដែលប្រកបដោយភាពតានតឹងជាអចិន្ត្រៃយ៍ អាចផ្ទុះអាវុធ បង្កសោកនាដកម្មភ្លាម បានគ្រប់ពេលវេលា។
ការប្រឈមមរណៈ
ជាក់ស្តែង ការប្រយុទ្ធដ៏ខ្លាំងដល់ស្លាប់ផង ធ្លាប់បានកើតឡើងម្តង កាលពីថ្ងៃទី ១៨ សីហា ១៩៧៦ ក្នុងពេលកងទ័ពកូរ៉េខាងត្បូងនិងអាមេរិក កាប់ដើមឈើ តែត្រូវទាហានកូរ៉េខាងជើងជំទាស់ ព្រោះជាដើមដែលអគ្គមគ្គុទេសក៍គីម អ៊ីលស៊ុងជាអ្នកដាំដោយផ្ទាល់ដៃ។ ដោយកម្លាំងទាហានច្រើនជាង លទ្ធផលទាហានអាមេរិកស្លាប់ពីរនាក់ ម្នាក់ជាមេបញ្ជាការផង។
ក្រោយមកថ្វីបើគ្មានប្រយុទ្ធគ្នាផ្ទាល់ជាទ្រង់ទ្រាយធំដូចឆ្នាំ១៩៧៦មែន ប៉ុន្តែការបាញ់រះ តូចតាចតែកើតមានជារឿយៗ រដ្ឋាភិបាលក្រុងសេអ៊ូល មិនទទួលខុសត្រូវទេបើទេសចរនិងពលរដ្ឋធ្វើដំណើរទៅតំបន់គ្មានកងទ័ពនេះ និងមិនគោរពតាមវិន័យដ៏តឹងរ៉ឹងរបស់ទាហានអ្នកឈរជើងប្រចាំការនៅទីនោះ។
ការវាយប្រហារគ្នាដោយផ្ទាល់ចុងក្រោយ ប្រឆាំងនឹងកូរ៉េខាងត្បូង គឺនៅខែធ្នូ ២០១០ ក្រោយពីព្យុងយ៉ាងបានទម្លាក់គ្រាប់លើកោះយ៉ុងព្យុនដើម្បីប្រឆាំងនឹងសមយុទ្ធរបស់សេអ៊ូលនៅតាមព្រំដែន។ ការទម្លាក់គ្រាប់ដែលបានសម្លាប់ជីវិតទាហានកូរ៉េខាងត្បូងពីរនាក់ និងស៊ីវិល២នាក់។ ការ សេអ៊ូលបានផ្លោងគ្រាប់ទៅលើទីតាំងកូរ៉េខាងជើងវិញ ដែលគ្រប់គ្នាព្រួយខ្លាចរាលដាលជាជម្លោះធំ។
នៅថ្ងៃនេះ កូរ៉េខាងត្បូងបានប្រកាសថានឹងធ្វើការសងសឹក ឱ្យសក្តិសម តបទៅនឹងទង្វើរបស់កូរ៉េខាងជើង ដែលរំលោភបទឈប់បាញ់ ដោយចេញបញ្ជាឱ្យទាហានតាមព្រំដែនធ្វើសង្គ្រាមមនោគមវិជ្ជា បើកមីក្រូឃោសនាប្រឆាំងនឹងឥរិយាបថរបស់កូរ៉េខាងជើង។ សង្គ្រាមឃោសនាតាមឧឃោសនាស័ព្ទ ដែលសេអ៊ូលបញ្ឈប់សកម្មភាពអស់១១ឆ្នាំហើយ ទំនងជានឹងធ្វើឱ្យព្យុងយ៉ាងខឹងសម្បារកាន់តែខ្លាំង សម្ពាធក្នុងឧបទ្វីបកាន់តែតានតឹងខ្លាំងជាប្រាកដ។ បើតាមអ្នកវិភាគ វាពិបាកនឹងបញ្ចេញសកម្មភាពសងសឹកឱ្យសមទោសណាស់ ក្នុងស្ថានភាពជាក់ស្តែង។ ព្យុងយ៉ាងរំលោភបទឈប់បាញ់មែន ប៉ុន្តែគេក៏មិនត្រូវនាំស្ថានការណ៍ឱ្យធ្លាក់ក្នុងអន្ទាក់អ្នកញុះញង់ និងគ្រប់គ្រងលែងបាននោះ ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ