អាមេរិក កូរ៉េខាងត្បូង និងជប៉ុន ព្រួតគ្នាដាក់សម្ពាធបន្ថែមលើកូរ៉េខាងជើង
តំណាងសហរដ្ឋអាមេរិក ជប៉ុន និងកូរ៉េខាងត្បូង បានព្រមព្រៀងគ្នានៅថ្ងៃពុធទី ២៧ឧសភានេះ បង្កើនសម្ពាធដាក់បន្ថែមលើកូរ៉េខាងជើង ឱ្យបោះបង់ចោលកម្មវិធីនុយក្លេអ៊ែរយោធា។ សម្ពាធដែលអាចជាការដាក់ទណ្ឌកម្មបន្ថែមក៏ថាបាន។ ប៉ុន្តែប្រទេសទាំងបី មិនបានបិទខ្ទប់ទាំងស្រុងដំណោះស្រាយតាមផ្លូវការទូតទេ។
ចុះផ្សាយនៅថ្ងៃ៖
ស្តាប់ - ០១:៥៥
ក្នុងជំនួបត្រីភាគី នៅទីក្រុងសេអ៊ូល រយៈពេលបីម៉ោង តំណាងសហរដ្ឋអាមេរិក ជប៉ុននិងកូរ៉េខាងត្បូង បានពិភាក្សាអំពីលទ្ធភាពផ្តល់សន្ទុះឡើងវិញដល់ការចរចា៦ភាគី ដើម្បីជំរុញឱ្យព្យុងយ៉ាងបោះបង់ចោលកម្មវិធីនុយក្លេអ៊ែរយោធា ជាថ្នូរនឹងជំនួយសេដ្ឋកិច្ចនិងការទូត។ ការចរចាដែលបានជាប់គាំងតាំងពី ឆ្នាំ ២០០៨មក។
ទន្ទឹមនឹងការទុកផ្លូវ ដល់ផ្នែកការទូត ទាំងបីប្រទេសបាន ព្រមព្រៀងគ្នាថាត្រូវតែដាក់សម្ពាធ និងទណ្ឌកម្មបន្ថែមលើរបបកុម្មុយនិស្តព្យុងយ៉ាង ព្រោះសម្រាប់កូរ៉េខាងត្បូង សមត្ថភាពលឿនស្លេវ របស់កូរ៉េខាងជើង ផ្នែកអភិវឌ្ឍន៍នុយក្លែអ៊ែរ ជាស្ថានភាពដ៏ធ្ងន់ធ្ងរ និងគួរឱ្យព្រួយបារម្ភខ្លាំង បើទោះជាបីគេពុំអាចផ្ទៀងផ្ទាត់សមត្ថភាពពិតរបស់ព្យុងយ៉ាងក៏ដោយ។
សូមបញ្ជាក់ថា កូរ៉េខាងជើងទើបបានប្រកាសថ្មីនេះ ថាបានបាញ់សាកល្បងមីស៊ីលបាលីស្ទិក ចេញពីនាវាមុជទឹក និងសម្រេចបានការផលិតក្បាលនុយក្លេអ៊ែរតូចបំផុតអាចបំពាក់លើមីស៊ីល ប៉ុន្តែអ្នកឯកទេសជាច្រើនយល់ថាជាព័ត៌មានបំផ្លើសអួតអាង ព្យុងយ៉ាងពុំទាន់អាចមានសមត្ថភាពខ្លាំងដល់ថ្នាក់នោះទេ។
ប៉ុន្តែគឺឆន្ទៈអភិវឌ្ឍន៍អាវុធនុយក្លេអ៊ែរ របស់កូរ៉េខាងជើង ដែលបង្កក្តីព្រួយបារម្ភខ្លាំងដល់សហគមន៍អន្តរជាតិ។ បន្ទាប់ពីជំនួបប្រជុំត្រីភាគីនេះ អន្តរការីអាមេរិក និងកូរ៉េខាងត្បូង នឹងធ្វើដំណើរទៅកាន់ប្រទេសចិន ដែលជាសម្ព័ន្ធមិត្តតែមួយគត់របស់ព្យុងយ៉ាង ដើម្បីស្វែងរកដំណោះស្រាយ។ មានមតិខ្លះបានទាមទារឱ្យប្តូរយុទ្ធសាស្ត្រដាក់កូរ៉េខាងជើង ព្រោះការដាក់ទណ្ឌកម្ម ការដាក់ឱ្យនៅឯកាលើឆាកអន្តរជាតិ មិនបានធ្វើឱ្យរបបផ្តាច់ការនេះប្តូរមហិច្ឆតានុយក្លែអ៊ែរសោះ។ កូរ៉េខាងជើងបានធ្វើការសាកល្បងនុយក្លេអ៊ែរបីលើក ២០០៦- ២០០៩ និង២០១៣ ហើយបន្តអភិវឌ្ឍន៍កម្មវិធីនុយក្លែអ៊ែរយ៉ាងសកម្ម។ សម្រាប់កូរ៉េខាងត្បូង និងសហរដ្ឋអាមេរិក ដរាបណាកូរ៉េខាងជើងមិនបង្ហាញឆន្ទៈពិតប្រាកដបោះបង់នុយក្លេអ៊ែរទេ ការចរចាមិនអាចចាប់ផ្តើមវិញបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ