អាមេរិកអរគុណចិនលើរឿងនុយក្លេអ៊ែររបស់អឺរ៉ង់
កាលពីថ្ងៃអង្គារម្សិលមិញ សេតវិមានបានឲ្យដឹងថា លោកប្រធានាធិបតី បារ៉ាក់ អូបាម៉ា បានប្រាស្រ័យទាក់ទងតាមទូរស័ព្ទជាមួយប្រធានាធិបតីចិន ស៊ីជិនពីង កាលពីថ្ងៃច័ន្ទ ដើម្បីថ្លែងអំណរគុណចំពោះចិន ដែលបានដើរតួនាទី ដើម្បីទទួលបានកិច្ចព្រមព្រៀងលើកម្មវិធីនុយក្លេអ៊ែររបស់ប្រទេសអឺរ៉ង់។
ចុះផ្សាយនៅថ្ងៃ៖
សេតវិមានបានឲ្យដឹងថា លោក អូបាម៉ាបានសម្តែងនូវការដឹងគុណតាមទូរស័ព្ទចំពោះប្រទេសចិនដែល បានដើរតួនាទីក្នុងការនាំឲ្យសម្រេចបាននូវកិច្ចព្រមព្រៀងជាប្រវត្តិសាស្រ្តស្តីពីនុយក្លេអ៊ែរ សម្រាប់រយៈពេលវែង រវាងម្ខាងសមាជិកអចិន្រ្តៃយ៍ទាំងប្រាំរបស់ក្រុមប្រឹក្សាសន្តិសុខ (សហរដ្ឋអាមេរិក ចិន រុស្ស៊ី បារាំង និងអង់គ្លេស) បូកជាមួយ អាល្លឺម៉ង់ និងម្ខាងទៀតប្រទេសអៀរ៉ង់។
ប្រមុខរដ្ឋទាំងពីរបានយល់ស្របគ្នាលើសារៈសំខាន់ដ៏ចំបងក្នុងការបន្តកិច្ចសហប្រតិបត្តិការរវាងសហរដ្ឋអាមេរិកនិងប្រទេសចិនដើម្បីធានាឲ្យបាននូវការអនុវត្តន៍កិច្ចព្រមព្រៀងដែលបានចុះកាលពីថ្ងៃទី១៤ខែកក្កដានៅទីក្រុងវីយែនកាលពីថ្ងៃអង្គារសប្តាហ៍កន្លងទៅនេះ ដែលជាលទ្ធផលនៃកិច្ចចរចាដ៏ស្មុគស្មាញ និងដ៏យូរអស់រយៈពេលជាង១២ឆ្នាំ។
តាមរយៈកិច្ចព្រមព្រៀងនេះ ទីក្រុងតេអេរ៉ង់ បានយល់ព្រមកាត់បន្ថយសមត្ថភាពនុយក្លេអ៊ែររបស់ខ្លួន ជាថ្នូរនឹងការលើកលែងបន្តិចម្តងៗនូវការដាក់ទណ្ឌកម្មអន្តរជាតិដែលបានច្របាច់កសេដ្ឋកិច្ចរបស់អឺរ៉ង់ ក្នុងរយៈកាលកន្លងមកនេះ។
ក្នុងការប្រាស្រ័យទាក់ទងតាមទូរស័ព្ទដដែលនោះ សេតវិមានក៏បានបង្ហើបឲ្យដឹងថា លោកប្រធានាធិបតី អូបាម៉ា ទន្ទឹងទាំង«អន្ទះសារ» ចាំទទួលជួបលោកប្រធានាធិបតីចិន ស៊ីជិនពីងដែលនឹងមកទស្សនកិច្ចសេតវិមាន នៅខែកញ្ញាខាងមុខនេះ នេះបើតាមសារពត៌មាន AFP។
គួររំលឹកថាក្រៅពីប្រធានបទមួយចំនួនដែលអាមេរិកនិងចិនយល់ស្របគ្នាមាន បញ្ហានុយក្លេអ៊ែរ អឺរ៉ង់ កូរ៉េខាងជើង បញ្ហាបម្រែបម្រួលអាកាសធាតុ សង្គ្រាមនៅមជ្ឈឹមបូព៌ា និងជំនួយមនុស្សធម៌ ក៏មានរឿងមួយចំនួនផ្សេងទៀត ដែលប្រទេសមហាអំណាចទាំងពីរមិនត្រូវរ៉ូវគ្នាផងដែរ ពិសេសពេលថ្មីៗនេះគឺ បញ្ហា ស្តីពីមហិច្ឆតារបស់ប្រទេសចិនលើដែនសមុទ្រចិនខាងត្បូង ដែលអាមេរិកយល់ថាជាការរំលោភច្បាប់អន្តរជាតិ និងបញ្ហាចោរកម្មពត៌មានវិទ្យានៅអាមេរិក ដែលអាមេរិកសង្ស័យនិងចោទប្រកាន់ថា ជាទង្វើរបស់រដ្ឋាភិបាលចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ