លោកចេនស៊ុយបៀនត្រូវដោះលែងឲ្យនៅក្រៅឃុំដោយមូលហេតុសុខភាព
លោក ចេនស៊ុយបៀន អតីតប្រធានាធិបតីកោះតៃវ៉ាន់ ដែលត្រូវបានតុលាការកាត់ទោសកាលពីឆ្នាំ២០១០ឲ្យជាប់ពន្ធនាគារ២០ឆ្នាំ ពីបទប្រព្រឹត្តអំពើពុករលួយទើបនឹងត្រូវបានដោះលែងឲ្យនៅក្រៅឃុំនាថ្ងៃចន្ទ៥មករា ដោយមូលហេតុសុខភាព ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ជាប្រធានាធិបតីនៃកោះតៃវ៉ាន់នៅរវាងឆ្នាំ ២០០០និង២០០៨ លោក ចេនស៊ុយបៀន (Chen Shui-bian) ដែលមានអាយុ៦៤ឆ្នាំ នឹងត្រូវចាកចេញពីមន្ទីរពេទ្យក្នុងពន្ធនាគារនៅ Taichung ភាគកណ្តាលកោះតៃវ៉ាន់នាថ្ងៃចន្ទនេះ ។ លោក ចេន ត្រូវគេដឹកបញ្ជូនមកកាន់មន្ទីរពេទ្យក្នុងពន្ធនាគារនេះដើម្បីទទួលការព្យាបាលរោគ ដោយសារលោក មានជម្ងឺបាក់កម្លាំងកាយនិងកម្លាំងចិត្តជាធ្ងន់ធ្ងរនិងជម្ងឺសសៃប្រសាទ ParKinson ។
នាព្រឹកមិញ នៅខាងក្រៅពន្ធនាគារ គេឃើញវត្តមានរបស់បក្សព័ន្ធដែលស្មោះសរនឹងលោកចេនចំនួនប្រមាណជា ២០០នាក់ បានឈរតម្រៀបគ្នាយ៉ាងណែនណាន់តាន់តាប់ដើម្បីរង់ចាំទទួលស្វាគមន៍នាពេលដែលលោកចេនចាកចេញពីពន្ធនាគារ ។ ពួកគេ បានលើកទង់បដាជាច្រើនដែលមានចារជាអក្សរថា « ព្រះអាទិទេពប្រសិទ្ធិពរជ័យកោះតៃវ៉ាន់ »ឬ ថា« ជ័យោលោកបៀន»។
គួរបញ្ជាក់ថានៅក្នុងពន្ធនាគារ លោកចេនដែលធ្លាប់បានប៉ុនប៉ងធ្វើអត្តឃាតម្តងរួចមកហើយកាលពីខែមិថុនាមុន-ចាប់ពីអណេះតទៅនឹងត្រូវឲ្យគ្រូពេទ្យ តាមពិនិត្យរោគគាត់ជារៀងរាល់ខែ។ រីឯការដោះលែងគាត់ឲ្យនៅក្រៅឃុំនោះ អាចនឹងត្រូវលុបចោលបាន។ មិនតែប៉ុណ្ណោះ លោក ចេន ត្រូវបង់ប្រាក់ធានាសំរាប់នៅក្រៅឃុំចំនួន ២លានដុល្លារតៃវ៉ាន់ ឬ ត្រូវជា ៥ម៉ឺនលុយអឺរ៉ូ។ កូនប្រុសម្នាក់របស់លោកចេន បានថ្លែងប្រាប់ដល់ភ្នាក់ងារព័តមានបារាំង AFPថា ”ពួកគាត់រំពឹងទុកដែរថា អាចនឹងដឹកបញ្ជូនឪពុករបស់ពួកគេត្រឡប់មកផ្ទះសម្ពែងវិញ បានយ៉ាងឆាប់រហ័សបើអាចធ្វើទៅបានដើម្បីអាចឲ្យគាត់ ឆាប់បានទទួលការព្យាបាលរោគរបស់គាត់។
គួរំលឹកថា លោក ចេនស៊ុយបៀននិងសមាជិកនៃក្រុមគ្រួសាររបស់គាត់ ត្រូវបានតុលាការផ្តន្ទាទោសពីបទប្រព្រឹត្តអំពើពុករលួយ ដោយបានលាងលុយកខ្វក់ជាច្រើនលានដុល្លារ តាមរយៈការធ្វើអំណោយដល់គណបក្សនយោបាយនានាក្នុងប្រទេសនិង មូលនិធិសម្ងាត់សំរាប់ការទូតនៅឯបរទេស រួមទាំងការស៊ីសំណូកសូកប៉ាន់នៅលើកិច្ចសន្យាការងារសាធារណៈនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ