ប្រមុខរដ្ឋាភិបាលឥណ្ឌា ផ្តើមទស្សនកិច្ចរយៈពេល៨ថ្ងៃ នៅអាស៊ីកណ្តាល និង រុស្ស៊ី
ដំណើរទស្សនកិច្ចវែងឆ្ងាយនេះ ត្រូវបាន លោកនាយករដ្ឋមន្ត្រីឥណ្ឌា Narendra Modi ចាប់ផ្តើម ថ្ងៃ៦កក្កដានេះ គឺពីសាធារណរដ្ឋ អ៊ូសបេគីស្ថាន បន្ទាប់មក គឺ កាហ្សាក់ស្ថាន រួចពីថ្ងៃ ៨ដល់ទី១០កក្កដា គាត់នឹងវត្តមាននៅក្រុង Oufa ប្រទេសរុស្ស៊ី ចូលរួម ក្នុងជំនួបកំពូល នៃក្រុម៥ប្រទេសធំៗ ហៅថា BRICS និង ក្នុងជំនួបកំពូល នៃ “អង្គការសហប្រតិបត្តិការក្រុងសៀងហៃ” ហៅថា OCS។ ហើយពីថ្ងៃ១០ដល់១៣កក្កដា ប្រមុខរដ្ឋាភិបាលឥណ្ឌា នឹងបង្ហើយដំណើរទស្សនកិច្ចខ្លួន នៅតាម៣រដ្ឋឯករាជ្យទៀត នៃតំបន់អាស៊ីកណ្តាល គឺ តួគ្មេនីស្ថាន កៀហ្ស៊ីស៊ីស្ថាន និង តាហ្ស៊ីគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ជាលទ្ធផលទស្សនកិច្ចផ្លូវការនៅក្រុង Tachkent ថ្ងៃ៦កក្កដានេះ តាមសេចក្តីអញ្ជើញនៃលោកប្រធានាធិបតី អ៊ូសបេគីស្ថាន Islam Karimovគូភាគី បានចេញសេចក្តីថ្លែងការណ៍រួម អ៊ូសបេគីស្ថាន - ឥណ្ឌា និងបានចុះកិច្ចព្រមព្រៀងអន្តរដ្ឋាភិបាលមួយចំនួន ឆ្ពោះទៅពង្រឹង សហប្រតិបត្តិការពហុវិស័យរវាងប្រទេសទាំងពីរ។ លោកនាយករដ្ឋមន្ត្រី Narendra Modi បាន ជួបជាមួយបណ្ដាសាស្ត្រាចារ្យអ៊ូសបេគីស្ថាន ខាងសិក្សាវប្បធម៌ឥណ្ឌា និងនិស្សិតអ៊ូសបេកណា ដែលរៀនភាសា Hindi រួចជាពិសេស គាត់បានសម្ពោធសហគ្រាសចម្រុះ ឥណ្ឌា-អ៊ូសបេក ខាងផលិតជីអាសូត។
ក្នុងសារផ្ញើជូនលោកប្រធានាធិបតី កាហ្សាក់ស្ថាន Noursultan Nazarbayev លោកនាយករដ្ឋមន្ត្រីឥណ្ឌា Narendra Modi រំពឹងថា ទស្សនកិច្ចគាត់នៅ កាហ្សាក់ស្ថាន នឹងពង្រីកលទ្ធភាព សម្រាប់ការស៊ីជម្រៅ និង ការបង្កើនឲ្យសម្បូរបែបទំនាក់ទំនងរវាងប្រទេសទាំងពីរ។ មិនតែប៉ុណ្ណោះ តាមដែលលោកឯកអគ្គរដ្ឋទូតកាហ្សាក់ស្ថាននៅឥណ្ឌា បង្ហើបឲ្យដឹងក្នុងបរិបទទស្សនកិច្ចនេះ គូភាគីនឹងសម្របយោបល់គ្នា ទៅលើ “ប័ណ្ណនាំផ្លូវ” នៃសហប្រតិបត្តិការពាណិជ្ជកម្មនិងវិនិយោគទ្វេភាគី។ ក្នុងគោលដៅនេះ លោកនាយករដ្ឋមន្ត្រីឥណ្ឌា អមដំណើរដោយគណៈប្រតិភូនៃ “មន្ទីរចម្រុះពាណិជ្ជកម្មនិងឧស្សាហកម្មឥណ្ឌា” និង “សហព័ន្ធនៃឧស្សាហករឥណ្ឌា”។ គូភាគីបានកំណត់ទៅហើយ គម្រោងចំនួន៦៤ លើវិស័យបែបយ៉ាង ថាមពល បូកទាំងថាមពលបរមាណូ និងធ្យូងថ្ម វិស័យវាយនភ័ណ្ឌ ដឹកជញ្ជូន មានកំពង់ផែ ផ្លូវដែកជាដើម បច្ចេកវិជ្ជាព័ត៌មាន សម្រាប់ទាក់ទាញវិនិយោគទៅវិញទៅមក។
ប្រភពក្នុងក្រសួងការបរទេសឥណ្ឌា បានប្រាប់ទីភ្នាក់ងារព័ត៌មានរដ្ឋរុស្ស៊ី Itar-Tass ថ្ងៃ៦កក្កដា នេះថា ពេលវត្តមានក្នុងជំនួបកំពូល នៃក្រុម៥ប្រទេសធំៗ ហៅថា BRICS ពោលគឺ ប្រេស៊ីល រុស្ស៊ី ឥណ្ឌា ចិន និង អាហ្វ្រិកខាងត្បូង ក្នុងប៉ុន្មានថ្ងៃទៀត នៅលើទឹកដីរុស្ស៊ី ជាប្រទេសម្ចាស់ផ្ទះ លោកនាយករដ្ឋមន្ត្រីឥណ្ឌា Narendra Modi នឹងជួបជាមួយលោកប្រធានាធិបតីរុស្ស៊ី ពូទីន ដើម្បី ពិភាក្សាអំពីគ្រប់តែវិស័យនៃសហប្រតិបត្តិការទ្វេភាគី ព្រមទាំងអំពីដំណើរបំពេញតាម កិច្ចព្រមព្រៀងទាំងអម្បាលម៉ាន ដែលមានចុះ ជាលទ្ធផលនៃទស្សនកិច្ចប្រមុខរដ្ឋរុស្ស៊ីនៅក្រុង ញីវដែលី កាលពីខែធ្នូឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ