លោកស្រី អ៊ុង សានស៊ូជី បានទទួលការអញ្ជើញទៅបំពេញទស្សនកិច្ចនៅចិន
ជ័យលាភីរង្វាន់ណូបែលសន្តិភាព លោកស្រី អ៊ុង សានស៊ូជី នឹងអញ្ជើញទៅបំពេញទស្សនកិច្ចនៅប្រទេសចិន សប្តាហ៍ក្រោយ ក្រោមការអញ្ជើញរបស់គណបក្សកុម្មុយនិស្តចិន។ ជាទស្សនកិច្ចដែលមិនធ្លាប់មានទេសម្រាប់លោកស្រីប្រមុខបក្សប្រឆាំងភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ប្រតិភូគណបក្សសម្ព័ន្ធជាតិដើម្បីប្រជាធិបតេយ្យភូមា ដឹកនាំដោយលោកស្រី អ៊ុង សានស៊ូជី បានទទួលការអញ្ជើញពីគណបក្សកុម្មុយនិស្តចិន ឱ្យទៅបំពេញទស្សនកិច្ចនៅក្រុងប៉េកាំង ពីថ្ងៃទី ១០-១៤មិថុនា។ នេះបើសេចក្តីជូនដំណឹងក្នុងគេហទំព័រគណបក្ស។ ប៉ុន្តែក្រុងរ៉ង់ហ្គូន និងគណបក្សប្រឆាំងភូមា ពុំទាន់មានបញ្ជាក់ព័ត៌មាន ឬផ្តល់ចម្លើយតបអ្វីទាំងអស់។
មានទម្លាប់ចុះឡើង និងរាប់អានខ្លាំងជាមួយក្រុមបស្ចឹមលោក មហាយក្សជិតខាងចិន មិនដែលបានឱកាសទាក់ទងលោកស្រីអ៊ុងសានស៊ូជីទេ។ កាលពីខែធ្នូ២០១៤ លោកស្រីបានជូនដំណឹងស្តីពីទស្សនកិច្ចនៅចិនម្តង តែត្រូវប្រកាសលុបចោលទៅវិញ។ ថ្ងៃនេះចិនបានធ្វើសេចក្តីអញ្ជើញជាថ្មី ដែល ធ្លាក់មកជួនចំពេលដែលសហគមន៍អន្តរជាតិកំពុងរិះគន់យ៉ាងខ្លាំង ភាពស្ងប់ស្ងាត់របស់លោកស្រីជ័យលាភីរង្វាន់ណូបែលសន្តិភាព ក្នុងសំណុំរឿងអន្តោប្រវេសន៍រ៉ូហ៊ីងយ៉ា និងក្នុងពេលដែលចិននិងភូមា មានសម្ពាធតានតឹងតាមព្រំដែន។
មានប្រជាប្រិយភាពខ្លាំង អាចឈ្នះនាំមុខ ក្នុងសម័យបោះឆ្នោតសភា ខែវិច្ឆកាចុងឆ្នាំ លោកស្រីអ៊ុងសានស៊ូជី នឹងត្រូវទទួលជួបដោយថ្នាក់ដឹកនាំជាន់ខ្ពស់បក្សកុម្មុយនិស្តចិនផង ព្រមទាំងអាចមានជំនួបជាមួយនាយករដ្ឋមន្ត្រីនិងប្រធានាធិបតីចិនផង។ ប្រសិនដូចការគិតទុក លោកស្រីស៊ូជី អាចនឹងពិភាក្សាជាមួយប្រមុខដឹកនាំចិន អំពីករណីអ្នកនិពន្ធលីវ សៀវបូ ជ័យលាភីរង្វាន់ណូបែលសន្តិភាពឆ្នាំ២០១០ និងអំពីនយោបាយផ្ទៃក្នុងភូមា នយោបាយជាតិនិយម នៅចំពោះមុខវិបត្តិជនជាតិភាគតិចរ៉ូហ៊ីងយ៉ា។
ទោះបីដឹងថា លោកស្រីមិនអាចក្លាយជាប្រធានាធិបតី ដោយហេតុតែរដ្ឋធម្មនុញ្ញហាមឃាត់ក៏ដោយ ក៏ក្នុងករណីបក្សប្រជាធិបតេយ្យឈ្នះឆ្នោត លោកស្រីនឹងក្លាយជាមនុស្សដ៏មានឥទ្ធិពលម្នាក់ប្រចាំតំបន់អាស៊ីអាគ្នេយ៍ របស់ភូមាដែលចិនអាចបង្កើន និងបន្តរក្សានាមជាអ្នកវិនិយោគធំជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ