នាយករដ្ឋមន្ត្រីជប៉ុនថ្លែងសុន្ទរកថានៅចំពោះមុខសភាអាមេរិកជាលើកទីមួយ
បង្ហាញសមានទុក្ខ បង្ហាញពីវិប្បដិសារី តែគ្មានទេ ពាក្យ “សុំទោស” ! នេះហើយជាអ្វីដែលគេអាចចងចាំបានពីសុន្ទរកថារបស់លោកនាយករដ្ឋមន្ត្រីជប៉ុន ស៊ីនហ្សូ អាបេ នៅចំពោះមុខសភាអាមេរិក យប់មិញ ដែលពុំធ្លាប់ប្រមុខរដ្ឋាភិបាលជប៉ុនណាម្នាក់ធ្វើពីមុនមកទេ។ អន្តរាគមន៍ដែលបានទទួលការស្វាគមន៍យ៉ាងខ្លាំង ទាំងពីសំណាក់សមាជិកសភាអាមេរិក និងពីសារព័ត៌មានជប៉ុនក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្នូរទះដៃអបអរ បានលាន់កងរំពង និងយ៉ាងយូរ ទាំងក្នុងពេលកំពុងថ្លែង និងក្រោយពេលបញ្ចប់សុន្ទរកថា។ សភាអ្នកតំណាងអាមេរិក ហាក់ដូចជាពេញចិត្តយ៉ាងខ្លាំងនឹងភាពស្មោះត្រង់របស់លោក ស៊ីនហ្សូ អាបេ ក្នុងពេលថ្លែងសុន្ទរកថា រយៈពេល៤៦នាទី ជាភាសាអង់គ្លេសសុទ្ធ។
មុននឹងចូលធ្វើអន្តរាគមន៍នៅសភា លោក ស៊ីនហ្សូ អាបេ បានឆៀងចូលគោរពវិញ្ញាណក្ខន្ធ នៅស្តូបសង្គ្រាមលោកលើកទី នាទីក្រុងវ៉ាស៊ីនតោន ដែលជាទីតាំងដ៏ស្ងប់ស្ងាត់ គួរឱ្យស្ងើចសរសើរ និងជាតំណាងពិតនៃសេរីភាព។
លោក ស៊ីនហ្សូ អាបេ អ្នកជាតិនិយមជប៉ុន បានថ្លាថ្លែងរៀបរាប់ឈ្មោះសមរភូមិប្រយុទ្ធ ក្នុងសម័យសង្គ្រាមលោក ដែលទាហានជប៉ុនប្រឈមនឹងទាហានអាមេរិក និងបានអះអាងអំពីជំហរជប៉ុន ដែលកែប្រែចិត្តគំនិត ៖ “ក្នុងនាមប្រទេសជប៉ុន និងពលរដ្ឋជប៉ុន ខ្ញុំសូមចែករំលែកនូវសមានទុក្ខដល់ព្រលឹងទាហានអាមេរិកដែលបានស្លាប់ក្នុងសង្គ្រាមលោកលើកទីពីរ។
លោកនាយករដ្ឋមន្ត្រីបានសម្តែងវិប្បដិសារី ចំពោះអំពើឧក្រិដ្ឋរបស់ទាហានជប៉ុនសម័យចក្រភព ប៉ុន្តែនៅគ្មានសោះពាក្យ “សុំទោស” ដែលបណ្តាប្រទេសជិតខាងនៅអាស៊ី និងធ្លាប់ស្ថិតក្រោមអាណានិគមរង់ចាំចង់ឮ ហើយក៏គ្មានដែរការព្រលយពាក្យឱ្យប៉ះពាល់ដល់ករណីស្ត្រី “កំដរផ្លូវភេទ” សម័យសង្គ្រាម។ សូមបញ្ជាក់ថា នៅក្នុងចំណោមសភាអ្នកតំណាងអាមេរិក ក៏មានវត្តមានស្ត្រីជនជាតិកូរ៉េម្នាក់ ជាអតីតស្ត្រីកំដរផ្លូវភេទពួកទាហានជប៉ុន។
យ៉ាងណាដ៏ដោយក៏សម្រាប់កាសែតជប៉ុន មានតែការលើសរសើរប៉ុណ្ណោះ ព្រោះប្រមុខដឹកនាំជាតិនិយមបានសម្តែងវិប្បដិសារី និងពិសេសបានប្រកាសអំពីការកែប្រែរបស់ជប៉ុន លែងធ្វើជាអ្នកឈ្លានពានគេ។ ហើយម្យ៉ាងទៀត អ្វីដែលជាជំនក់ចិត្តខ្លាំងសម្រាប់ពលរដ្ឋជប៉ុន ចំពោះសុន្ទរកថាជាប្រវត្តិសាស្ត្ររបស់លោកស៊ីនហ្សូអាបេ គឺស្ទីលស្ទាក់ស្ទើរក្នុងការថ្លែងជាភាសាអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ